iskattet se arpaluma minan qapant
8
1 sekanna Yesus utet ekertaddaatep aan.
2 paarreshadde tuqqan etikelayan man miilotatep mitaat dey illo siipat dahenn iyy kapop deyen;
iyyat illo lahilaxiy iyy kollisa hir.
3 kollisampayya halittatenne farasetanno iskattet arpalumishsho qapantenn iyy kapop deyen illo otant siip qalli ellashshiyen.
4 illo yesusess sedep kiden,
"kollisampayt,
toare,
iskattet hin arpalumishsho qapant.
5 iskattet sedep kishshu ikkim dakallan reepaman toyintoss muuset halittaayinu qarass heacac.
att ootaaddess maana kidin?"
6 iyyaa sedep maalla kiden,
akkan iyyaa iyyin kasasinan iyy kapa akkatta fadaan kida;
hekoddu male Yesus lahaat kidd illo qemaajjit harkayyetin huss qari tsaafa hir.
7 helpaan iyyaa qar oxooren kaassadene erreel pah illo,
"otanshayin ila nam juppot dap turaqatta dakan it reepu!"
kid.
8 lamm lakkiyya lahaat kidd huss qari tsaaf.
9 helpaan iyyaa sed dakayenekules qimaayaashsh hiren dahenn shokku shokko sohaden all aanen;
illo yesusenne iskattet se ulli elliteeh ulli haten.
10 sekannakuless Yesus erreel pah illo,
"yent inant,
deehampayyaatt aha kiyyan?
nam hed qari horat quur inkiyyomu?"
ikid.
11 it illo,
"polda!
nam shokkooh naf amm hekiyyamu" ikidit;
iyyat illo,
"amm ananno hed qari horat quurinhinamu;
aanii,
sedeeshsh qari oorra juppot erkasa diiyii" ikid.a
Yesus attumat husslahat
12 Yesus lakkiyyaass kide,
"antu attumat husslahat;
nam an kanni anniyyu dahenn attumat kiyyatat akkannina male,
amm poorinnat il mimmitaatinamu"
13 faraset lamm,
"oot att issess maanyetumishshu maalla,
maanyetumaatt amm koddiyyamu" he ikiden.
14 Yesus illo sedep kid iyyaa mitaattiy,
"etin antu issess maanyet koddonno,
por antu ulla deyenne ullop anniyyu oot antu upu maalla,
maanyetumaawu shaakket;
inn lamm por antu ulla deyenne ullop anniyyu amm heufutanemu.
15 inn qaap sohaatenn horat quurin;
antu amm nam shokkoh naf qari horat quurinkiyyamu.
16 etin horat quuru nafenno,
oot appa hin an hit an olle kiyyu illo an shokkooh horat quura diinniyyu maalla,
horat antu quuriyyu shaakket kida.
17 maanyetum nam lakk shaakket koddaayy halittaayn qarass hetsaafant.
18 semmaalla antu issessin maanyet koddin;
appa an hitenno maanyeshawu."
19 helpaanette iyyaa,
"appaatt aha kiyy?"
hekiden iyy kaassaden.
Yesus illo,
"ananno koddo,
appaawonno amm he uftanemu;
an ufnaaten kid appaawonno ufunnihhaannaaten" kid iyyaa mitaattiyy.
20 Yesus lel sed ishaam,
helpaan iyyat man miilot talla,
saatsinet daayy kapi ell kollinniyyo kida.
hekoddu male oot sanu helpaayy paisa diiyyen maalla,
amm namat iyy heqapemu.
ittur toyatta oot amaana diittaat lelam
21 Yesus lakkiyyaass sedep iyyaa kid,
"antu anninhina;
innanno an kann fadintan;
hekoddu male juppotaynenn raawintan male,
por antu anniyyop amm deya fottihintanemu."
22 hayyot ayhuta illo,
"por se antu anniyyop amm deya fottihintanemu' kidaayy kat ixikasaassemu?"
olli kikkiden.
23 iyyat lamm ukannass,
"inn heka lahat;
antu lamm heka errat;
inn heka husslah sedet;
antu amm heka husslah sedetemu.
24 "antu an"b koddaawu et amaana diittane,
oot inn juppotaynin raawintan maalla antu juppotaynenn raawintan inni kid sed maalla kida" he iyyaa kid. .
25 iyyaa illo,
"att ayno?"
ikiden.
Yesus lamm sedep iyyaa kid,
"hin hirayim qara hir inni lel an.
26 iyaan lek antu ootaayni ishaaminonne horat antu quurinun qapa;
hekoddu male hin an hit shaakket;
hin antu husslahat ishaamiyyonno iyaan antu iyy kapa dakay kida."
27 iyyaass lamm ikkim iyyat oot appa ishaam amm iyyaa hekaltemu.
28 semmaalla Yesus sedep iyyaa kid,
"helpaan inn meet nam errop rahhishshane antu an koddaawu ufunaannintan;
settep lamm hin appat an kolliyy ishaama pateeshsh ikkimin hayyotumawonneeh akkanna shokkooh naf erkasa diiy essete ishaakinnintan.
29 hin an hit an olle kiyy.
oot hin antu helpamitt erkanniyyu iyaan iyy masmasusinniyy kodden maalla,
amm all an hediiyyemu."
