16
1 toare,
antu hin dahenn inni lel,
ikkim inn amaanteshayn all indiinnin tura kida.
2 man dinkam ayhuta tallanno all inn sohashshinninan;
lamm helpaan orr hin inn ikanniyy dahenn afa moohax erkanniyyanep ikkinnaannintu deyina.
3 iyyaa sed erkanninan,
oot iyyaa appaanno ananno ufunaatta diiyyen maalla kida.
4 hekoddu male antu turiqattiyy sed inni ishaam,
et helpaan paxane,
ikkim immashshioorsannintaness kida."
"antu sed tureeshsh hin dahenn inni lela diiyy,
oot antu inn olle kiyyu maalla kida.
erkama laaffot miilot
5 ammann lamm se an hit kapopin annina;
inn ila nam,
'ahaylop annin?
' kidinu an kaassanninu amm hekiyyamu.
6 hekoddu male,
oot antu sed inni lel maalla,
dappet mutsuraann qall innaak.
7 antu lamm shaakketin inni lelin:
etin aano innass hedikk.
etin anta diiyyo kokkisampayt amm inn kapop deyinamu;
etin aano lamm iyyin inni hitina.
8 laaffot miilot setteno deyina,
oot juppotatenne oot tsillumatenne oot horat quuraat,
orr husslah qar pulina.
9 oot juppot kidot,
oot iyyaa an amaana diinniyyan maalla kida.
10 oot tsilluma,
oot antu appa kapop anninu illo sekanneeshsh inn an akka diinnintan maalla kida.
11 oot horat quura,
oot piddampayt heka husslah sed seetsan qari horat quurant maalla kida.
12 akkan lek antu inni lelinun qap makess;
hor ammann inn qarass hursaanninan.
13 hekoddu male helpa laaffot shaakket deyo,
por shaakket dahennetep inn tur qeeddina;
laaffot miilot settenno hin iyyat dakay dahenn ishaamina male,
amm isseeshsh ishaaminamu;
iyyat iyyaan ittureesh koddinanno inni lelina.
14 oot iyyat iyaan hekaawu kodd qara qeeddinu inni lelinu maalla,
an serkinnina.
15 hin heka appa kodd dahenn hekaawu;
'hin hekaawu kodd qara qeeddina inni lelina' antu inni kid sed maalla kida.
dappeshinn masmasuntass oorint
16 "helpa qoj kanna amm an akkihintanemu;
helpa qoj kanna lamm an akkintan."
17 soolleshayy ila shakkan,
"hin iyyat,
'helpa qoj kanna amm an akkihintanemu,
helpa qoj kanna lamm an akkintan',
settep lamm 'appa kapopin annina' innu kidiyyu maana kidaayye?"
olli kikkiden.
18 "hin iyyat 'helpa qoji kanna' kidiyyu maana koddinan?
hin iyyat ishaamiyyu amm innu kaliyyanemu" kidaan orr kakkaassaden.
19 Yesus lamm iyy kaasatta fadaaddu ufunaad illo sedep kid,
"inn orr kakkaassannishshan,
oot se antu 'helpa qoj kanna amm an akkihintanemu;
helpa qoj kanna lamm an akkintan' inni kid maallamu?
20 shaakket shaakketin inni kidin,
inn pooyihintan;
dappinnintan;
orr husslah lamm masmasinan;
hekoddu male dappeshinn masmasuntass oorint.
21 helpa iskattet haayishsho,
oot lashsh laashamunshadd paitt maalla dappinnishsh;
et haaytu kanna lamm,
oot medda husslah qari daladen maalla,
masmasaadden amm rakkoshadd qaapannishshamu.
22 settep inn ammann dappinnikishshan;
hekoddu male antu ukkannannon inn akkina;
mutsuraannanno masmasinan;
masmasunshaynenno nam inn qara qeeddanninu amm hekiyyamu.
23 awsette amm akkan an qara fadannihintanemu;
shaakket,
shaakketin inni kidin,
hin inn mahhaawun dinkamannishshan dahenn appat innass daannina.
24 hak ammannetess amm akkan shokkooh naf mahhaawonn heddinkamattenemu;
dinkamadaa,
innass daassaminta;
masmasunshaynenno ikkaant koddinta.
25 "hak ammannetess pahanaatannin inn lel;
sekanneeshsh helpa antu oot appaati pahanaattin kodda male patapahinninu inni lelinu deyina.
26 awsette mahhaawonn dinkamannintan;
amm lamm 'an appa inni dinkamina' kidaawomu.
27 maana maalla,
appat mashshayyess inn hoxsaannin.
iyyat inn hoxsaanniyyu oot inn an hoxsaattenenne iyy kapa deyaawu amaanten maalla kida.
28 appa kapa hensohad husslah qarop dey,
ammannenno husslah allindiinnina appa kapop annina."
29 soolleshiyy illo sedep kiden,
"toare!
ammann paahnatin kodda male patipahinnin lelin;
30 att heikk ufunaataaytenne ikkim aynonno hed kaassatta fadusisa diinniyyu ammann henxufnaann;
semmaalla Mooha kapa deyaayt amaaninkinna."
31 Yesus lamm sedep kid iyyaa mitaattiyy,
"ammann hexamaantenemu?
32 toxare helpa inn mashshmashshayni allpurjaajintan anaah ulli diinnintan deyina,
helpaanettenno ammann hepaen;
hekoddu male oot appat an olle kiyyu maalla amm antu an shokkoohamu.
33 antu maalla sed inni lel,
inn ann olle kinnaattane ikkim andot inni koddintoss kida.
inn husslah qara kishshane rakkot inn qara kiyy;
hekoddu male kokkaadaa,
antu husslahatenn hempushe."