Yesus shinkayt dikk
10
1 ukkannass Yesus sedep kid,
"shaakket shaakketin inni kidin;
nam qaad helemma tallop harratallin kodda male por pilin kaliyu keraanne ewwa.
2 hin harratallin kaliyu lamm shinkayt helemmaat.
3 harrat lushampayt iyyass qahinnin;
helemmaanno nassaayy dakayn;
iyyat illo helemmaayy mahhaddonn hembin altaash sohashshinnin.
4 et helemmaay altaash sohashshiyu kanna,
turass qattin annin;
oot helemmayy nassaayy upan maalla iyy kannass annin.
5 lamm oot iyyaa nass orr pil ufunaatta diiyen maalla,
ketta allifeelannin male,
amm kanni anniyanemu."
6 Yesus paahnat sed iyyaa lel;
hekoddu male iyyaa hin iyyat ishaam amm qall heqaapadenemu.
7 semmaalla,
Yesus qarxoor sedep iyyaa kid,
"shaakket shaakketin inn kidin;
antu harrat qaad helemmaat;
8 hin an tureesh dey dahenn keraanne ewwa kida;
hekoddu male helemma amm iyyaa kap hedakayenemu.
9 harrat an;
hin poraawun kaliyu dinannina;
kalina;
sohannina;
por ulli shikisamaatenno akkannina.
10 kerot deyiyyu,
hashaasenne qalaassenne allpatisaass kida;
antu lamm ikkim kiyyat akkanninanessenne kiyyat hin ipurintossin dey.
11 shinkayt dikk an;
shinkayt dikk oot helemmaayyatess kiyyatayy taripinin daannin.
12 shinkayt hin piddama piddam oot helemmaan hekkaayy kodda diiyen maalla,
helpa sessepa deyan iyyat akko,
helemmaanett alldiinnin illo feelannin;
sessepaanno helemmaanett ponqin allipurjaajusinnin.
13 shinkayt hin maalla feelanniyu,
oot iyyat piddama piddam illo helemmaanett qaapatta diinniyyu maalla kida.
14 shinkayt dikk an;
antu helemmooyyu henxup;
helemmaawonno an heupan.
15 qum appat ann upu ananno iyy upopin helemmoyyu up;
antu oot helemmoyyotess kiyashawun tarpinnina daannina.
16 helemma pil iyyaan heelt sed ila kinnaatta diiyin qapa;
iyyaannenno deya an fadusinnin;
iyyaa nassaawu dakaynan heelt shakkaah koddinan;
shinkaytaaddonno shokkooh koddina.
17 "oot antu kiyyashawu mitaattisa qeedatta daanniyyu maalla,
appat an hoxsaannin.
18 kiyyatawu hoxsuntawonnin daannina male,
nam an qara qeedanninu amm hekiyamu;
kiyyataw daattaassenne mitaattisa qeedattaass hayyotumin qap;
ikkimin sedep kodinoss appaawu an acac."
19 ammannenno ishaamayn minan otant orr ayhuta ila reehaytet kodd.
20 iyyaa ilanno orr lek,
"qayy iyy qara kiyy,
yaariy;
maanaas iyy qara dakayin?"
hekiden.
21 orr shokku,
"ishaamayn amm iyaan nam qayyat qara kiyyu kapa sohanniyamu;
qayyat inda indamala qahisa fottiyyamu?"
hekiden.
amaana diitta ayhuta
22 helpa serkila awshum man miilot heka yerusaalem paiyy;
helpaanettenno kashanna kida.
23 Yesus man miilot talla por tarpanta salamonetenn mimmitaatin.
24 helpaanette orr ayhuta iyy kapass orrqudop qapamen,
"hak awametess shuttuttan innu olashinninta?
sho kristoos koddite,
pata pahiyii innu lelii" ikkiden.
25 Yesus sedep kid iyy mitaattiy,
"antu innass henlel;
innat lamm amm amaanikkishshanemu;
erkamaan antu mahh appaawotin erkanniyyu ootaawu maanyetumin.
26 oot inn lamm heelt helemmaawu ila kodda diitten maalla amm amaanikkishshanemu.
27 helemmaawu nassaawu dakayiyyan;
antu iyyaa henxup;
iyyaanno an kannass deyin.
28 antu kiyyat parparatin iyyaa daannina;
semmaalla amm apure patinanemu;
harkaawu qalle aynonno iyyaa passisatta qeeddatta amm fottinamu.
29 appaawu se iyyaa an dayy heikk qara tawa.
amm aynonno hark appaawu qalle iyyaa passisatta fottinamu.
30 appaawonne an shakkanaah."
31 helpaanette ayhutet Yesus reepaas ammannenno dakalla qeeddaden.
32 Yesus illo,
"erkama lek iyaan dikkin appawu kapa inni akkiyy;
kat hin ila oot erkama hekannetess an reepintan?"
iyyaa kid.
33 iyyaa lamm,
"innu maalla hed reepinnu oot att lel otitta Mooha qari lelishu maalla male,
amm oot erkamaan dikkatessemu;
sedenno oot att nam kodditete Mooha ikkodishu maalla kida" hekiden immitaattiyen.
34 iyyat illo,
"halittaayn qarass,
'inn moohada henkid' hin kidishu intsaafaminemu?
35 lamm matsaafa miilot all oohaass amm fottamintamu;
orr se lel Mooha iyyaa deyess et matsaafa miilot 'moohada' kidu hembo,
36 kat iyy se appat reeh illo husslah qarop hit,
oot iyyat,
'antu meet moohaat' kid maalla,
inn maanaass,
'mooha qarass otitta lelin' ikkidin?
37 etin antu erkama appaawu erkasa diinniyyu koddo,
an amaana diiyyaa.
38 etin erkama appaawu erkanniyyu koddo,
punu et an amaana diittane,
erkamaawu naf amaanaa;
paana sedenn appat an olle shokkooh koddaayyenne ananno appa olle shokkooh koddaawu dikkinnihintan ufunaannintan."
iyyaa kid.
39 iyyaa illo lakkiyya iyy qapa faden;
iyyat lamm harkaddu kela passad taw.
40 sekanna lamm Yesus lakkiyaas haq yortaanos qara tarp por se yewannis turaqatta ulli ahaliniyop aan illo ulli olad.
41 orr lekenno iyy kapop deyen illo,
"yewannis amm shammot shakkaah naf hexerkayyemu;
hekoddu male hin yewannis oot nam sedet ishaam dahenn shaakket" kiden.
42 ullaassenno orr lek iyy amaanen.