30 helpaan Yesus hin ishaame orr lek iyy amaan.
aylum juppoti kela passatta
31 Yesus orr ayhuta hin iyy amaaness sedep kid,
"eti lelaawun kallaattane shaakketass inn soolleshawu koddintan;
32 shaakket ufunaannintan;
shaakketanno aylum kela inn passinnint."
33 iyyaa lamm,
"innu hotta aprihaampa;
amm apure innu aylet nam henkoddin ufunamu;
kat att ashshannass passannihintan innu kidin?"
he ikkiden.
34 Yesus illo,
"shaakket shaakketin inni kidin;
nam juppot erkanniyyu dahenn aylet juppootat;
35 aylet amm helpamitt man talla kallaannimu;
meet lamm helpamitt man talla kallaannin.
36 semmaalla et immat aylum kela inn passiyyo,
shaakketass iyyaan passad koddintan.
37 hotta aprihaam koddaayn henxup;
hekoddu male oot inn lelaawu qeeddatta diinnishshan maalla,
an ikasa fadin.
38 antu hin antu appaawu kapa akkin ishaamin;
inn lamm hin inn appaayin kapa dakayten erkannin."
hekkid iyyaa mitaattiy
39 iyyaa lamm,
"appaannu aprihaam" kiden immitaattiyen.
iyyat illo sedep iyyaa kid,
"et medda aprihaam kodditan kid,
erkama aprihaam erkannaaten;
40 antu shaakket se antu Mooha kapa dakayin inni lel;
inn lamm an ikasa fadin;
amm aprihaam sedep hekodemu.
41 inn erkama appaaynet erkannin."
he iyyaa kid.
iyyaanno,
"amm innu meddaan arpalumin kalda dalademu;
appa shokkoohin qafna;
iyyat Mooha" he iyy kiden.
42 Yesus lamm sedep iyyaa kid,
"Moohot appaayin kodd kid,
an hoxsaannaaten;
antu Mooha kapan sohad arep dey;
iyy an hit male amm antu hayyotumaawun hendeyemu.
43 ishaamaawu maanaass inn kala diinnin?
oot inn ishaamaawu dakaya fotta diinnishshan maallapa?.
44 inn medda appaayn heka taapiloos;
inn fadishshanenno hadat appaayn kaysisa kida;
iyyat hiraym qara hir nam ikannin;
oot shaakket iyy ila teekit maalla,
amm shaakket olle senat heqapamu;
oot iyyat eerpampaytanne appa eerpa dahenn kodd maalla,
helpa eerpa ishaamiyyo isseeshsh qeeddin ishaamin.
45 oot antu lamm shaakket ishaamiyyu maalla,
amm an amaanikkishshanemu;
46 inn ila kat nam,
'att juppampayt' kidaayy an soqqaay ayno?
etin shaakket ishaamiyyu koddo,
maanaass an amaana diinnin?
47 nam heka Mooha kodd lel Moohaat dakayin;
ammann inn lel Mooha dakaya diinnishshan,
oot inn heka Mooha kodda diitten maalla kida."
Yesus aprihaam turann kiyy
48 hayyot ayhuta,
"att samaarishsh,
qayy hed qara kiyy kidaannu shaakket inhinemu?"
he ikiden.
49 Yesus illo sedep kid iyyaa mitaattiy,
"amm qayyat an qara hekiyyamu;
antu appaawun serkinnin;
inn lamm an deesannin.
50 hekoddu male amm antu serkooyyu fadinkiyyamu;
iyy serkisamaawu fadiyyonne horat quurinu kiyy.
51 shaakket shaakketin inni kidin;
nam lelaawu lushanniyyu amm apure toyinamu."
52 orr ayhuta illo sedep kiden,
"ikkim qayyat hed qara kiyyu ammann henxufnaann.
aprihaam hetoy;
himampayyaanno heraawen;
att lamm,
'nam lelaawu lushanniyyu amm toynamu' hekidin.
53 kat,
att appaaynu aprihaam se toy qara tawutamu?
himampayya heraawen;
att issess aynu kidin?"
54 Yesus lamm sedep kid iyyaa mitaattiy,
"etin antu isserkiyyo;
serkaawu aypot;
hor iyy an serkinniyyu appaawu se inn 'moohaaynu' kidishshan kida.
55 amm inn iyy heufutanemu;
hor antu iyy henxup;
etin antu amm iyy henxupamu kidiyyu kid,
innapin eerpampayt koddaay kida.
hor antu iyy henxup;
lelaayyenno lushanninkiyy.
56 hadat appaayn hekat aprihaam,
lashsh hekashawu akka illo masmasaas kida;
iyyat heakk illo masmas."
57 helpa hine orr ayhuta,
"att sanu par hund hen naf amm hekaysittemu;
kat ashshannass aprihaamin akk kidin?"
he ikkiden.
58 Yesus illo,
"shaakket shaakketin inni kidin;
aprihaam dalatta turannin antu kiyy" iyyaa kid.
59 semmaalla orr ayhuta dakaann iyy reepa sohaden;
iyyat lamm tura yipir kid illo man miilot talla sohad taw.