Yesus tarpisama daassamayyenne qapamaayy
(mati. 26,47-56; mar. 14,43-50; Luqaa. 22,47-53)
18
1 Yesus sed kid kanna soolleshayy olle tipot qetron patop aan;
ull dihot se ulla kiyyop soolleshayy olle kali.
2 oot yesusenne soolleshayy por se ili helpamitt orqud qapamiyan maalla,
yihuta se iyy tarpiy dayyenno por se hexupa.
3 semmaalla yihutot wottaattaraddaanne waartiyaddaan kaadayya suukamma man miilotatenne faraset ila hitamenn iolle ullop dey.
iyyaanno muqutaanne faanusetaanne mehadda adantat qapaden.
4 Yesus lamm hin iyy qari deyina dahenn ufunaad iyyaa turi sohad illo,
"aynu fadin?"
iyyaa kid.
5 iyyaa illo,
"Yesus nasiretishshin fadin" ikiden.
iyyat illo,
"hin anpa" iyyaa kid.
yihuta se iyy tarpiyy dayyenno iyyaa olle ulli ell.
6 helpaan iyyat,
"hin anpa" kide,
ippateesh tupintupaashshen illo hussalleesh sunken.
7 ukkannassenno Yesus,
"aynu fadin?"
hekid iyyaa kaassad.
iyyaa lamm,
"Yesus nasiretishshin fadin" kiden.
8 iyyat illo,
"hin an,
hen inni kid.
et an fadishshan koddo,
orr se are kiyy alldiiyyaa,
heaanenii."
ikkid.
9 sedenno,
lel iyyat,
"hin att an daatt ila shokkooh naf amm alli henpatiyyemu" kid ikkim kaysaanninoss kida.
10 simoon se betsiroos kidamiyyonno pillaw se iyyat qapu pushad illo erhayt suuka suukamma daw lapitt miskittishshet qara quur;
mahh erhayt settetenno "malkoos" kidamin.
11 Yesus betsirooses kide,
"pillawaayt hap tallop allmitaattiyyii;
waallet rakkot se appat ani dayy ukkinonemu?"
suuka suukamma turop Yesus dehayyen
12 sekanna wottaattaraddaanne sinkittaaddonne waartiyada ayhuta Yesus qapen illo hiden;
13 turqattaass haann kapop inxaanen.
haann,
qayyaaff se essete suuka suukamma kodd qarann appa haypaashayyet.
14 qayyaaff lamm iyy se,
"oot siipat et nam shokkooh toyo hedikk" kidan hayyot ayhuta kors kida.
betsiroos Yesus marmad
(mati. 26,69-70; mar. 14,66-68; Luqaa. 22,55-57)
15 simoon se betsiroos kidamiyyonne soollishsh pilanno Yesus kannass aanen;
soollishsh settenno iyy suuka suukammaatin ufunasham kida;
semmaalla soollishsh hinett Yesus olle man suuka suukamma altop kal.
16 betsiroos harra kaalt kapass ell;
soollishsh se suuka suukamma iyy upu lamm hexaan erhaytet se harrat luushishshu olle waar illo betsiroos tallop kalusiy.
17 harrat lushampaytet hinett lamm betsiroosess,
"hedenno soollet nam sed ila iyy shokkupa?"
ikkidit.
iyyat illo,
"erraytu" kid.
18 essete oot damhayt kiyyu maalla,
erhamaanne wartiyada apitt qassiyyen illo aasannin.
betsiroosenno iyyaa olle ulli ell aasannin.
kaassiy suuka suukamma kapa yesusi dehaad
(mati. 26,59-66; mar. 14,55-64; Luqaa. 22,66-71)
19 helpaanette suuka suukamma oot soolleshayetenne oot kollilaayyat Yesus kaassad.
20 Yesus illo,
"antu nam heikketessin patpahiy lel,
por orr ayhuta dahenn orqud qapamiyanne man dinkamatenne man miilot tallanno,
helpa mitt henkolliy;
akkan antu deketi lel amm hekiyyanemu.
21 maanaass an kaassannin?
orr se antu leliyyo dakay kaassadu;
iyyaa,
hin antu ishaam heupan."
kid immitaattiyy.
