Yesus nam indamala kodd dalad diniyy
9
1 helpaan Yesus ullin tarpiyyo nam indamala kodd dalad akk.
2 soolleshiyy illo sedep kiden iyy kaassaden,
"kollisampayt!
juppot opaaynu minan nam hin indamala kodd dalad?
kat juppotayyemu shoke juppot lemmooyy minanne?"
3 iyyat lamm sedep kid iyyaa mitaattiy,
"erkama Mooha ikkim iyy qari akkaanninanes male,
amm iyy shokke lemmooyy juppot erkayyemu.
4 lashsh kishsho erkama iyy se an hit erkasa an fadusinnin.
awaddat aynonno uqqalle erkasa fotta diinninu deyina.
5 antu husslah qara kiyyo,
antu attumat husslahat.
6 helpaan iyyat sedep kid kanna,
hussalless ambushsh shuh,
indonshoor illo jooqqaanettin inda indamalaanett il roop illo
7 ikide,
"aanii,
hartot selihom ili jiqadu."
(selihom kidot "se hitam" kida.)
nam settenno hexaan jiqad illo indaan lak akkiyyin mitaat.
8 qahhittayyenne orr helpaan iyyat qasiyanniyyo iyy up,
"hin appa se paana kap lainniyyu qasiyyanniyyu inhinemu?"
kiden.
9 orr karatiddu "iyyipa" hekiden.
orr shokku lamm,
"iyy paahnaannin male amm iyyemu" hekiden.
iyyat illo,
"anpa" kid.
10 iyyaa lamm sedep kiden iyy kaassaden,
"indaatt ashshann lak akka fotten?"
11 iyyat illo,
"appa se op Yesus kidiyyan jooqqa soorum indaaw qarin ani roop illo ikkimin selhomep anninu jiqanninu ani lel;
antu aan jiqad illo lak akka fott."
kid iyyaa mitaattiyy,
12 iyyaa lamm "nam hin aha kiyy illo?"
hekiden iyy kaassaden.
iyyat illo,
"amm antu henxupamu" kid iyyaa mitaattiy.
faraset nam se indaayy dinaden kaassaden
13 orr settenno nam se turin indamala kodd faraset turop dehayyen.
14 lashsh hin Yesus uqqari inda indamalaanett qar jooqqan roop iyyat illo dinad sampata kida.
15 semmaalla faraset ikkim iyyat ashshann lak akka fott lakkiyya iyy kaassaden,
iyyat illo,
"indaaw qar jooqqan ani roop illo antu jiqadekul lak akk" hekid iyyaa mitaattiy.
16 essete faraset ila karatiddu asset kiden,
"nam hin oot iyyat lashsh sampata luushatta diinniyyu maalla,
amm nam moohaatemu."
orr shakkan lamm asset kiden iyy kaassaden,
"nam juppampayt kodd ashshann iyaan hinep nam shammusinniyy erkasa fottaay?"
hekiden.
seminann olli sena diiyen.
17 semmaalla,
indamalaan dinad kapop mitaaten illo,
"oot appa se indaatt diniyyetess amman att maana kidin?"
ikiden.
nam hin illo,
"iyyat himampayt" kid iyyaa mitaattiy.
18 orr ayhuta haka lemmooyy hembusinninan kaassanninaness indamala koddaayyenne ukanna lamm akkaayy amm hexamaanenemu.
19 semmaalla asset kiden lemmaayy kaassaden,
"meetaayn se inn indamala kodd dalad kidishshan,
hin iyyemu?
ashshann kodd lak akka fott?"
20 lemmaayy illo,
"meet hin meetaaynu koddaayyenne indamala kodda dalattaayy henxufn.
21 hekoddu male ikkim iyyat amman ashshann lak akka fottenne ikkim aynot inda iqqahiyy amm henxufnamu.
oot iyyat namaxashitt kodd maalla,
iyy kaassadaa innass lelina."
hekiden immitaattiyen
22 lemmaayy sedep kiden,
orr ayhuta tura huuraan kida.
helpaanette orr ayhuta nam,
Yesuset "kristoos" kidiyyu man dinkamaaddu talla all kann arisaass suladen
23 sed maalla kida lemmaayy,
"iyyat namaxashitt,
iyy kaassadaa" kiden.
24 lakkiyyaass lamm nam se indamala kodd dalad hemben illo,
"Mooha serkiyii,
nam hin juppampayt koddaayy innu henxufn" ikkiden.
25 iyyat illo,
"nam hin juppampayt koddaayy amm antu henxupamu.
hor antu turann idamala koddaawu,
ammann lamm lak akkaawoohin up."
he iyy kid.
26 iyyaa lamm,
"maana hed kod?
ashshannass indaatt hed qahiyy kat?"
hekiden iyy kaassaden.
27 iyyat illo,
"innass henleli,
inn amm hedakaytenemu.
maanaass lakkiyya dakaya faditen?
innanno soolleshayy kodda hintanemu?"
heikkkid.
28 iyy illo sedep kiden iyy oten,
"hed soolleshayy!
innu soollet muus!
29 Moohot muus olle ishaamattaayy henxufn male,
ikkim nam hin aha dey amm henxufnamu."
30 nam hin lamm asset iyyaa kidd,
" ikkim nam hin aha dey ufunaatta diittaann nam shamusinnin;
hekoddu male iyy indooyyu qahiyy.
31 Moohot dakayiyyu,
nam iyy serkinniyonne hasaayy kaysinniyyu qara male ikkim dinkam juppampayya dakaya diinniyyu innu henxufn.
32 nam indamala kodd dalad ila inda qahisamen iyyat lak akk kidot,
amm apure hedakaysamaademu.
33 nam hin Mooha kapa deya diiy kid,
amm akkan shokkooh naf koda fottaayemu."
34 iyyaa illo,
"hed juppotin innaakod dalad,
innu kollinninamu?"
ikkiden man dinkamaaddu talla all iyy kann ariyen.
indamalum mutsura
35 helpaan Yesus nam se iyyat diniyy man dinkamaaddu talla kann arisaaddu dakay illo iyy akke,
"meet nam amaanikkishshamu?"
heikkid.
36 nam hin illo,
"polda,
ikkimin amaaninos iyyat ayno?
an lelii amaaninhina."
ikid.
37 Yesus lamm,
"iyy heakkiti,
hin ammann hed olle ishaamiyyu iyy" he ikid.
38 nam hin illo,
"polda,
amaaninhina" kid ishoomad.
39 Yesus lamm,
"orr akkiyyu ikkim indamala koddinan,
lamm indamala ikkim akkinaanessin antu are husslah qarop horat quura dey."
hekid
40 faraset iyy kapa kiyy ila karatiddu ishaamaayy dakayen illo,
"maana kidaayte?
kat innonno indamala koddaaynomu?"
ikiden.
41 Yesus lamm,
"et indamala kodditan kid,
amm juppot inn koddaatemu,
hekoddu male oot inn akkinkinn kidishan maalla juppampayya kodditen."
he iyyaa kid.