Yesus soollet tappass akkaad
21
1 sekanna Yesus pakatet tsipiraatoos kapass qarxoor soolleshayyi akkaad;
iyyat akkaad,
sedep kida:
2 simoon se betsiroos kidamiyyonne toomaas se titimoos kidamiyyonne natinaaxel se qaana se huss kelila qalle kiyyo deyenne medda saptiyoos lakkenne soolleshayy ila orr pil nam lakk ollin kiyy.
3 simoon se betsiroos kidamiyyu,
"qurtsummet olaassin annina" he iyyaa kid.
iyyaa illo,
"innonnon hed ollen anninna" ikkiden;
sohaden illo konkaallep fayyaden;
hekoddu male awwoddat muumetass amm qurtsummet heqapenemu.
4 lashsh parte Yesus pakatet kapass ulli ell;
soollet lamm Yesus koddaayy amm heufunaadenemu.
5 iyyat illo,
"meedda!
qurtsummet op daminan heqqaftanemu?"
iyyaa kid.
iyyaa lamm,
"amm henqafnamu" kiden immitaattiyyen.
6 iyyat illo,
"urkupaann dind miskitt konka qari qaasaa akkannihintane" iyyaa kid.
semmaalla iyyaa dind miskitt sett qari qaaseen;
oot iyyaa qurtsummet lekit qapen maalla,
amm tisha hefottenemu.
7 helpaanette soollishsh hin Yesus hoxsaanniyyu betsiroosess,
"pold ukkuli" hekid.
semmaalla helpaan simoon se betsiroos kidamiyyu pold koddaayy dakaye,
oot iyyat patpatt kiyyu maalla,
shakar kid uuwaat uuwad illo pakatet ilop tor.
8 soollet shakkan lamm oot iyyaa haq ileesh metret tseetap kishshoseeh sekaaden maalla,
urkupaan qurtsummetin innaakood hetishitete koonkan deyen.
9 helpaan iyyaa pakatet se ila sohadene,
pork qurtsummet uqqari haayantenne laaqqot akken.
10 Yesus illo,
"qurtsummet se inn ammann qaften qara arep indeyyaa" iyyaa kid.
11 simoon se betsiroos kidamiyyu lamm koonka se qallep fayyad illo urkupaan qurtsummet kakkaant tseetanne hund henenne halpattinn innaakood qerishaap tish;
qurtsummet sedep lekit qapante amm urukupaan hekakkaaxamenemu.
12 sekanna Yesus,
"hooyaa,
joolat joolawaa!"
iyyaa kid.
pold koddaayy oot iyyaa ufunaaden maalla,
soolleshayy ila nam,
"att ayno?"
kid iyy kaassatta qim shokkooh naf amm hekiyyamu.
13 sekanna Yesus hedey illo laaqqotanne qurtsummet se qeedd illo iyyaa day.
14 Yesus toxt ila sohad kanna iyyat soolleshayy akkaad hin halpattiyya kida.
kaassiy Yesus betsiroos kaassad
15 iyyaa damen kanna Yesus simoon se betsiroos kidamiyyoss,
"meet yoon simoone,
hin qareell tawoss an hoxsaannikkishshamu?"
he ikkid.
iyyat illo,
"heyye,
polda,
ikkim antu hed hoxsaanniyyu att heufut" ikkid.
Yesus illo,
"henoaawu dansiyyii!"
ikkid.
16 lamm lakkiyaass,
"meet yoon simoone,
an hoxsaannikkishshamu?"
ikkid.
iyyat illo,
"heyye,
polda,
ikkim antu hed hoxsaanniyyu att heufut" ikkid.
iyyat illo,
"helemmaawu lushii!"
ikkid.
17 lamm,
halpattiyaass "meet yoon simoone,
an hoxsaannikkishshamu?"
ikkid.
oot iyyat halpattiyya "an hoxsaannikkishshamu?"
kid maalla,
betsiroos hedapiyy illo,
"polda!
att dahenn ufti,
antu hed hoxsaattaawonno heufti" ikid.
Yesus illo,
"helemmaawu dansiyyii;
18 "shaakket shaakketin hedi kidin,
kolkolumayte issenni uuwwaatayt uuwannin por att fadishshop annin.
hekoddu male helpa qimaayunto,
harkootti iqqapint,
nam pil hed uuwwashinnina;
por att fada diinnishshopanno hedin annina" ikkid.
19 iyyat maalla sedep kid,
betsiroos toxt ashshann kishshun ikkim iyyat Mooha serkinninu akkisaass kida;
sekkanna betsiroos,
"an kanni hooyii" ikkid.
yesusenne soollishsh pill
20 betsiroos ipateesh mijir kid,
soollishsh se Yesus hoxsaanniyyu iyy kanneeshsh deyiyyo akk;
soollish hin iyy se helpa eetotate Yesus ketteesh kidd illo,
"pold,
hin hed tarpininu daanninu ayno?"
kid kaassad kida.
21 betsiroos iyy akkekuless,
"polda,
nam hin ashshann koddina?"
heikkid kaassad.
22 Yesus lamm ,
"hak antu mitaatinu ikkim kallaanninu etin hoxsaad kid,
maana uqqallep hed kaliy?
att mashshayt an kanni hooyii!"
ikkid.
23 sed minan ishaamaan,
"soollishsh hin amm toynamu" kidiyy otant orr se Yesus kanni anniyyu ili pulpulamen;
hekoddu male Yesus,
"hak antu mitaatinu ikkim kallaanninu etin hoxsaad kid,
maana uqqallep hed kaliy" hekid male,
"amm toyinamu" amm hekidemu.