Yesus sapara qaana qalle man sarketate
2
1 lashsh halpattiyyaate huss kelilaate saparaan qaana kidamiyya sarket kiyy;
inkot yesusenno ulla kishsh.
2 yesusenne soolleshayyenno por sarketatep hembamen.
3 por sarketate helpaan ukot woynet ushshe,
inkot Yesus yesuses,
"ukul amm ukot woynet heqapanemu!"
ikidit.
4 Yesus lamm,
"inko,
maanan hed olle qapa?
helpaawu sanu amm hedehaadenemu" he ikid.
5 helpaanette inkoshiyy erkamampayyaan ulla kiyyass,
"iyaan iyyat inn kidiyyu erkayaa!"
hekidit.
6 qum tampet miilawa ayhuta mittass,
okkawwa haq iyaan kakkaan,
daka ila soorumam leh ulla kiyy;
okkawaan mashshaddoss harsa lakk shoke halpatt qapin.
7 Yesus erkamampayyaass,
"okkawwaan qalli haq innaakaa" kid;
iyyaanno haka kapaddotess okkawwaan innaaken.
8 sekannakules Yesus iyyaass kide,
"ammann kishshaa illo kaadaytaayni dayyaa."
iyyaa illo kishshen iddayyen.
9 helpaan kaadayt erkamampayya haq se ukot woynet kodd lokade,
aha ikkim it deit amm heufunaademu;
hekoddu male erkamampayyaan haq orraap heupan.
semmaalla kaadaytin haypanish sett hemb illo sedep ikid,
10 "namat dahenn turaqattaass ukot woynet it meawut dehannin.
helpaan orr hin hembam quuhanekules,
it meawa diinnishshu dehannin,
att lamm ukot woynet it meawut hak ammannet ulli olashitt."
he ikid.
11 Yesus shammota se hirayta koddit huss kelilaate sapara qaana qalless erkayy;
sedenn serkoyy akkiyy;
soolleshayyenno iyy amaanen.
12 sekkannakul Yesus inkoshayyenne insharadaayyanne soolleshayy olle qifirnaahomep aan;
ullasenno lashsh qoj olad.
Yesus orr man miilot talli kapiyya kashanniyy ariyy
(mati. 21,12-13; mar. 11,15-17; Luqaa. 19,45-46)
13 oot serkila faasika ayhuta dehaaden maalla Yesus yerusaalemep aan;
14 man miilot alta orr hormadaanne helemmaanne elela kashiy,
settep lamm iyyaan ulli qaai kodashshet oohiy akk.
15 helpaanette qajjet wotoraat sooromad illo orranne helemmaanne hormadaanno dahenn man miilot alta allsohashshiyy;
kodashshet oohampayya turanno kodashsheshaddu allpulpul;
tsarabeesaddaaddonno allququpaappiy.
16 orr se elela kashiyyossenno,
"hin dahenn ayteesh allqeeddadaa!
man appaawu man kapiyaati kodda diiyyaa!"
iyyaa kid.
17 helpaanette soolleshiyy se,
"hooxsunt antu oot manaytet qapu apittap an doohinnin" kidant tsaafant immashsh oorsaden.
18 sekannakuless hayyot ayhuta yesusess,
"att hin erkasa hayyotum qafnaattaaytess shammot ashshann kishshu innu akkinnint?"
he ikkiden.
19 Yesus illo,
"man miilot sed allpaqiyyaa,
antu lashsh halpattassin mitaatinnina dihina" he iyyaa kid.
20 iyyaanno,
"man miilot sed dihaass par hund afurenn leh ushiyy;
att lamm lashsh halpatt qalless dihaatemu?"
he ikiden.
21 hekoddu male hin Yesus,
"man miilot" kid oot dakinshayyet lelin kida.
22 helpaan Yesus toxt ila sohad kanna soolleshiyy hin iyyat lel immashshxoorsaden;
sed minan hin Yesus lelenne iyaan matsaafa miilot qari tsaafam amaanen.
23 helpaan Yesus serkila faasika ayhutaate yerusaaleme kiyyo,
shammot se iyyat erkayy akkaaddonn orr lek iyy amaanen.
24 hekoddu male oot Yesus orr dahenn upu maalla,
amm iyyaa qari amaantet hekashademu.
25 iyyat iyaan mutsura nam qalle kiyy dahenn upu maalla,
ikkim aynonno oot namati akkan shokkooh naf iyyi lelinoss amm fadiyyamu.