iskattet se Yesus shittotin roopit
(mati. 26,6-13; mar. 14,3-9)
12
1 serkila faasika ayhutaati lashsh leh hatte,
Yesus pitaaniyaap aan;
pitaaniyot paat alaasaar se Yesus toxt ila sohashshiyet.
2 ullaass eetot idikkisant,
illo maart eetot sett idehatt;
alaasaarenno orr se Yesus olle eetot dama laiyy ila nam shokku kida.
3 essete maariyaam shittot sommat heriyatidd tsor,
qoyr shokku nartoos kidamiyyu ila soorumant pak litrot koddaat qeeddit illo lukka yesusin roopit,
mashshaddennenno uushuqit,
man settenno dinnahunt shittot settetin innaakkood.
4 soolleshayy ila ishshokku hin yihuta asqoritu kidamiyyu Yesus tarpinninu daanninu,
5 "shittot hin maanaass tinaaret tseet halpatti kashama illo kodashshet hin hiyayya daassama diitt?"
hekid.
6 iyyat sedep kid,
oot iyyat kera kodd lamm okolet kodashshet qapiyyu illo kodashshet se qara qeeddataa kolli maalla male amm hiyayya qaapattannemu.
7 Yesus lamm asset kid,
"oot it iyaan lashsh mookaawot koddin miskitt maalla,
all it diiyyaa;
8 hiyayya helpa mitt inn olle kiyyaanninan;
antu lamm amm helpa mitt inn olle kiyyaannihinamu."
9 orr ayhuta ila lamm siip lek Yesus pitaaniya kinnaattaayy ufunaaden deyen;
iyyaa deyen Yesus maallaah kodda male,
alaasaar se iyyat toxt ila sohashshiyy tooyaassenno kida.
10 kaadayya suukamma lamm alaasaar ikasaass suladen.
11 maana maalla,
oot orr ayhuta ila iyyaan lek iyy minann Yesus kapop anniyyan amaaniyyan maalla kida.
Yesus serka kaanenn yerusaalemep kal
(mati. 21,1-11; mar. 11,1-11; Luqaa. 19,28-40)
12 paarreshadde orr lek iyyaan serkila faasikaat dey Yesus yerusaalemep deyaalle kiyyattaayy dakayen;
13 lappa qilaxat qapaden mineell aanen illo,
"hoosaayna!
Daam israaelet hin mahh poldatin deyiyyu iqoram!"
kidin ullupin.
14-15 qum it,
"yent tsiyoon sapara yerusaalem,
huura diiyii!
toare,
daamaatt ookka harret qarass laina deyina" kidant tsaafant qarass Yesus ookka harret akkad illo qari laiyy.
16 turaqattaass soolleshiyy amm sed heishshaakenemu;
hekoddu male helpaan iyyat moontallel serkan sohade ikkim ishaama hin ootaayy tsaafamennenne,
iyyi erkawsamen immashshioorsaden.
17 helpaan Yesus alaasaar poosaalle hemb toxt ila sohashshiyye orr hin iyy olle kiyy dahenn sohataayy ishaamin.
18 orr lek hin nam shamusinniyy iyyat erkayy oot iyyaa dakayen maalla,
iyy akkaass sohaden.
19 semmaalla faraset,
"toare,
siipat dahenn iyy kanni oor;
ikkim innu akkan shokkooh naf erkasa fotta diinninu akkikkishshanemu?"
olli kikkiden.
20 orr se helpa serkilaanettete Mooha shoomatta yerusaalemep aan ila shakkan orr kiriket kida.
21 iyyaanno filiboos se kelilaalle nam peetesayta kodd kapop dehaaden illo,
"polda,
Yesus akkan fadin" kiden.
22 filibos illo aan intiryaasi lel;
intiryaasenne filiboosenno ollin aanen illo Yesus lelen.
23 Yesus illo sedep kid iyyaa mitaattiyy,
"toare saatet meet nam uqqalli serkisaminu hepait;
24 shaakket shaakketin inn kidin;
qunda kaappa et hussalli pea illo toya diiyyane,
mashshaddoss ullihatin;
et toyne lamm qunda lek daannin.
25 nam kiyyatayy hoxsaanniyyu allpatinnina;
nam husslah qara kiyyatayy qar hittinniyyu lamm hak parparatess kiyyatayy lushannina.
