yesusenne insharaddaayy
7
1 sekanna oot orr ayhuta hin huss yihuta qalli kallaanniyy Yesus ikasa fadiyyan maalla,
huss yihutaat alldiiyy illo kelila qall mimmitaat;
2 essete serkila taaset ayhutaat dehaad.
3 semmaalla insharaddaayy yesusess,
" erkama hin att erkannishshu ikkim soolleshitt akkinaness sohadu huss yihutaatep aanii;
4 nam patpaha ufnashama fadiyyu amm erkamooyy deketi erkanniyyamu;
oot att hin erkannishshu maalla,
orr husslahati ixakkiyyii."
he ikiden
5 iyyaa sedep kiden,
oot insharaddaayy naf iyy amaana diiyyen maalla kida.
6 Yesus sedep iyyaa kid;
"helpaawu sanu amm hedehaadenemu;
innass lamm helpa heikk iyaan sen.
7 husslah amm inn qar hittisa fottinamu;
hor,
oot antu erkama husslah iyaan nayq koddaaddu maanyet qari koddiyyu maalla,
an qar hittinnin.
8 inn por serkilaanettetep aanaa;
antu lamm oot sanu helpaawu kaysaatta diiyen maalla,
amm por serkilaanettetep anninhinamu"
9 hekid illo kelila hat.
Yesus serkila taaset qari akkaattaayy
10 hekoddu male helpaan insharaddaayy por serkilaanettetep aanen kanna,
iyyat akkaatta male deketin por serkilaanettetep aan.
11 awi serkilaanettete hayyot ayhuta "nam hinett aha kiyy?"
hekidin iyy fadin.
12 siipaat lamm illekess ootaayy hashashin;
orr shakkan,
"iyyat nam dikk" hekidin,
orr shokku lamm,
"iyyokku,
iyyat siip patandapusinnin" hekidin.
13 hekoddu male oot iyyaa hayyot ayhuta tura huuren maalla,
nam shokkooh naf oot hekaayy amm patihepahiyy ishaamemu.
14 laashsh serkilaanett pakin paxene Yesus man miilotatep aan illo kollisa hir.
15 orr ayhuta illo,
"nam hin kolla male ashshannass sed dahenn ufinaatta fott?"
kidin shammannin.
16 semmaalla Yesus sedep kid iyyaa mitaattiyy,
"kollilaawu Mooha se an hit kapa male amm hekaawomu;
17 nam has Mooha kaysisa fadiyyu et kiyyaado,
kollilaawu iyaan Mooha kapa kodd shoke antu isseeshsh ishaam koddaaddu ufnaannina.
18 nam isseeshsh qeeddin ishaamiyyu serkooyy fadin,
nam serka iyy se iyy hit fadiyyu lamm nam shaakketat kida;
amm eerpaanno heqapamu.
19 muuset halitt innass indaannemu?
hekoddu male inn ila iyy halitt kaysinniyyu shokkooh naf amm hekiyyamu.
maanaass an ikasa fadin kat?"
hekid.
20 siipat illo,
"att qayy hed qara kiyy;
aynu hed ikasa fadin?"
heikkiden.
21 iyyat lamm sedep kid iyyaa mitaattiyy,
"antu erkama shakkanoohin erkayy;
inn illo dahetaynin erkamaynin shammannin.
22 muuset tampet karrasamaat inni day;
tampet hin deit,
appada kapa male amm muus kapaamu;
innanno ukul sampataann nam karrasikkishshan.
23 semmaalla,
halitt muus kapin daassam all oohama tura et lashsh sampataate namat karrasamiyyu koddo,
oot antu lashsh sampataate kinnat nam diniyy maalla maanaass jiiannin?
24 horat shaakket quuraa male,
miint tooyan horat quura diiyyaa."
shiittaan oot kristoosi sohad
25 helpaanette orr yerusaalem ila shakkan sedep kiden,
"nam hin iyyaa ikasa fadiyyan hin iyyipa?
26 toare,
iyyat patpahinnin ishaamin;
iyyaa lamm amm akkan ikidiyyanemu;
kat nam hin shaakketass kristoos koddaayy hayyot heufunaadenemu?
