yesusenne samaarishshet shakk
4
1 essete Yesuset yewannis qara tawnisan orr lek soollet kodan ahalinniyyo faraset dakayen.
2 hekoddu male hin ahalinniy soolleshayy male,
amm iyy mashshayy ahaliyemu.
3 hin otaayy kidam faraset dakayaaddu helpaan Yesus ufnaade,
huss yihutaat alldiiy illo kelilaap mitaat.
4 iyyat anniyyo samaariyan tarpa iyy fadusitt.
5 semmaalla por se yayqoop immaayy yoosefi dayy kapa sapara samaariya hin sikaar kidamiyyap dey.
6 ulla eel yayqoop kiyy.
oot Yesus antonan tashsh maalla,
eel se kapass haysad;
helpaanette lashsh saatet leh koddaat.
7 essete samaarishshet shakk haq oraapaas eel se kapop deit;
Yesus illo,
"haq an dayii!"
ikkid.
8 helpaanette soolleshiyy saparaap dama pidda aanen.
9 samaarishshet hinett illo yesusess,
"att ayhutishsh kodditete ashshannass an samaarishshetass 'haq ani dayii!
' kidin?"
he ikkidit;
sedep kidaadd,
oot orr ayhutaatenne orr samaariya ollisena diinniyyan maalla kida.
10 Yesus lamm,
"daayy Moohaatenne iyy se 'haq ani dayii!
' hedi kidiyyu aynu koddaayy ufunaatt kid,
iyy dinkamannaat iyyat illo haq kiyyat hedi daannaay" heikkid.
11 it illo sedep kidit immitaattitt,
"polda!
att mehada op injooqanniyyan amm heqqaftamu;
eelanno lahaat hesek;
kat haq kiyyat ahaa akkannint?
12 att appaaynu yayqoop se eel sed innu dayy qara tawutamu?
iyyanne meddaayyanne horeshayyenno eel sed qalle uken."
13 Yesus lam,
"nam haq sed ukiyyu dahenn ukkannanno deepoonnina;
14 nam haq se antu daanniyyu ukiyyu hak parparatess amm deepoonninamu;
haq hin antu daanniyyu,
nam se ukkiyyoss ayka kiyyat parpar hin urqiy koddina."
kid iti mitaattiyy.
15 iskattet hinett illo,
"polda!
tonhedess,
ikkim antu sed kanneeshsh indeepoonnin illo haq oraapatta arep indeyiness,
haq sed ani dayyii!"
ikkidit.
16 Yesus lamm,
"aanii appa manaayt hembii illo arep miitaat" he ikid.
17 iskattet settenno,
"amm henqapamu" hekidit immitaattit;
iyyat illo,
"amm henqapamu kidaatt shaakket.
18 maana maalla,
irishshada hen qaft makess;
ammann nam se hed olle kiyyonno amm irishshaytemu;
semmaalla shaakket ishaant" he iti kid.
19 it illo,
"polda!
att himampayt koddaayt ammann henxufnaad;
20 appadaannu utet sed qarass Mooha shoomaden;
inn orr ayhuta lamm,
'yerusaalemeseeh Mooha shoomatta fadusinnin' hekkidin" ikkidit.
21 Yesus lamm sedep iti kid,
"yenta,
an amaanii,
helpa inn utet sed qarass shoke yerusaalemi Mooha appa shoomatta diinintan deyina.
22 inn orr samaariya Mooha inn ufunaatta diitteness shoomannin;
innu lamm oot dinattot ayhuta kapin kodd maalla,
Mooha se innu ufunossin shoomannin.
23 hekoddu male orr shaakketin shoomanniyy,
helpa iyyaa laaffotanne shaakketin Mooha appa shoomanninan deyina;
laadoss helpaan ammann hedeyen;
appanno fadiyyu iyyaan sedep iyy shoomanniyy kida.
24 Moohot laaffot;
orr iyy shoomanniyyonno laaffotanne shaakketin ishoomatta iyyaa fadusinnin."
25 iskattet settenno,
"kristoos ikkim deyinoss henxup;
helpa iyyat deyo,
heikket innu lelina" he ikkidit.
26 Yesus lamm,
"toare!
ammann hin hed olle ishaamiyyu antu iyy" he ikkid.
27 helpaanete soolleshiyy por se iyyaa aaneneeshsh hemitaaten illo Yesus iskattet olle ishaamataayn shammaden;
hekoddu male,
nam "maana fadin?"
shoke "maanaass it olle ishaamin?"
kid iyy kaassad shokkooh naf amm hekiyyamu.