22 helpaan Yesus sed ishaamiyyo,
wartiyadaan ulli elli ila ishokku,
"suuka suukammaatess att sedep mitaattinnimu?"
hekid illo Yesus paal.
23 Yesus illo,
"shon iyaan nayq ishaame,
oot nayqunshawot maanyetumaayt lelii,
lamm hin antu ishaam et iyaan dikk koddane,
maanaass an dawit?"
ikkid.
24 sekanna kuless haann,
qayaaff se suuka suukamma kodd kapop Yesus hidan settin hit.
betsiroos lakkiyyaass Yesus marmad
(mati. 26,71-75; mar. 14,69-72; Luqaa. 22,58-62)
25 helpaanette simoon hin betsiroos kidamiyyu ullass ell apitt aasannin;
orr pilanno lamm,
"hedenno soolleshayy ila ishokkupa?"
heikkiden.
iyyat illo,
"iyyokku" kid marmad.
26 erhama suuka suukamma ila ishshokku,
kafitt nam se betsiroos lapitt qara mit,
"ul dihot qalle antu iyy olle hed inxakkinemu?"
heikid.
27 betsiroos lamm qar oor,
"amm antu iyy henxupamu!"
kid marmad,
esseteeh lukkalot iixi.
bilaatsoos turop Yesus dehayyen
(mati. 27,1-2;11-14; mar. 15,1-5; Luqaa. 23,1-5)
28 sekanna yesusenn man qayaaffaashsh man pexashisampaytatep aanen;
helpaan etikel tuqqan kida.
orr ayhuta laah faasika ikkim dama fottinaness,
oshshuma tura,
man peashisampayt tallop amm hekalenemu.
29 semmaalla bilaatsoos altop iyyaa turop sohad illo,
"nam sed maanan kasasin?"
iyyaa kid.
30 iyyaa illo,
"nam hin nayqisampayt kodda diiy kid,
amm hedi tarpinnihaxanemu" kiden immitaattiyen.
31 iyyat illo,
"inxaanaa,
qum halittayn qari horat qari quuraa" iyyaa kid.
orr ayhuta lamm,
"amm nam ikasot innu hedaassamemu" ikiden.
32 hin maalla koddit,
Yesus toxt ashshann kishshun ikkim toyinu lel iyyat ishaam ikkim kaysaanninoss kida.
33 bilaatsoos lamm qaraashsh manayyep mitaat,
Yesus hemb illo,
"att Daam ayhutaatemu?"
kid kaassad.
34 Yesus illo,
"att sed isseeshshamu shoke iyyaan orr pil ootaawu hedi lelen ishaamin?"
kid immitaattiyy.
35 bilaatsoos lamm,
"antu ayhutishshemu?
kafaaytenne suuka suukammaat an turop hed dehayypa.
att maana erkatt?"
he ikid.
36 Yesus illo,
"daamumaawu amm are husslah qaraamu;
daamumaawu are husslah qara kodd kid,
ikkim antu hayyot ayhutaati indaassaminess,
erhamaawu an qara adaayy.
hekoddu male daamumaawu amm aremu" hekid immitaattiyy.
37 bilaatsoos lamm,
"illo att daamemu?"
ikkid.
Yesus illo,
"Daam koddaawu att hellelti.
antu oot shaakketat maanyet koddaassin dalad,
husslah qaropanno dey;
nam heka shaakket kodd dahenn lelaawu dakayin" ikkid.
38 iyyat lamm,
"shaakket kidot maana kida?"
hekid iyy kaassad.
lamm lakkiyya orr ayhuta kapop aan illo,
"amm antu nayqunt shakkaah naf iyy qarass henxakkemu.
39 hekoddu male lashsh serkila faasikaate orr hidam ila nam shokku ikkim inni fursamiyyu hexuftan;
semmaalla,
ikkim Daam ayhuta inni fursaminu fadikkishshanemu?"
iyyaa kid.
40 iyyaa illo,
"parpaan innu furiyyii male,
amm nam sedemu!"
kiden ullupen.
hekoddu male parpaan ewwa kida.