wottaattaradda Yesus qarass beejjiyaden
(mati. 27,27-32; mar. 15,15-21)
19
1 helpaanette bilaatsoos yesusenn aan kayposiy.
2 wottaattaranno qoyqoyt quddeetat maren illo mashshayy qari haayen;
uuwaat roomatenno uuwashshiyyen;
3 iyy kapop dehaaden,
"Daam ayhutaatello!
andot hedi kodditu" kidin illo il pappaalin.
4 bilaatsoos lamm lakkiyyaass harrop sohad illo,
"toare,
nayqunt shakkaah naf qari akka diittaawu ikkim ufunaannintanessin harropa inni sohashinnina" iyyaa kid.
5 Yesus illo qoyqoyt quddeet se op qari haayenenne uuwaat se roomat op uuwawshshiyenenn altop sohad;
bilaatsoos lamm,
"toare,
nam sett" hekid.
6 kaadayya suukammaatenne erhamaaddu helpaan iyyaa Yesus akkene,
"allrahhii,
allrahhii!"
hekiden ullupen.
iyyat illo,
"amm antu nayqunt shakkaah naf iyy qari henxakkemu.
inn inxaanaa rahhaa" ikkid.
7 orr ayhutaatenno,
"innu halittin qafnipa,
nam hin oot iyyat meet Moohaat ikkodiyu maalla,
qum halittaaynu qari toya iyy fadosinnin" hekiden.
8 helpaan bilaatsoos sed dakaye ikkaaness nah;
9 tallaash mitaat illo yesusess,
"att ahila deet?"
ikkid.
iyat lamm akkan shokkooh naf amm iyyi hemitaattiyyemu.
10 semmaalla bilaatsoos,
"ani lelintotemu?
antu hed furisaanne raahaass hayyotum ikkimin qapu inxuftotemu?"
heikkid.
11 Yesus illo,
"et Mooha kapeett hayyotumat hedi daassama diiy kid,
an qarass amm hayyotum qafnaannihaatemu;
semmaalla nam se an tarpiy hedi day juppot kaant qapa."
he ikkid.
Yesus qari horat toxt quuramaadd
(mati. 27,15-31; mar. 15,6-20; Luqaa. 23,13-25)
12 sekanna bilaatsoos all iyy furisa fad;
hekoddu male orr ayhuta,
"et nam sed all furitto,
amm att moyshsh Daam roomaatemu;
nam Daam ikkodiyu dahenn iyy Daam rooma qari sohanniyyu" hekiden ullupen.
13 bilaatsoosenno sed dakay illo Yesus altop sohashshiyy;
por se "daka palda" kidamiyyo tekkat horat quura qari laiyy;
por settenno kap ipretaten "kapata" kidamin.
14 lashsh settenno hekat dikkisatta serkila faasikaat;
helpaanno saatet leh qara kida.
bilaatsoos illo orr ayhutaatess,
"toare daamaayn!"
ikkid.
15 iyyaa lamm,
"allpatiyyii!
allpatiyyii!
allrahhii!"
hekiden ullupen.
bilaatsoos illo,
"daamaaynin allrahhinamu?"
iyyaa kid.
kaadayya suukammaatenno,
"Daam rooma pateeshsh Daam pil amm henqafnamu" hekiden immitaattiyyen.
16 essete bilaatsoos ikkim rahhinaness tarpiyy iyyaa dayy.
rahhama Yesus
(mati. 27,32-44; mar. 15,21-32; Luqaa. 23,26-43)
wottattaraddaanettenno Yesus qeedden inxaanen.
17 sekanna Yesus masqalet se iyyat uqqari rahhaminu haiy,
por se "hilayyat mashsh" kidamiyyop aan;
por hin kap ipretatenn "kolkota" kidamin;
18 iyyaa illo ulli iyy rahhen,
Yesus otantalli qattiyen,
iyy olle orr pil nam lakk dind dindin rahhen.
19 bilaatsoos tsaafa,
"Yesus nasireetishsh,
Daam ayhuta" kidiyy tsaaf masqalet qari mashshaayy mineett daaxusiy.
20 por hin Yesus ulli rahham oot iyyat sapara kapi dehaad maalla,
orr ayhuta ila iyyaan lek tsaafan waarusiyy;
tsaafanettenno kap ipretatenne kap roomaatenne kap kirketatenn tsaafamen.
21 kaadayya suukamma ayhuta bilaatsoosess,
"nam hin 'antu Daam ayhutaat' hekid,
kid tsaafi male,
'daam ayhuta' kida tsaafa diiy."
hekiden.