28 sekannakuless iskattet hinett okkootadd alldiitt saparaap ant illo orri sedep kidit,
29 "hooyaa,
nam se iyaan antu erkayy dahenn ani lel tooyaa!
saapaass iyyat kristoos koddinamu?"
30 orrat illo saparaalle sohaden Yesus kapop aanen.
31 helpaanette soolleshiyy yesusess,
"kollisampayt,
dama dami!"
hekiden .
32 iyyat illo,
"dama inn ufnaatta diitten antu damiyyun qap" iyyaa kid.
33 semmaalla soolleshiyy,
"nam daman iddeyemu?"
he olli kikkiden.
34 Yesus lamm sedep iyyaa kid,
"damaawu,
has iyy se an hit erkasaanne erkamaayyanno kaysisa kida.
35 inn,
'mooqetass leha afur hat,
amm hedehaattemu' hekkidinpa?
antu innassin kidine,
erreel pahaa illo uunt pallaadd uullaann qaraash tooyaa!
36 nam mooqiyyu kalisotayy qeeddannina;
qundaan kiyyat parparat koddina orqudop qapina;
semmaalla se peehiyyonno se mooqiyyonno ollenn masmasinan.
37 paana sedenn,
lel hin 'shokku peehiy,
shokku lamm mooqiyy' kidiyyu shaakket kida.
38 ananno iyaan inn kanni tashsha diitten ikkim mooqintanessin inn hit;
orr pil erkamaann tashshen;
inn lamm hin iyyaa kanni tashshen qallep kalten."
39 oot iskattet hin,
"akkan antu erkayy dahenn ani lel" kidit ishaant maalla saparaan qalle siip lek iyy amaan.
40 semmaalla helpaan orr samaariya Yesus kapop deyene,
ikkim iyyaa kapi olanninoss dinkamaden;
iyyat illo lashsh lakk iyyaa kapi kaysiyy.
41 orr pil iyyaan lekenno lelaayy minann iyy amaanen.
42 iskattet settessenno,
"innu seedeeshsh iyy amaann,
lel se att innu lelteneeh kodda male,
oot innu mashshaynu dakaynenne iyyat shaakket dinisampayt husslah koddaay ufunaann maalla kida" he ikiden.
Yesus meet kaadayt dinisaay
43 Yesus lashsh lakk samaariya kaysiyy kanna kelilaap aan.
44 iyyat mashshayyess,
"himampayt amm hussayy qalli serkisamiyyamu" hekid ishaam.
45 hekoddu male helpaan iyyat kelilaap aane,
siipat andotann iyy qeeddaden;
maana maalla,
helpaan iyyaa serkila faasikaati yerusaalemep aanene,
akkan se iyyat erkayy dahenn heakken.
46 sekannakules Yesus huss kelila qalle por se iyyat haq,
ukot woynetati kodetep,
sapara qaanaatep mitaat;
helpaanette qifirnaahome kaadayt man Daam iyy meetaayy tura baaqiyyu kiyy.
47 iyyanno Yesuset yihutaashsh kelilaap deyaayy dakay illo kapop aan;
ikkim qifirnaahomep anninu illo meetaay se baaqiyyu toxt dehaad idinininu dinkamad.
48 Yesus illo,
"inn et ishshaakanne shammot akka diittane amm amaanikkishshanemu" ikkid.
49 kaadayt hinett lamm,
"polda!
tonhedess meetaawu toya turin qarapaiyii" heikkid.
50 Yesus illo,
"manaytep mitaatii!
meetaatt hedinade" ikkid.
nam settenno lel se Yesus iyyi lel amaan illo aan.
51 iyyat mitaatiyyo erhamaayy paanaalle mini paen illo,
"meetaatt hedinad" ikkiden.
52 iyyat helpaan meetaayy uqqalli dinad iyyaa qara kaassad.
iyyaa illo,
"halate saatet tapp qara dakinshiyy hin doohishshu qara qappanawut" ikkiden.
53 appa meet settetenno saatet hin helpaan Yesus,
"meetaatt hedinad" uqqalli kid koddaadd ufunaad;
semmaalla awseteeshsh hiren iyyanne orr manaayy dahenn Yesus amaanen.
54 shammot hin shammot lakkiyya se Yesus yihutaashsh keliilaap deye erkayy kida.