Yesus nam kum hen dansiyy
(mati. 14,13-21; mar. 6,30-40; Luqaa. 9,10-17)
6
1 sed kanna Yesus pakatet kelila se tsipiraatoos kidamishshu patop tarp.
2 orr lek Yesus baaqampayya dinisan shammot se iyyat erkayy akken illo iyy kanni aanen.
3 iyyat illo utet qarop fayyad soolleshayy olle ulli lai.
4 essete serkila faasika ayhutaat dehaad.
5 helpaanette Yesus siip lek iyy kapop deyiyyane akk illo filiboosess,
"laaqqot siip sed kayintu iyyaa daminan aylan pidda fottinna?"
ikid.
6 Yesuset kaassiy sed filboos kaassad,
iyy ekkasaass male,
iyaan iyyat erkanninu heup.
7 filiboos illo,
"moossansana tittinnax mashshmashshaddu iyyaa daattaass etin tinaareeta tseet lakk nafin laaqqot piddin kid,
amm iyyaa min kayintamu" kid immitaattiyy.
8 soolleshayy ila ishokku intiryaas,
kaft simoon se betsiroos kidamiyyu,
9 "meet,
laaqqot poorra henenne qurtsummet lakk qapu are kiyy;
hekoddu male hin siip sed lekess maana kaynt?"
heikkid.
10 Yesus lamm,
"ikkim siipat lahi lainani kodaa" ikkid.
ulla karja raad kiyy;
siip settenno lahi qaaxen;
iyyaa ila diidda kum hen koddaayen.
11 Yesus illo laaqqot sett qeedd,
Mooha aypisad siip se lah qaai dayy.
settep lamm qurtsummetanno iqqoot;
iyyaa qum it iyyaa fadusinnishshu mitti akkaden.
12 helpaan iyyaa dahenn damen quuhene Yesus soolleshayyess,
"moossannat shakkaah naf allhata male orqudop qapa" hekid.
13 iyyaanno laaqqot se siipat dam kela moossansana hat qunna hundann lakk haaden.
14 helpaan siipat shammot se Yesus erkayy akkene,
"hin shaakketass himampayt se husslah qarop deyiyyu" hekiden.
15 helpaan Yesus siipat irrotin iyy daamumisa qaapattaaddu ufunaade,
ammannenno iyyaa kenda sohad utet qarop iyyeeh all aan.
Yesus pakatet qareesh aan
(mati. 14,22-33; mar. 6,45-52)
16 lashsh ponnaatte soolleshiyy pakatet kapop aanen;
17 konkaalli qaaen illo pakatet pata qifirnaahomep anta hiren.
essete lashsh hepoornnatt;
Yesus sanu iyyaa kapop amm hedeyemu.
18 oot hayya kaan haayawiyyu maalla,
pakatet hinett kaahanishsh.
19 helpaan soolleshiyy kilometret hen shoke lehep kishshu pakatet qaraash konkaaddu annusiyyen kanna,
Yesus pakatet qaraash lukkan dextete konkaaddu kapop dehaanniyyo akken illo nahen.
20 iyyat lamm,
"huura diiyyaa,
anpa!"
he iyyaa kid.
21 iyyaa illo masmasuntin iyy qeeddatta konkaallep kalisa faden;
esseteeh konkaaddonno por se iyyaa ullop anniyyane paitt.
Yesus dama kiyyatat
22 paarreshadde orr hin dase pakatet patin hat,
pakatet qara konka shokkooh kiyyaattayyenne soolleshayyenno iyyaaha konka se qalle kiyaataaddone Yesus lamm iyyaa olle konka se qallep kala diittaayy immashsh oorsaden.
23 lamm konkada pil sapara tsipiraatos kapa sohaden illo por se Yesus dinkam aypila ulli kod,
siipanno laaqqot ulli dam kapop deyen.
24 siipat yesusenne soolleshayy ulla kinnaatta diittaaddu akkene konkada hin ulla kiyy qalless qaaen illo Yesus kann fada qifirnaahomep aanen.
25 helpaan iyyaa pakatet pata iyy akkene,
"kollisampayt,
awwame arep deit?"
hekiden kaassaden.
26 Yesus illo sedep kid iyyaa mitaattiy,
"shaakket shaakketin inni kidin;
inn an fadishshan oot inn laaqqot danten quuhiten maalla male,
amm oot inn shammot akkiten maallamu.
27 damaan patina maalla erkasa diiyyaa;
sekkapeeshsh damaan kiyyat parpar daannina meet nam inni daanninu maalla erkayyaa.
iyyat se Mooha appat erkamaayy shaakket koddaaddu patpahiyy ufnaytiyy kida."
28 siipat illo,
"kat erkama Mooha erkasaass maana koda innu fadusinnin?"
heikkiden.
29 iyyat lamm,
"erkama Mooha,
iyy se Moohot hit amaana" hekid iyyaa mitaattiyy.
30 iyyaanno,
"ikkimin akkinnu illo hed amaanninu shammot ashshann kishshu kodint?
maana erkannint?
31 'ikkim daminaness moontalleett dama iyyaa dayy' qum it kidant tsaafantep,
appadaannu lak patpat kiyyoss mennaa damen" he ikkiden.
32 helpaanette Yesus sedep iyyaa kid,
"shaakket shaakketin inni kidin,
iyy dama shaakk moontallett inni daanniyyu appaawu male amm iyy dama shaakk moontalleett inni dayy muusemu.
33 dama Mooha,
iyyaan moontalleett lekkanniyy illo husslahat kiyyat daanniyy kida" he iyyaa kid.