22 bilaatsoos lamm,
"se antu tsaaf hentsaaf" hekkid iyyaa mitaattiy.
23 helpaan wottaattaradda Yesus rahhen kanna,
uuwawaayy qeedden,
ikkim shokkushokko iyyaa qar paintu afur qall qooten;
settep lamm tsuppuqoshayyenno qeedden.
tsuppuqoshiyy it erreett hak lahat heddisot male shokkooh dawant kida.
24 semmaalla,
"hitsa kashannu;
nam it paitt paittu male,
qall kakkaaxa diinnu" he oll kikkiden.
sedenno,
lel matsaafa hin
"uuwashawu olli qooten;
tsuppuqoshawu qarassenno hitsa kashaden"
kidiyyu ikkim kaysaanninoss kida.
semmaalla wottaattaradda sedep koden.
25 lamm masqalet se Yesus uqqari rahham kapass inkoshayyenne,
ishaart inkoshayyetenne,
maariyaam haypaat qelobenne,
maariyaam mektelishetanno ulli ellen.
26 helpaan Yesus inkoshayyenne soollishsh se iyyat hoxsanniyyu iyy kapi ellen iyyat akke,
inkoshayyess,
"inkoyy,
meetaayt,
toare" kid.
27 sekanna soollishsh se iyyat hoxsaanniyoss,
"inkoshayt,
toare" ikkid.
esseteeh soollishsh hin manayyep it qeeddad.
toxt Yesus
(mati. 27,32-44; mar. 15,21-32; Luqaa. 23,26-43)
28 sekanna Yesus heikk dahenn kaysaattaaddu ufunaad illo lel matsaafa ikkim kaysaanninu,
"hendeepood" kid.
29 ulla mehadda jarayt woynetatin innaakkood kiyy;
iyyaa illo jarayt sett nuuffan innaaken qoyr hisobbet qari koden illo kapin qappaden.
30 Yesus jarayt woynet sett kapin koy kanna "hekaysaatt!"
hekid;
mashshayy laheet kash illo nafseshayy tarpiyy dayy.
haalt Yesus torin madamaad
31 lashsh settenno dikkisatta sampataat kida.
orr ayhuta lamm dakint orr se rahham lashsh sampata qari ikkim masqalet qara innakayin oot iyyaa faden maallanne sampata setteno ihawwi kiyyu kodd maalla,
shapat orr se rahham ikkim qepintu illo dakinshiddu lekkannintu bilaatsoos dinkamaden.
32 wottaattaradaanno deyen illo orr se Yesus olle rahham ila shapat ishokku qeppiyyen,
ukkanna lamm shapat se shokkotenno qeppiyyen.
33 helpaan iyyaa Yesus kapa paene oot iyyat toy iyyaa akken maalla,
amm shapashayy heqeppiyyenemu.
34 hekoddu male wottaattaradaan ila ishshokku Yesus torin haaltalleeshsh mad;
esseteeh haalshayy qalleeshsh diikanne haq urqen.
35 nam sed akk maanyetumaayy helel;
maanyetumaayyenno shaakket;
ikkim shaakket ishaamiyyoss iyyat heup;
innanno ikkim amaanintaness inni lel.
36 hinenno kodden,
lel matsaafa hin,
"lafshayy ila shakkaah naf amm qepintamu" kidiyyu ikkim kaysaanninoss kida.
37 matsaafa shokku lamm,
"se iyyaa madenenno akkinan" hekidin.
mookama Yesus
(mati. 27,57-61; mar. 15,42-47; Luqaa. 23,50-56)
38 sekanna yoosef armaatishsh,
hin hayyot ayhuta huuran deket soolleshayy kodd,
dakint Yesus qeeddaass bilaatsoos dinkamad;
iyyat illo iddayy.
semmaalla iyyat dey illo dakint Yesus qeedd.
39 lamm niqotimoos hin tureeshsh awwadda Yesus kapop dey,
lahot kerpetatenne heka arkayya litirot tseet koddaaten dey.
40 dakint Yesus qeedden dikkila ayhuta qari dikkiyen shittotin roopen waalt qahnatin siren.
41 por se Yesus ulli rahhame por dihotat kiyy;
por dihot sett ilanno poosa awshiyya namat uqqalli mookama diiy kiyy.
42 oot it lashsh dikkisatta ayhuta kodditenne poosaanno iyyaan deh kodden maalla,
dakint Yesus ullass mooken.