toxt ila sohatta Yesus
(mati. 28,1-8; mar. 16,1-8; Luqaa. 24,1-12)
20
1 lashsh hirayta tappaate (uhute) etikel qeehatta turann,
maariyaam mektelishet poosa Yesus qarop ant;
dakanno poosa kapa all kattam it akkit illo
2 feelantan simoon betsiroosenne soollishsh se Yesus hoxsaanniyyu kapop deit,
"pold poosaalle heqeeddaden,
por iyyaa ulli haayen amm henxufnamu" iyyaa kidit.
3 semmaalla betsiroosenne soollishsh se Yesus hoxsaanniyyonno hesohaden poosa qarop ollin aanen.
4 iyyaa lakkaddun ollin feeliyane,
soollishsh hinett betsiroos qarann tarp feel illo poosa qarin paiyy.
5 helpaan iyyat lahaat kidd tooye waalt se qahan dakinshiyy insiranteeh akk male,
amm poosa tallop heluumemu.
6 simoon se betsiroos kidamiyyonno iyy kann qap paiyy illo poosa tallop luum;
iyyanno waalt se qahanateeh akk;
7 uuwaat se mashsh Yesus qari marant maranadenn ootadd kishsh iyyat akk male,
amm waalt se qahan olle hekishshamu.
8 hin turi qatta paiyy poosaan tallop luum akk illo amaan.
9 (maana malla,
toxt ila sohatta ikkim iyy fadusinnishshu matsaafa miilot qalle amm sanu qallheqaapadenemu.)
10 soollet hin lakk manaddop qalleeshsh mitaaten kallen.
Yesus maariyaam mekitelishetass akkaad
(mati. 28,9-10; mar. 16,9-11)
11 maariyaam lamm poosaan altass ellit pooyin.
helpaan it pooyishsho lahaat kiddit illo poosaan tallaat tooyt;
12 hitaymiyya lak uuwaat atat uuwaden por se dakint Yesus ulli haayante mashsh mineettanne lukka kanneell laxiyen it akkit.
13 iyyaa illo,
"yenta,
maana hetay att pooyin?"
iti kiden.
it illo,
"poldaawonn tawen;
por iyyaa ulli haayen amm henxupamu" iyyaa kidit.
14 it sedep kidit illo ippateesh mitaatishsho lamm Yesus ullass ell it akkit;
hor Yesus koddaayy amm heufunaattemu.
15 iyyat illo,
"yenta,
maana hetay att pooyin?
aynu fadin?"
iti kid.
it lamm erkamampayt ull dihot settetep iti kinnaad,
it illo,
"polda,
et att qeeddit koddo,
por att ulli haayt ani lelii,
qeeddanninhina" ikkidit.
16 Yesus illo,
"maariyaam" ikkid.
it lamm ippateesh mijir kidit illo kap ipretatin "rapuunii" ikkidit;
sedep kidot "kollisampayt" kida.
17 iyyat illo,
"amm sanu erra appaawu kapop henxaanemu,
an qappatta diiyii,
sed kapeeshsh kafaawu kapop aanii illo,
'antu appaawonne appaayn,
moohaawonne moohaayn kapopin annin' hekid,
kid iyyaa lelii" iti kid.
18 semmaalla maariyaam mektelishshet soolleshayy kapop ant,
ikkim pold akkitenne hin iyyat it lel iyyaa lelt.
Yesus soolleshayyess akkaad
(mati. 28,16-20; mar. 16,14-18; Luqaa. 24,36-49)
19 lashsh hirayta tappaanettete (uhute) awwadd soolleshiyy hayyot ayhuta tura huurann kaalt man se iyyaa uttalla kiyyan alliduhen orqudi qapamen;
Yesuset dey,
otanshaddu ili ell illo "andot inni kodditu" iyyaa kid.
20 sedep kid harkaayyanno haalishayyenno iyyaa akkiyy.
helpaan soolleshiyy iyy akkene ikkaaness masmasen.
21 iyat lamm qarxoor,
"andot inni kodditu;
qum appat an hitepin ananno inn hitina" he iyyaa kid.
22 iyyat sedep kid kanna iyyaa qarass uffu kid illo,
"laaffot miilot qeeddadaa ikkid;
23 et inn orrass jupposhaddu all diittane diissama akkannintan;
et inn lamm juppot orr alldiitta diittane amm all inni diissamintamu" he iyyaa kid.
yesusenne toomaas
24 soolleshayy hundan lakk ila ishokku,
toomaas hin titimoos kidamiyyu helpaan Yesus soolleshay kapop deye,
amm iyyaa olle hekiyyamu.
25 semmaalla soollet shakkan,
"poldin akkin" kidiyyane,
iyyat lamm,
"harkaayy se tishkan daaxam etin akka,
por se tishkaa uqqall daaxamen illop qumaajjittaawu kalisa illo madanishsh haalshayyetenno qappatta diiyyo amm amaanihinamu" hekid.
26 settep lamm lashsh lakkushet kanna soolleshiyy man talla kiyyan;
essete toomaasenno iyyaa olle kiyy.
kaaltanno duhumin kishsho Yesuset dey otanshaddu qalli ell illo,
"andot inni kodditu!"
iyyaa kid.
27 sekanna toomaasess,
"harkaaytin harkaawu qappadu tooy;
harkaaytenno haalishaawu qalli kaliyii;
iamaaniyyu kodd male iamaana diinniyyu kodda diiyii" ikkid.
28 iyyat illo,
"polda,
moohaawo!"
kid immitaattiyy.
29 Yesus illo toomaasess,
"oot att an akkit maalla amaant;
iyyaan akka male amaaniyy iyyaan hartood" ikkid.