34 iyyaa illo,
"polda,
settekules dama hinep kiyy helpa mitt innu dayyii" ikkiden.
35 Yesus lamm sedep iyyaa kid,
"dama kiyyat an;
nam an kapop deyiyyu amm apure tuffinamu;
nam an amaaniyyu amm apure deepoonninamu.
36 hekoddu male qum antu inni lelep inn an akkiten nefenno amm an heamaantenemu hen inni kidin.
37 hin appat an daanniyyu dahenn poraawop deyina;
nam poraawop deyiyyonno amm altaash all arinninhinamu.
38 antu moontalleett lekkad,
has iyy se an hit kaysisaass male,
amm hasaawu kaysisaassemu.
39 has Mooha appa se an hit,
hin iyyat an dayy dahenn qara shokkooh naf allipatisa male,
aww muutaytaate toxt ila ikkimin sohashshinninoss kida.
40 heye!
has appaawu,
nam imm akkiyyu illo amaaniyyu dahenn ikkim kiyyat parpar akkanninos kida;
ananno lashsh muutaytaate toxta ilan iyy sohashshinnina."
41 oot Yesus,
"damaan moontalleett lekkad,
an" kid maalla,
orr ayhuta iyy qarass kumulliyyaden;
42 sedepanno kiden,
"hin meet yoosef yesuspa?
appaayyenne inkoshayyenno henxufinpa?
kat ammann ashshann 'moontalleettin lekkad' kidin?"
43 Yesus lamm sedep kid iyyaa mitaattiy,
"ollin kumulliyatta diiyyaa;
44 appa hin an hit et hembu male nam an kapop deya fottinu amm hekiyyamu;
se an kapop deyiyyonno lashsh muutaytaate toxt ilan sohashshinnina.
45 matsaafa himampayya qarass,
'orrat dahenn iyyaan Mooha kapa koll koddinan' hekidant tsaafant;
semmaalla nam Mooha kapa dakay koll dahenn an kapop deyina.
46 sedep kidaanno amm nam appa akk kiyy kidaawomu;
hin appa akk se Mooha kapa deyeeh kida.
47 shaakket shaakketin inni kidin;
nam amaaniyyu kiyyat parparat qap.
48 dama kiyyat an;
49 appadaann lak patpatt kiyyu qalle mennaa damen;
hekoddu male heraawen;
50 hin damaani moontalleett lekkad;
nam dama hin damiyyu amm toyinamu.
51 dama moontalleett lekkad kiyyat daanniyya,
an;
nam dama hin damiyu dahenn hak parparatess kalaannina;
damaan antu ikkim orr husslahat kiyyat koddinan daanniyyu sohaawu kida."
52 essete orr ayhuta,
"nam hin ikkimin sohaayy daminoss ashshannass innu daatta fottina?"
kidaan orshshiitten.
53 semmaalla Yesus sedep iyyaa kid,
"shaakket shaakketin inni kidin,
soha meet nam et dama diittane;
diikayyenno uka diittane amm kiyyat heqqaftanemu.
54 nam,
sohaawu damiyyonne diikaawu ukiyyu dahenn kiyyat parparat qapa;
ananno lashsh muutaytaate toxt ilan iyy sohashshinnina.
55 sohaawu dama shaakk,
diikaawonno ukot shaakk kida.
56 nam sohaawu damiyyonne diikaawu ukiyyu dahenn an olle kallaannina;
ananno iyy ollenn kallaannina.
57 qum appa hin kiyyat qapu an hit illo ananno iyy minann kiyyat qapop lamm nam sohaawu damiyyu dahenn an minann kiyyat qafnaannina.
58 semmaalla,
dama moontalleett lekkad hiniyaa;
damaanetteno amm hin appadaann damenep kiyyanemu;
orr damaan appadaann damen dam heraawen;
orr damaan antu daanniyyu damiyyu lamm hak parparatess kallaanninan."
59 Yesus hin ishaam,
helpaan iyyat qifirnaahome man dinkam ayhutaate kollinniyyo kida.
lel kiyyat parpar daanniyyu
60 helpaan soolleshayy ila orr lek sed dakayene,
"ishaamayin hursaanniyan;
aynu qeeddatta fottina?"
hekiden.
61 Yesus lamm soolleshiyy oot sedeti kumulliyattaaddu ufunaad illo "hin kohayt inni koddimu?
iyyaa kid.
62 helpaan meet nam porayy pahaytap erreel mitaata sohanniyyo et akkishshane maana kidintan?
63 it kiyyat daannishshu laaffot Moohaat kida;
iyaan irrot namatin erkawsamiy lamm amm koddinanemu;
lel hin antu inn ishaam laaffotanne kiyyatanno kida.
64 hekoddu male inn ila orr amaana diinniyy kiyy."
Yesus sed ishaam,
hirayta qara hiran orram ikkim amaana diinniyyanenne nam iyy tarpinninu daanninu aynu ikkim kodd oot iyyat upu maalla kida.
65 sekanna Yesus,
" 'nam se it appa kapa iddaassant pateeshsh,
nam an kapop deya fottinu amm hekiyyamu' antu inni kid sed maalla kida" hekid.
66 sed minann soolleshayy ila orr lek ikkannaashh mitaaten;
essete hiren Yesus kanni anta alldiiyyen.
67 semmaalla,
Yesus soollet hundan lakk settess,
"lamm innanno anta fadimu?"
ikkid.
68 illo simoon hin betsiroos kidamiyyu hekide,
"polda!
aynu kapopin anninna?
att lel kiyyat parpar daanniyyu qafta.
69 att meet Mooha se miil koddaaytenno henxufnaann illo amaann."