yesusenne niqotimoos
3
1 nam shokku niqotimoos kidamiyyu kiyy;
iyyat faraset ila sinkitt ayhutaat.
2 nam hin awwodd Yesus kapop deyy illo,
"kollisampayt,
Moohot iyy olle kiyaatta male,
nam shammot se att erkannishshu erkasa fottaayy amm hekiyyamu;
semmaalla att kollisampayt Mooha kapa dey koddaayt henxufn" ikkid.
3 Yesus illo,
"shaakket shaakketin hedi lelin,
namat lakkiyya dalatta male amm daamum Mooha akka fottinamu" ikkid.
4 niqotimoos lamm,
"namat et qimaayyumu kanna ashshannass dalatta fottina?
kat lakkiyyaass rohot inkotayy qallep kala dalatta fottinamu?"
hekid kaassad.
5 Yesus illo sedep kid immitaattiy,
"shaakket shaakketin hedi lelin,
namat haqanne laaffot miilot ila dalatta male,
amm daamum Mooha qallep kala fottinamu.
6 hin soha ila dalad soha,
hin laaffot ila dalad laaffot kida.
7 oot antu 'lakkiyya dalatta inn fadusinnin' hedi kid maalla shammatta diiyii.
8 haayyot por iyyat hiinu qarass haayawin,
att nassayy dakayin;
hekoddu male ikkim iyyat ahaashsh deyiyyonne ahaqari anniyyu amm heuftamu,
hin laaffot miilot ila dalad dahenn settep kida."
9 niqotimoos illo,
"hin ashshannass kodda fottinan?"
kid kaassad.
10 Yesus lamm sedep kid immitaattiy,
"att kollisampayt israaelet kodditete,
ashshann sed ufunaatta diit?
11 shaakket shaakketin hedi lelin,
hin innu ufunun ishaaminn;
hin innu akkinenno lelin,
inn lamm maanyetumaaynu amm qeeddannikishshanemu.
12 antu heka husslah inni leliyyo et amaana diinnishshan koddo,
etin heka moontall inni leliyyo ashshannass amaannintan?
13 meet nam se moontallett lekkad pateeshsh iyy moontallep fayyad aynonno amm hekiyyamu.
14 "qum muus soyyu maaka erri rahhep,
meet nam erri rahhama iyy fadusinnin.
15 hinenno koddinan,
nam iyy amaaniyyu dahenn ikkim kiyyat parpar qafnaanninos kida.
16 "nam iyy amaaniyyu dahenn ikkim kiyyat parpar qafnaanninoss male,
ikkim iyyat allixnpatiness,
oot Moohot husslah ikkaani hoxsaad maalla,
meetayy shokkooh day.
17 Moohot meetayy husslah qarop maalla hit,
husslah ikkim meetaayn dininoss male,
amm husslah qari horat quuraassemu.
18 nam iyy amaaniyyu qarass amm horat quuramintamu,
nam iyy amaana diinniyyu lamm oot iyyat meet Mooha shokkooh amaana diiyy maalla,
olo horat qari quurant.
19 horat settenno hin it:
attumat husslah qarop dey,
oot orrat lamm erkamaaddu iyaan nayq kodden maalla,
attumat kapeeshsh poorinnat hoxsaaden.
20 nam akkan nayq erkanniyyu dahenn attumat hittinnin;
erkamaayy hin nayq ikkim iyaa inxakkaannin tura amm por attumatatep deyiyyamu.
21 lamm nam erkama shaakketi erkanniyyu hin iyyat erkanniyyu acac moohaatin koddaaddu ikkim patpahinaness por attumatatep deyin."
yewannis ahalisampayt oot Yesus maanyumaayy
22 sekannakuless Yesus soolleshayy olle huss yihutaatep aan;
hexahalitete iyyaa olle helpa qoji ulli olad.
23 essete yewannis salem kapa lak henon kidamiyyu haq lek ulla kiyyoss ahalin;
orranno ullop deyin ahalisamin.
24 helpaanette yewannis amm hehidamemu.
25 essete otant soollet yewannisetenne ayhutish shokkua ilas shiitta oot tampet miillawaat sohad;
26 illo soollet yewannis iyy kapop dehaaden illo,
"kollisampayt,
nam hin yortaanos pata hed olle kiyyu att otaayy lelt,
toare,
ahalinniyy;
orranno dahenn iyy kapop annin" ikkiden.
27 yewannis illo sedep kid iyyaa mitaattiy;
"aynonno et Moohot iddaatta diiyyo akkan shokkooh naf qafnaatta amm fottinamu.
28 se antu 'iiy tureeshshin hitam male amm antu kristoosemu' kid inn leless inn mashshaynes maanyeshawu.
iyyaa kid.
29 nam haypanishshet qapu haypanishsh kida;
paallishsh hin haypanishsh kapi elliyyu dakayiyyu lamm,
et nass haypanishsh sett dakayiyyo masmasiyy;
masmasunt hin hekeshawu kida;
ananno ammann ikkaanessin masmasin.
30 iyyat kaana,
antu lamm tinnaootta an fadusinnin.
31 hin erraat deyiyyu heikk qareell kiyy.
hin heka husslah kodd heka husslahat kida;
heka husslahatenno ishaamin;
hin moontalleett deyiyyu heikk qareell kiyy.
32 hin iyyat akkenne dakay lelin;
hekoddu male nam lelaayy qeeddanniyyu amm hekiyyamu.
33 hin lelaay qeeddanniyyu lamm Moohot shaakketampayt koddaayy ufunaytiyy.
34 oot Moohot laaffoshayy huraassa male daanniyyu maalla,
nam Moohot hit lel Moohaat ishaamin.
35 appat meetayy hoxsaanniyy,
akkan dahenn harkayy qalli ihaay.
36 nam meetaayy amaaniyyu kiyyat parparat qap;
lamm hin meetaayy amaana diinniyyu jiiayta Mooha kela kinnaannina male,
amm kiyyat akkanninamu.