Yesus paana appa kapop namin anniyyu
14
1 Yesus,
"mutsuraann baaqura diiyenii,
Mooha amaanaa;
ananno amaanaa;
2 man appaawote por ulla kallaatta ilek kiyy.
sedep kodda diiy kid,
amm 'por inni ulli kallaannintan inni dikkisaassin annina' inni kidinhaayemu.
3 etin aanu por inni dikkiyu kanna,
ikkim innanno por se antu kiyyo kallaannintaness lakkiyyaassin deyina illo inn qeeddannina.
4 por se antu ullop anniyyop paana innin painonno hexuftan."
hekid
5 tomaas lamm,
"polda!
por att ullop annishshu amm henxufnamu;
kat ashshannassin paana se ufunaanninna?"
ikkid.
6 Yesus illo sedep kid immitaattiyy,
"paanot an;
shaakketanno kiyyatanno an;
et an kapin koddu male,
nam appa kapop deyinu amm hekiyyamu.
7 et an ufunaattan kid,
appaawonno ufunaannaaten;
lamm sed kanneeshsh ufunaannihintan,
iyyanno heakkiten."
8 filiboos lamm,
"polda!
appa innu akkiyyii,
innu kayninta" heikkid.
9 Yesus illo,
"filiboos,
antu haka sedeti inn olle kallaatete an ufunaatta diittemu?
hin an akk,
appa akk;
ashshannass att illo,
'appa innu akkiyyii' kidin?
10 antu appa olle shokkooh koddaawonne,
appaanno an olle shokkooh koddaayy amaanishotemu?
lel sed antu inn leliyyu amm isseeshin inni ishaamimu;
hekoddu male hin erkamooyy erkanniyyu,
appa se an olle kallaanniyyu kida.
11 antu appa olle shokkooh koddaawonne appaanno an olle shokkooh koddaayyi an amaanaa;
hin inkinnekul,
oot erkamaawot an amaanaa.
12 shaakket,
shaakketin inni kidin,
nam an amaaniyyu erkamaan antu erkanniyyu erkannina;
sed qareel tawossenno erkannina;
antu appa kapopin annine.
13 appat ikkim imm minan serkisaminoss,
iyaan inn mahhaawun dinkamannishshan dahenn innassin kaysinnina.
14 akkan heikk et mahhaawun dinkamattane antu kaysinninhina."
hekkid immitaattiyy.
Yesus ikkim laaffot miilot deyinoss irraxatet dayy
15 "et an hoxsannishshane acacaawu luushadaa;
16 antu appan dinkamina;
iyyat illo kokkisampayt pil iyy parpar inn olle kallaanninu inni daannina.
17 settenno laaffot shaakketat;
oot orr husslah iyy akkaanne ufunaatta diinniyyu maalla,
amm iyy qeeddatta fottinamu;
inn lamm,
oot laaffot hin inn olle kallaannishshonne inn ila kishshu maalla heufutan.
18 "amm meddaan lemma dapep all inn diinninhinamu;
mitaatinhina inn kapop deyina.
19 helpa qoji kanna orr husslah amm an akkinanemu;
hor inn an akkintan;
oot antu iyy kiyyat qapu kodd maalla,
innanno kiyyatan kallaanintan.
20 antu appaawu olle shokkooh koddaawonne innanno an olle shakkanooh kodddaayn,
ananno inn olle shokkooh koddaawu awi sette ufunaannintan.
21 "nam an hoxsanniyyu,
iyy acacaawu qeeddanniyyu illo erkama qara nakanniyyu kida;
nam an hooxsanniyyu appaawonno iyy hooxsannin;
ananno iyyin hoxsaannin;
iyyassennon ixufnaytinnina."
22 yihuta pil,
se yihuta asqortish kodda diiy,
"polda!
husslahati iakkisa male,
ashshann innu iakkinnint?"
he ikkid.
23 Yesus illo sedep kid immitaattiyy,
"nam an hoxsaanniyyu lelaawu lushannina;
appaawonno iyy hoxsaannina;
innonno kapopin deyinna iyy olle kallaanninna.
24 hin an hooxsatta diinniyyu lamm amm lelaawu lushanninamu;
lel sed inn dakayishshan heka se an hit heka appaat male amm hekaawomu.
25 ammann antu inn olle kiyyo akkan sedin inni lel;
26 kokkisampayt,
laaffot miilot hin appat mahhaawun hitiyu lamm heiket inni kollinnina;
hin antu inni lel dahenn inn mashshi oorinnina.
27 andotin inni diinnina;
andoshawun inni daannina;
andot antu inni daanniyyu amm se husslah inn daanniyyop kishshamu;
mutsuraann baaqura diiyenii;
nahaanno diiyenii.
28 'antu anninhina;
lamm mitaatina inn kapop deyina' kid heddakayten;
oot appaawu an qara tawu maalla,
et an hoxsaannishshan koddo,
appa kapop antaawonn masmasihaaten.
29 helpaan hin koddiyyane ikkim amaanintanessin turi qattiyy inni lel.
30 oot pexashshisampayt husslah seetsanat deyiyyu maalla,
sed kanneeshsh amm inn olle helpa leki ishaamanninhinamu.
amm iyyat an qarin hayyotum heqapamu;
31 hekoddu male ikkimin antu appa hoxsaanniyyonne hin appat an acac dahenn kaysinniyyu husslah ikkim ufunaanninos kida.
sohada are all annu!"