27 por nam hin ulla dey innu lamm henxufna;
lamm kristoos et deyiyyo ahaashsh ikkim deyinu nam upu amm hekiyyamu."
28 semmaalla Yesus man miilot talla kollinniyyo nassayy erri qeedd illo,
"an heufutan;
ikkim antu ahaashsh deyenno heufutan;
hekoddu male antu amm hayyotumawun hendeyemu;
iyy an hit shaakket;
inn lamm amm iyy heufutanemu.
29 hor oot antu iyy kapa deyenne iyyat an hit maalla antu iyy henxup" kid.
30 semmaalla iyy qapa faden;
hor oot helpaayy kaya diiyen maalla,
aynonno amm iyy heqappademu.
31 hekoddu male siip se ila orr lek iyy amaan illo,
"helpa kristoos deyo,
shammot nam hin erkayy qara tawtu erkanninamu?"
kiden.
waartiyada Yesus qapa hitamaaddu
32 faraset,
orrat oot Yesus hashshashin ishaamanniyyane dakayen;
semmaalla kaadayya sukamaatenne faraset Yesus qapusisaass waartiyada man miilot hiten.
33 helpaanette Yesus sedep kid,
" helpa qojesin inn olle olannina;
sekkanna iyy se an hit kapopin annina;
34 inn lamm an kann fadintan;
hekoddu male amm an akkannihintanemu;
por antu kiyyopanno amm deya fottihintanemu."
35 semmaalla hayyot ayhuta,
"ikkim innu iyy inxakkiness nam hin ahop anta hina?
saapaass orr ayhuta iyyaan otant kirikket ili pulpulam kapop annina orr kirikket kollinninamu?
36 hin iyyat,
'an kanni fadintan;
hekoddu male amm an akkannihintanemu;
por antu kiyyopanno amm deya fottihintanemu' kidiyyu maana kida kat?"
olli kikiden.
ayka kiyyat
37 lashsh se kaant hekat muutayta serkilaanettete Yesus errop ell illo nassayy err qeed sedep kid,
"nam deepood et kinnaado an kapop deyu illo uku;
38 nam an amaaniyyu qum matsaafa miilot leliyyop,
ayka kiyyatat iyy ila yaamina."
39 iyyat sed ishaam,
oot laaffot miilot se orr iyy amaaniyyu qeeddanninanet kida.
maana maalla,
essete oot sanu Yesus por serkaatep anta diiy maalla,
laaffot miilot amm hedaassantemu.
otant siip ila reehaytot sohattaayy
40 helpaan siip ila orr shakkan lel sed dakayene,
"himampayt hin op deyina kiden shaakketass hin iyy" hekiden.
41 orr shokku,
"hin kristoos" hekiden.
shakkan lamm,
"kristoos kelilaashsh deyinamu?
42 ikkim kristoos hotta taawit ila dalanninonne peteliheme sapara taawiteeshsh deyinu matsaafa miilot qarass hetsaafampa?"
hekiden.
43 semmaalla Yesus minan otant siip ili rehaytot dey.
44 iyy ila orr shakkan iyy qapa faden,
hekoddu male aynono amm iyy heqappademu.
amaana diitta kaadayya ayhuta
45 sekanna waartiyada,
kaadayya sukamaatenne faraset kapop mitaaten aanen;
iyyaa illo,
"maanaass indeya diitten?"
iyyaa kiden.
46 waartiyadaan illo,
"qum nam hin ishaamiyyop aynono amm apure heishaamemu"kiden immitaattiyyen.
47 faraset lamm,
"innanno patindaftenemu?
48 kat hayyot ila shokenne faraset ila orr iyy amaan kiyyamu?
49 siip hin halitt muus ufunaatta diiy shaakketass ippisham" hekiden.
50 iyyaa ila nam shokku niqotimoos kidamiyyu setureeshsh Yesus kapop dey,
51 "qum halittaaynu qarass nam shokku hin iyyat inkasasamess mitaattilaayy dakaysamaatta illo ikkim maana kod ufunaytisama male horat qari quuramishshamu?"
iyyaa kid.
52 iyyaa illo,
"hedenno nam kelilaatemu?
himampayt ikkim kelila sohatta diinninu kann fuqii ufinaadu" ikkiden;
53 illo shokku shokkotaddo manaddop kalen.