toxt alaasaar
11
1 nam shokku alaasaar kidamiyyu pitaaniyya kallaanniyyu baaq.
pittaaniyot paat maariyaamenne kafitteshadd maart ulla kallaaniyan kida.
2 maariyaam it se shittootin lukka pold roopit mashshaddennenno ushuqit kida;
alaasaar hin baaq alawaadd.
3 semmaalla alawutaddaayy,
"polda,
moyshaatt baaqiy" hekiden Yesus hitaym hiten.
4 helpaan Yesus sed dakaye,
"baaq hin ikkim meet Mooha inserkisaminu maalla serka moohaatess male amm iyy ikasaassemu" hekid.
5 Yesuset maartanne maariyaamenne alaasaar hoxsaanniy.
6 hekoddu male helpaan iyyat baaqayy dakaye,
por se iyyat kiyyos lashsh lakk olad.
7 sekanna soolleshayyess,
"yihutaap qaraashsh mitaatinaa" kid.
8 soolleshiyy illo,
"kollisampayt!
orr ayhuta helpa qoj tureesh dakan hed reepa faden,
att lamm ammanenno ullop mitaatinta annintamu?"
ikiden.
9 Yesus lamm sedep kid iyyaa mitaattiyy,
'kallapat saatet hundan lakk qaft inhinemu?
nam kallap mimmitaatiyu oot iyyat attumat husslah akkiyyu maalla,
amm kohaytisamiyamu.
10 nam hin awodd mimmitaatiyu lamm oot iyyat attumat dap maalla kohaytisamiyy."
11 Yesus sedep kid kannakuless,
"moyshaannu alaasaar hepexad;
hekoddu male antu peot ila iyyaa hayisaassin annina" hekid.
12 soolleshiyy illo,
"polda!
et peadu koddo hedikk" kiden.
13 Yesuset sed ishaam,
oot toxt alaasaaret kida;
iyyaass lamm afa oot peot ishaamepa ikinnaaden.
14 semmaalla Yesus patpahiy sedep iyyaa kid,
"alaasaar hetoy;
15 ikkim amaanintaness,
ulla kinnaatta diittaawoonn ootaayness henmasmas;
hekoddu male iyy kapop annaa!"
16 helpaanete tomaas hin titimoosa kidamiyyu soollet shakkanass kide,
"innonno annaa,
iyy olle raawinaa ."
Yesuset toxt ila sohattaanne kiyyat
17 helpaan Yesus ulla paiye alaasaar mookameeshsh lashsh afur kaysiyy
18 pitaaniyot yerusaalem ketteesh kilometret halpattap kishshu sekaannin.
19 orr ayhuta ila iyyaan lek alawaaddu toy maalla maartanne maariyaam kokkisa iyyaa kapop dey.
20 helpaan maart Yesus deyaayy dakayte iyy turop sohatt;
maariyaam lamm tallas hatt.
21 maart yesusess kidite,
"polda!
are kishsh kid,
amm alawaawu toyaayemu.
22 hekoddu male ammanenno ikkim Moohot hin att dinkamannishu dahenn hed daanninu henxup."
23 Yesus illo,
"alawaatt toxt ila sohannina" it kid.
24 maart lamm,
"lashsh muutaytaate helpa toxt ila sohataate ikkim sohanninu henxup" hekidit.
25 Yesus illo,
"toxt ila sohattaanne kiyyat an;
nam an amaaniyyu et toyu nafenno,
kiyyatann kallaannina.
26 nam kiyyatin kiyyu illo an amaaniyyu dahenn amm apure toynamu;
sed amaannikkishshamu?"
it kid.
27 it illo,
"heye polda!
att kristoos se husslah qarop deyna kidam,
meet Mooha koddaayt amaaninkiy" ikidit.
28 maart sed ishaant kanna hexant illo maariyaamess,
"kollisampayt hedey illo hed fadin" hekidit deketi hembit.
29 helpaan maariyaam sed dakayte shakar kidit sohatt illo iyy kapop ant.
30 essete Yesus por se maart iyy akkite kiyy,
amm paattaallep hekalemu.
31 orr ayhuta hin it kokkisa dey ulla kiyy helpaan maariyaam shakar kidit talla sohatt iyyaa akkene,
afa poosa qari pooya annishshop iyyaa kinnaatt,
iyyaa illo kanni sohaden.