26 nam ani erkasa fadiyyu he an kanni deyu;
por se antu kiyyo erkamampaytaawonno ulla kinnaannina;
nam se ani erkanniyyonno appat serkinnina."
Yesus toxtanne rakkot se iyy qari deyintu ishaam
27 ukannass Yesus sedep kid,
"toare,
mutsuraaw baaquriyyan;
maanan kidina?
'appollo!
helpayn kela an diniyyin kidinamu?
' iyyekku;
antu dey,
rakkot helpaynetess kida.
28 apollo,
mahhayt serkiyii."
sekkanna nass,
"mahhaawu henserkiyy,
ammannenno serkinninhina!"
kidiyyu moontalleett dey.
29 helpaan orr hin ulli el sed dakayene,
" hin hordanapa!"
kiden.
orr shokku lamm,
"hitaymishsh Moohaat iyyi ishaam!"
hekiden.
30 Yesus lamm sedep kid;
"nass hin inn maalla dey male,
amm an maallaamu;
31 helpaan horat husslah qari quuramintu ammann kida;
pexashshisampayt husslah seetsanat altaash all kashaminu ammann kida.
32 etin antu husslah qara erreel qeeddamo,
nam heiketin issep tishina."
33 Yesus sed ishaam,
toxt ashshann kishshonn ikkim toyinu akkisaass kida.
34 orrat lamm,
"ikkim kristoos hak parparat kallaanninu halitt qara hendakayn;
att ashshann 'meet nam erreel qeeddama iyy fadusinnin' kidin?
hin att meet nam kidishshu ayno?"
hekiden.
35 Yesus illo,
"helpa qojess attumat inn olle kinnaannint;
poorinnat inn qari paxa tura attumat inn olle kishsho mimmitaataa;
hin poorinnatin mimmitaatiyyu ahilop ikkim anniyyu amm heupamu.
36 ikkim meedda attumat koddintaness,
attumat inn olle kishsho attumat sed amaanaa."
iyyaa kid.
iyyat sed ishaam kanna heaan illo iyyaa turi tawwad.
amaana diitta orr ayhuta
37 Yesus shammot lekit iyyaa turi erkayy nafenno orr ayhuta amm iyy heamaanenemu.
38 hin maalla kodden,
lel hin isaayaas himampayt,
"polda,
maanyetumaaynu aynu amaan?
irrot Mooha aynoss akkaatt?"
kid ishaam ikkim kaysaanninoss kida.
39 semmaalla amm amaana hefottenemu.
sedenno qum isaayaas ammannenno,
40 "ikkim iyyaa indaaddonn inxakkin,
mutsuraaddonnenno qall iqaapannin illo immitaatinessenne iyyat iyyaa indininniness Moohot indaaddu alljooliyy;
mutsuraaddonno iiji kod."
kid lelep kida.
41 isaayaas,
oot iyyat serka kristoos akk maalla sedep kid,
ootaayyenno ishaam.
42 et koddonno maakamma ayhuta ila orr lek Yesus hexamaanen;
hekoddu male faraset man dinkamaaddu talla all iyyaa arisa tura huuraann amm patihepahiyen ootaayy hexishaamenemu.
43 iyyaa maalla huuren,
serkaan Mooha kapa akkaanniyy qareell oot iyyaa serkaan nam kapa akkaanniyy hoxsaaden maalla kida.
44 ukkannass Yesus nassayy erri qeedd illo sedep kid,
"nam an amaaniyyu an amaanaaha kodda male,
iyy se an hitenno amaanin;
45 nam an akkiyyu se an hitenno akkin;
46 nam an amaaniyyu dahenn ikkim poorinat ila inkallaanninessin antu attumat koddi husslah qarop dey.
47 nam lelaawu dakayiyyu illo erkama qara nakasa diinniyyu,
iyy horat qari quurinu amm anamu;
antu dey,
husslah dinisaas male,
amm husslah qari horat quuraassemu.
48 nam an qar hittinniyyu illo lelaawonno qeeddatta diinniyyu qarass iyy horat quurinu kiyy;
lel se antu ishaam mashshayy lashsh muutaytaate horat iyy qari quurina.
49 amm antu isseeshsh henxishaamemu;
se antu leliyyonne ishaamiyyu Mooha appa ana acac.
50 acacaayyenno iyy kiyyat parpar daanniyyu koddaay henxup.
semmaalla hin antu ishaamiyyu iyaan appat ani lel kida."