Yesus kamant woynetat
15
1 sekanna Yesus asset kid,
"antu kamant woyneti shaakk;
iyy ukel koyiyyu lamm appaawu.
2 haarra hin an qara kiyy illo dala diinniyy dahenn appaawu quurina allkashina;
haarra hin daliy lamm ikkim lekinninan dalinaness qar ponkina.
3 lel se antu inni lel minann ammann inn iyyaan miil.
4 an olle kinnaadaa;
ananno inn ollenn kinnaanina;
qum haarraan kamant woynet qara kinnaatta diiy mashshaddu dala fotta diinniyyanep,
innanno et an olle kinnaatta diittane amm qunda daatta fottihintanemu.
5 "antu kamant woynetat;
innanno haarra;
hin an olle kinnaanniyyonne ananno iyy olle kinnaanniyyu qunda lek daannina;
an male amm akkan shokkooh naf erkasa fottihintanemu.
6 hin an olle kinnaatta diinniyyu qum haarraatep altaash happamina kokina;
haarra hinep kiyy orqudop qapaminan apitt ilop happaminan illo qassanninan.
7 et an olle kinnaattan lelaawonno inn ila kinnaado,
hin inn hintan dahenn fadadaa,
akkannihintane.
8 et qunda lek daattan soolleshawu koddaayn akkittane,
appaawu sedenn serkisamina.
9 qum appat an hoxsaadepin ananno inn hoxsaad;
innanno hoxsunshawun kallaadaa.
10 qum antu acac appaawu kaysiyy illo hoxsunshayyin kallaanniyyop,
innanno et acacaawu kaysittane hoxsunshawonn kallaannintan.
11 sed antu inni lel ikkim masmasunshiyyu inn ila kinnaannintu,
masmasunshaynenno ikkaant koddintoss kida.
12 acacaawu,
qum antu inn hoxsaadep ikkim innanno orr hoxsaannintaness kida.
13 namat kiyyatayy oot moyshadooyat tarpisa daatta qareell hoxsunt tawtu amm hekishamu.
14 hin antu inn acaciyyu et kaysittane,
inn moyshadaawu kida.
15 oot aylet iyaan poldaadd erkanniyyu ufnaatta diinnishshu maalla,
sedeeshsh amm aylamma inni kidinhinamu;
hekodu male hin antu appaawu qara dakay dahenn oot antu inni akkiyy maalla,
moyishadawun inni kid.
16 an inn pahisad male,
amm inn an pahisademu;
ikkim annintan qunda lek daannintan,
qundaannanno ulla kallaanninanessin inn maakumusiyy.
semmaalla hin inn mahhaawun dinkamannishshan dahenn appaanno innass daannina.
17 semmaalla antu inn acaciyyu,
ikkim orr hoxsaannintaness kida.
Yesus oot qarhittila husslahat ishaam
18 et orr husslah inn qar hittinniyyo,
inn tureeshsh an qar hittisaayy ufunaadaa.
19 heka husslahat kodditan kid,
orr husslah qum hekooyyatep inn hoxsaannaay.
hekoddu male oot inn heka husslah kodda diittenenne antu husslah ketta inn reehad pahisad maalla,
orr husslah inn qarhittinnin.
20 lel se antu,
'amm aylet poldaadd qara tawnaannishshamu' kid inni lel qaapadaa;
et an rakkusiyyane innanno rakkusinninan,
et lelaawu lushadane lelaaynenno lushanninan.
21 oot iyyaa iyy se an hit ufunaatta diiyen maalla,
mahhaawu minann hin dahenn inn qari erkanninan.
22 deyet iyyaa lelan diiy kid,
amm juppot iyyaa koddaatemu;
ammann lamm jupooshaddos akkan iyyaa kidinan amm heqapanemu.
23 hin an qar hittinniyyu appaawu qaranno hittinnin.
24 erkamaan nam pil erkasa diiyin otanshaddu talli erkasa diiy kid,
amm juppot iyyaa koddaatemu;
ammann lamm iyyaa hin dahenn akkenekuless an qaranno appaawu qaranno hittiyyen.
25 sedenno lel se halittaaddu qara,
"patt an qar hittiyyen" kidam tsaafam ikkim kaysaanninoss kida.