dinkam Yesus
17
1 Yesus sed ishaam kanna moontalleel tooy illo sedep kid,
"appollo!
toare,
helpaan hekayen;
meetaatt ikkim hed serkinninoss meetaayt serkiyyii.
2 att serkinnintonno,
orr se att iddaattess dahenn ikkim kiyyat parpar daanninoss oot att orr dahenn qari hayyotum iddaatt maalla kida.
3 kiyyat parpartenno,
hed shokkooh se Mooha shaakk koddenne Yesus kristoos se att hitt ufunaatta kida.
4 antu erkamaan att ani daatt kaysisaannin husslah qari hedi serkiyy.
5 apollo!
husslah uumama tureeshsh serka hin antu hed olle qapun ammann ikkapi an serkiyii.
6 orr se att husslah qara an daattess att aynu koddaayt henxufnaytiyy.
iyyaa hekaatt makess,
att lamm anass iyyaa daatt;
iyyaanno lelaayt heqeeddaden.
7 hin att ani daatt dahenn hed kapa koddaaddu ammann heupan.
8 lel se att ani daatt iyyaass hendayy,
iyyaanno heqeeddaden;
antu hed kapa sohattaawonno shaakketass hexufnaaden;
att an hitaaytenno heamaanen.
9 "antu dinkamiyyu iyyaass kida;
hin att ani daatt hekoott koddaaddonnin iyyaa maalla hed dinkamin;
amm husslahat dinkaminkiyyamu.
10 hin hekaawu kodd dahenn hekaatt;
hin hekaatt koddenno hekaawu,
ananno iyyaannin serkisamina.
11 antu sekanneeshsh amm husslah qalli kallaanninhinamu;
iyyaa lamm husslah qalle kiyyan.
antu ammann hed kapopin annina.
miilampayt,
appollo,
hin att ani daatt ikkim innop shakkanooh koddinaness mahhaayt se att ani daattin iyyaa lushii.
12 helpaan antu iyyaa olle kiyyo,
mahhaayt se att ani daattennin iyyaa pat qaad illo luush;
ikkim lel matsaafa miilot kaysaanninossenno se meet patet kodd pateeshsh shokkooh naf iyyaa ila amm hepatemu.
13 antu ammann hed kapopin annina;
hekoddu male antu husslah qara kiyyo sed leliyyu,
ikkim masmasunshshiyyu iyyaa ila kaanintoss kida.
14 antu lelaayt iyyaass hendayyi;
qum antu heka husslah kodda diiyyep,
iyyaanno heka husslah kodda diittaaddu maalla,
orr husslah iyyaa qar hittiyyen.
15 ikkim se nayq kela iyyaa lushintoss male amm ikkim husslah ila iyyaa sohashshinnintossin dinkamimu.
16 qum antu heka husslah kodda diyyep iyyaanno amm heka husslahatemu.
17 shaakkeshaytin iyyaa miiliyyii.
lelaatt shaakket.
18 qum att husslah qarop an hittepin ananno husslah qarop iyyaa hit.
19 ikkim iyyaanno shaakketin iyyaan miili koddinanessin antu iyyaa maalla immiilinnin.
20 "lel se iyyaa lelinan minann orr se an amaaninossennon dinkamin male amm iyyaasseehin dinkamimu.
21 apollo,
qum att an olle shokkooh koddit,
ananno hed olle shokkooh koddep,
iyyaa dahenn ikkim shakkanooh koddinan illo orr husslah att an hitaayt ikkim amaanninan iyyaanno innun shakkanooh koddinanessin hed dinkamin.
22 qum innu shakkanooh koddinep iyyaanno ikkim shakkanoh koddinaness serkaan att ani daatt iyyaass hendayy.
23 antu dinkamiyyu,
qum antu iyyaa olle shokkooh kodd,
hedenno an olle shokkooh kodditep,
ikkim iyyaanno shaakketass shakkanooh koddinaness kida;
sedenno ikkim att an hittenne qum se att an hoxsaattep iyyaanno hossaattaayt husslah ikkim ufunaanninoss kida.
24 "appollo!
hin att an daatt ikkim por se antu ulla kiyyo kinnaanninan illo serkaawu akkinanessin fadin;
serkaanettenno husslah uumama turann att an hoisaatt maalla ani daatt.
25 tsillampayt appollo!
orr husslah amm hed hexufnaademu;
antu lamm hed henxufnaad;
hin are kiyyanno att an hitaayt hexufnaaden.
26 hoxsunt se att anin hoxsaatt ikkim iyyaa ila kinnaannintu,
ananno iyyaa ila kinnaanninu iyyaa hed ufunaanninaness henkod;
lamm ikkim hed ufunaanninanessennon kodina."