Yesus lukka soolleshayyet jiq
13
1 Yesus serkila faasika ayhuta tureeshsh;
husslah are alldiitta appayy kapop antaass helpaan dehaataaddu ufnaad.
iyyat orr se husslah qara hekooyy kodd hoxsaad;
hak muutaytaatessenno iyyaa hoxsaad.
2 yesusenne soolleshayy eetot dama tureeshsh,
yihuta imm simoon asqorootishsh ikkim Yesus tarpinninu daanninoss taapiloos qaap nayq mutsurooyy qalli haay.
3 Mooha appat heikk qarass hayyotum iddaattaayyenne Mooha kapa deyaayyenne,
lamm ikkim Mooha kapop mitaatinu Yesus hexup;
4 illo eetot qara sohad uuwaat ipata allhaayy illo footsa qeedd surraalleesh hidad.
5 sekanna kuless shomballess haq kishsh illo lukka soolleshay jiqa hir;
footsa se iyyat surraalleesh hidaddin lukkaaddu ushuq.
6 helpaan Yesus simoon se betsiroos kidamiyyu kapin pae betsiroos,
"polda!
hed lukkaawu jiqinamu?"
heikkid.
7 Yesus illo,
"hin antu erkanniyyu att ammann amm hexuftamu;
ukkanna lamm ufnaannihint" ikkid.
8 betsiroos lamm,
"amm att lukkoyyu jiqihintamu!"
ikkid.
Yesus illo,
"etin antu lukkaatt jiqa diiyyo,
amm an olle tarr heqqaftamu" ikkid.
9 betsiroos lamm,
"polda!
et sedep koddo lukkaawooh kodda male,
harkooyyonno,
mashshawonno jiqii!"
heikid.
10 Yesus illo,
"hin ippat jiqad,
dakintayyenno dahenn immiilt,
lukka jiqatta pateeshsh hepil amm iyy fadusinniyyamu;
innanno iyyaan miil;
hekoddu male amm dahetaynennemu" hekid.
11 Yesus,
"amm inn dahetaynen iyyaan miilemu" iyyat maalla kid,
oot iyyat nam iyy taripinninu daanninu aynu koddaayy upu maalla kida.
12 iyyat lukkaaddu jiq kanna uuwaat uuwad porayyep mitaat laiyy illo sedep iyyaa kid,
"hin antu inni erkayy ishshaakikkishshanemu?
13 inn 'kollisampaytanne pold' ani kidin;
settep kidaann shaakket;
qum se inn kidishshanepin kiyy.
14 semmaalla,
etin antu poldanne kollisampayt kodditete lukkaann jiqe,
inn lamm mashshayni lukkoonn olli jijjiqa inn fadusinnin.
15 qum antu inni erkayyep innanno lamm ikkim olli erkannintanessin paahnat inni dayy.
16 shaakket,
shaakketin inni kidin;
aylet amm poldadd qara hetawtamu;
hitaymishshanno amm se iyy hit qara hetawamu.
17 et sed ufunaattan illo erkaman akkittan koddo hehartootten.
18 hin antu ishaamiyyu amm oot dahetaynetemu;
iyyaan antu pahiyy henxup;
hekoddu male,
lel matsaafa miilot hin,
'iiy se damaawu an olle dam olishsh an qari kodd' kidiyyu kaysaatta fadusinnin.
19 hin koddaaddu turann hin antu ammann turiqattiyy inni leliyyu;
et kaysaadan kanna,
antu an koddaawu ikkim amaannintaness kida.
20 shaakket shaakketin inni lelin;
nam iyy se antu hitiiyu qeeddanniyiu an qeeddannin;
nam an qeeddanniyyonno se an hit qeeddannin."
Yesus nam iyy tarpinninu daanninu turiqatta lel
(mati. 26,20-25; mar. 14,17-21; Luqaa. 22,21-23)
21 Yesus sed kid kanna ikkaaness baaquur illo,
"shaakket,
shaakketin inni kidin;
inn ila ishokku an tarpinnina daannina" kid patpahiyy lel.
22 soolleshiyy ikkim iyyat oot opaayinu leliyyu ufunaatta diittaaddonn orr il tottooyen.
23 soolleshayy ila iyy se Yesus iyy hoxsaanniyyu,
Yesus kapass laiyy.
24 simoon se betsiroos kidamiyyu inda ishiibiyy illo,
"oot opaaynu ikkim ishaamiyyu intu qara kaassado" ikkid.
25 iyyat illo Yesus kettaash kidd,
"polda,
iyy hed tarpinninu daanninu ayno?"
kid kaassad.
26 Yesus illo,
"nam se antu moossannat laaqqot sed wotsatin qappanniyyu emmashshinniyyu iyy" ikkid.
moossannat settenno wotsatin qappad illo yihuta meet simoon asqoritishshi emmashshiyy.
27 yihutot moosannat se qeeddade,
esseteeh seetsanat qallep kal;
Yesus illo yihutaass,
"iyaan att erkasa qaapatt shakar kid erkayyii!"
ikid.
28 ikkim maana maalla Yesus sedep kid,
hin dama qara kiyy ila nam qall ishaak amm hekiyyamu.
29 oot yihutot kodashshet qapampayt kodd maalla,
soolleshayy ila karatiddu afa Yesus,
"iyaan serkila faasikaat innu fadusinniyy piddi" shokke "hiyayya kodashshet dayyii" ikidep ikkinnaatt.
30 yihutot illo moossannat se qeeddatta olle esseteeh sohad taw;
essete lashsh awadda kida.
acac awshitt
31 yihutot sohad taw kanna Yesus sedep kid,
"ammann meet nam heserkisam;
iyy minann moohaanno heserkisam.
32 et Moohot iyy minin serkisamo,
moohaanno mashshayyess meetaayy serkinnina;
olatta male iyy serkinnina.
33 meddoot,
helpa qojeseehin inn olle kinnaannina;
innanno an kanni fadintan.
qum se antu hayyot ayhutaati,
'por se antu anniyyop amm deya fottihintanemu' kidep,
ammann innassenno sedepin kidin.
34 ikkim mashshmashshayni orr hoxsaannintaness acac awshittin inni daannin:
qum antu inn hoxsaadep innanno mashshmashshayni orr hoxsaadaa.
35 et mashshamashshayni orr hoxsaattane,
soolleshawu koddaayn namat dahenn ufunaannina."
Yesus ikkim betsiroos iyy marmanninu lel
(mati. 26,31-35; mar. 14,27-31; Luqaa. 22,31-34)
36 sekanna simoon hin betsiroos kidamiyyu yesusess,
"polda!
ahop annint?"
ikkid.
Yesus illo,
"por se antu anniyyop amm ammann ann kanni deya fottihintamu;
hor ukanna an kannass deyint" heikkid.