32 helpaan maariyaam por se Yesus ulla kiyyop ant iyy akkite,
lukkaayy kelas sunkit illo,
"polda,
are kishsh kid,
amm alawaawu toyaayemu" ikidit.
33 helpaan it pooyishshonne orr ayhuta hin it olle dey pooyiyan Yesus akke,
ikkaanes dappiyy illo iddoohan,
34 "ahas mookiten?"
kid.
iyyaa illo,
"polda!
hooy tooy" ikiden.
35 iyyat lamm pooy ilmama qay.
36 essete orr ayhuta,
"ikkim iyyat ashshann iyy hoxsaanniyyu tooyaa!"
hekiden.
37 lamm iyyaa ila orr shokku,
"iyy hin inda indamala qahiyy,
ikkim nam hin toya diinninu koda fotta diinnaayemu?"
hekiden.
Yesus alaasaar toxt ila sohashiyy
38 Yesus ikkaani dappitete poosa qarop aan;
poosanettenno waashsha dakan tur duham kida.
39 Yesus,
"daka se allqeeddaa!"
kid.
alawut imm se toy maartat illo,
"polda,
iyyat toyeeshsh lashsh afur kaysiy;
ammann foolina" ikidit.
40 Yesus lamm,
"et amaanto,
serka Moohaat akkinta antu hedess inkidinemu?"
it kid.
41 semmaalla iyyaa daka sett allqeedden;
sekannakules Yesus erreel tooy illo,
"appoo!
oot att ani dakayt maalla hedin aypisannin.
42 helpamin ikkim ani dakaynintu henxup;
hekoddu male orr hin ari elli att an hitaayt ikkim amaaninanessin sedep kid" hekid.
43 Yesus sedep kid kanna,
"alaasaar!
hooy sohadu!"
hekid nass kaanin hemb.
44 alaasaar se toyenno harkooyyanne lukkooyy hin ushuqamen poosa kela sohad;
miintayyenno uuwaat op insirenen kishsh;
Yesus illo "furiyyaa allhayyaa hexaanu!"
iyyaa kid.
sulat Yesus qari sulant
(mati. 26,1-5; mar. 14,1-2; Luqaa. 22,1-2)
45 orr ayhuta hin maariyaam kokkisa dey ulla kiyy ila iyyaan lek hin Yesus erkayy akken illo iyy amaanen.
46 shakkan lamm faraset kapop aanen illo hin Yesus erkayy iyyaa lelen.
47 semmaalla kaadayya suukammaatenne faraset arfayta orqudop qapen illo,
"oot nam hin shammot lekit erkanniyyu maalla,
ashshann koda innu hedikk?
48 etin all iyy diinno,
namat dahenn iyy amaannina;
orr roomaatenno deyinan illo man miiloshaynotenne siipaaynnu dahenn allpatinninan."
kiden
49 hekoddu male iyyaa ila ishokku iyy par sette suuka suukamma kodd qayyaaff kidamiyyu sedep kid,
"inn amm akkan heufutanemu.
50 siipat dahenn pata kapa et nam shokku oot siipat toy kid iaaku koddaayy amm qallheqaapattenemu kidaamu?"
51 iyyat sed ishaam,
amm isseeshsh qeeddaannemu;
hekoddu male oot iyyat par sette suuka suukamma Mooha kodd maalla,
Yesus oot siipat ikkim toynu akkisaass him sed lel.
52 iyyat toynu oot orr ayhutaatesseeh kodda male,
meedda Mooha hin allpurjaaj shakkanooh koda orrqudi qapaass kida.
53 semmaalla awseteeshsh hiren Yesus ikasa suladen.
54 sekanneesh Yesus amm otant ayhuta ili hexakkaad mimmitaatemu;
hekoddu male paat se efrem kidamiyyu soyu kapaa kiyyop aan;
soolleshayy olle ulli olad.
55 serkila faasika ayhutaatenno dehaaden illo serkila faasika sett paxa tureesh,
por poreeshsh orr lek immiilisa yerusaalemep aanen;
56 illo Yesus ullop deyaayy luushatete man miilot alt ellen,
"maana qaapannin?
afa por serkilaatep deyinop inni kinnaanimu?"
kidin orr kakkassannin.
57 lamm kaadayya suukammaatene faraset ikkim Yesus qapa fottinanes,
por iyyat ulla kiyyu nam upu et kinnaado ikkim iyyaa lelinoss acacen.