erkamaan bawloos teseloonqi erkayy
2
1 kafoot!
inn kapop deyaannu ikkim aypot kodda diiy inn mashshayness heufutan.
2 sed tureeshsh qum se inn ufutanep helpaan innu sapara filibisiyyose kinno otittaanne rakkot innu qari pai,
hekoddu male,
toorayta qim innu qari dey nafenno,
ikkimin lel masmasunt heka Mooha inni lelinnoss Moohot qimussa innu dayy.
3 innu inn korsinkinnu,
amm patandapaann,
shoke qaap oshshumatenn shoke shonkumannemu.
4 sekapeeshsh lel masmasunt se Moohot iyyaan amaanamep innu tooyan innu harki haayin ishaamin,
sedenno innu erkanninkinnu Mooha se mutsuraannu tooyiyyu masmaasusisass male,
amm nam masmasusisaassemu.
5 lashsh shakkaah naf nannayisaann shoke hadat kodashshet qafnaattan inni ishaama diittaaynu mashshayness heufutan;
moohaanno maanyeshaynu.
6 inn qaranno koddo orr pil qaranno amm nam shokkooh naf qara serka henfadinemu.
7 oot innu orr hitaym heka kristoos koddin maalla,
hin innu fadusinniyy inn qara kaassatta fottinhaan.
hekoddu male,
qum inkot meddoodd helinnishshopin dikkuman otanshayn qalle kinnaann.
8 settep lamm oot innu inn hoxsaanninkinnu maalla,
lel masmasunt heka moohaateeh inni lela kodda male,
kiyyataynu ootaayn tarpisa daattaassenno hendikkisann.
settenno oot inn moyshadaannu kodditen maalla kida.
9 kafoot!
ikkim innu ashshann erkannenne tashshin heufutan,
helpaan innu lel masmasunt heka Mooha inni lelinkinno,
aynu qarassenno haisot kodda turan kallapanne awwadd erkann.
10 helpaan innu otanshayn otant orr se amaaniyyu ila kinno,
miilumaanne tsillumaanne kiyyat haasutta daftin kallaattaaynoss innanno moohaanno maanyeshaynu kida.
11 qum appat meddooyy olle kiyyaanniyyop innonno shokkushokkotayne inn olle kinnaattaynu inn he ufutan;
12 helpa mitt Mooha se daamumaayyenne serkooyy qallep inn hembess ikkim paana fadusinniyun kallaannintan inn korsaaynu,
inn kokkisaaynu qar oxooran inn dinkamaaynu heufutan.
13 lamm innu,
maalla orkanna mita male ootaayn Mooha aypisanninkinnun qafna.
sedenno lel Mooha se inn innu kapa dakayten helpaan inn qeeddattene,
lel namatep kodda male,
lel Mooha koddaayy qeedattaayn kida.
shaakketass lel hin lel Moohaat;
lel sedenno inn hin amaaniyy ilass erkannin.
14 kafoot,
innanno qum orr se huss yihuta qalle Yesus kristoos amaan illo maaparadda kristaana heka Mooha koddep kiyyatten.
qum orr ayhuta kapin rakkot iyyaa qari deitep,
kafaayn kapeeshsh rakkot inn qarassenno paitt.
15 orr ayhuta hin Yesus poldanne himampayya ikayy,
innu kann arisaann hussalle innu sohashshiyyen.
iyyaa iyyaan Mooha dapusinniy,
nam heikk qar hittinniyy kida.
16 ikkim innu orr se ayhuta kodda diiyyess lel iyyaa indinanninan inleliness innu dawrin.
sedenn oot iyyaa juppot qari juppot padawan aanen maalla,
jiiayta Mooha itturi shokkooh iyyaa qari dey.
darrax bawloos orr teseloonqeti qapu
17 lamm kafoot!
laaffotin kodda male,
sohan oot innu helpaan qoj inn kapa reehan maalla,
diikko inni darraxan indan inn akka ikkaani fadin.
18 inn kapop deyaassenno henfadin makess,
antu bawloos lamm inn kapop deyaass helpa leken ekkayy;
hekoddu male seetsan innu dawr.
19 helpaan poldaannu Yesus deyiyyo,
irraxateshinnu shoke masmasunshinnu shoke qoyqoytaannua innu infoojinkinnu,
innann inhinemu?
20 shaakketass serkaannonne masmasunshinnu inn.