lel masmasunt
se yewannis tsaaf
lel kiyyatat
1
1 turaqataass lel kiyy;
lel settenno Mooha kapa kiyy;
lel settenno Mooha kida.
2 iyyat turiqataass Mooha kapa kiyy.
3 lel settenn Moohot akkan heikk uum;
hin uumam dahenn ila akkan iyy male uumam shokkooh naf amm hekiyyamu.
4 iyy ila kiyyat kiyy;
kiyyat settenno namass attumat kida.
5 attumat poorinnat ilass attumannin;
poorinnatanno amm attumatin hepushshemu.
6 nam Mooha kapa hitam,
mahhaayy yewannis kidamiyyu kiyy;
7 iyyat ikkim namat dahenn maanyetumaayyin attumat sett amaaninoss,
oot attumatati maanyet kodda dey.
8 iyyat oot attumat settetess maanyet kodda dey male,
amm iyyat mashshayyess attumatemu.
9 attumat shaakket hin nam dahenni attumanniyyu husslah qarop deyaalle kiyy.
10 iyyanno husslah qara kiyy;
husslahatenno iyyann uumam;
orr husslah lamm amm iyy heufunaademu.
11 kafaayy kapop dey;
hekoddu male,
kafaayy amm iyy heqeeddademu.
12 lamm orr se iyy qeeddad amaan dahenn ikkim medda Mooha koddinaness hayyotum iyyaa day.
13 iyyaa moohaann daladen male,
amm diik ila shoke has namatenn shoke has diirtatennemu.
14 lel setteno nam kodd,
dikkuma Moohaatenne shaakketin innaakkod otanshaynu ili kallaad;
innonno serkaan meetaayy shokkooh appayy kapa qapun akkin.
15 yewannisenno,
" hin antu 'hin an kanneeshsh deyiyyu,
oot iyyat an turin kiyyu maalla,
an qara tawa' kid inn lel,
toare hin iyy" hekid ullup.
16 innu dahaynonn dikkunshayy innaakot qaran daayy qari daayy qeeddann.
17 halitt muus kapann daassam;
dikkuntanne shaakket lamm Yesus kristoos kapann deyen.
18 nam Mooha akk shokkooh naf amm hekiyyamu,
hekoddu male meetaayy shokkooh se Mooha appa kapa kiyyu iyy patpahiyy.
maanyetum yewannis heka ahalisampayt
(mati. 3,1-12; mar. 1,1-8; Luqaa. 3,1-18)
19 helpaan hayyot ayhuta,
suukamma man Moohaatenne hotta lewia ila orr yerusaalemeeshsh yewannis kapop hiten illo,
ikkim "att ayno?"
kidinan iyy kaassanninan kodene,
20 "amm antu kristoosemu" hekid maanyet kodd male amm hemarmemu.
21 iyyaanno,
"kat illo att ayno?
eliyaasemu?"
hekiden kaassaden.
yewannis illo,
"erraytu" kid iyyaa mitaattiyy.
iyyaa lamm,
"att himampayt se op deyina kidiyyanemu?"
he ikkiden.
iyyat illo,
"erraytu" kid iyyaa mitaattiy.
22 iyyaa lamm,
"att illo ayno?
orr se innu hitess ikkimin lelinnoss,
att iissess aynu kidin" ikkiden.
23 iyyat illo,
"antu qum isaayaas himampayt lelep,
nass nam se,
'paana pold pahiyyaa!
' kidiyyu lak patpatt kiyyu qalle ullupiyyu" hekid.
24 orr faraset hin hitam ilanno shakkan,
25 "et att kristoos shoke eliyaas shoke himampayt se op deyina kidiyyan kodda diitto,
maanaass ahalila ahalin?"
hekiden kaassaden.
26 yewannis lamm,
"antu haqannin ahalinnin;
hekoddu male iyy inn ufunaatta diitten otanshayn talli ell.
27 iyyat iyy an kanneeshsh deyiyyu;
amm antu sur hopooyy naf furisaass henkiyyamu."
hekid iyyaa mitaattiy
28 hin dahenn kodden,
sapara pitaaniya hin por se yewannis ull ahalinniyyo haq yortaanosess dind lashsh yaamishshun kiyy qalless kida.
Yesus laah Mooha
29 paarreshadde yewannis Yesus iyy kapop deyiyyo akk illo,
"toare,
laah Mooha iyy juppot husslah allipatinninu!
30 'hin antu hin an kanneeshsh deyiyyu,
oot iyyat an turin kiyyu maalla,
an qara ikkaaness taw' kid inni lel hin iyy.
31 amm ananno mashshawoss turann iyy henxupamu;
hekoddu male ikkim iyyat siip israaeletat akkaanninossin antu haqin ahalisan dey."
kid.
32 ukkannassenno yewannis sedep kid maanyetumaayy lel,
"laaffot miilot elela pahannaatt moontalleett lekkannishshu iyy qari haysannishshon akk;
33 amm antu mashshawoss turann iyy henxupamu;
hekoddu male hin haqin ahlisa an hit,
'se laaffot miilot iyy qari lekkannishshonne iyy qari haysannishsho att akkishshu iyy laaffot miilotin ahalinninu hin iiy' hekid ani lel.
34 ananno sedin akk illo iyyat meet Mooha koddaayyi maanyet koddin."
soollet Yesus hekat hiraym
35 paarreshadde lamm yewannisenne soollet lakk ollenn ulli ellen;
36 Yesus iyyaa kapin tarpiyyo yewannis akk illo,
"toare laah Moohaat!"
kid.
37 helpaan iyyat sedep kidiyyo soollet yewannis lakk dakayen illo Yesus kanni aanen.
38 Yesus lamm ikkanneesh mijir kid,
iyyaa iyy kanni deyiyyane akk illo,
"maana fadin?"
iyyaa kid.
iyyaanno "rappii!
att aha kalaannin?"
hekiden (rappii kidot kollisampayt kida).
39 iyyat illo,
"hooyaa,
tooyaa" iyyaa kid.
iyyaanno heaanen por se iyyat ulla kallaanniyyu akken illo awusette iyy olle nakayen;
essete uldatayya kela saatet hundap kishshu koddaatt.
40 soollet se lel yewannis dakay Yesus kanni anta hir ila iyy shokku intriyaas,
kafitt simoon se betsiroos kidamet.
41 intriyaas turaqattaass kafittaayy simoon kapop aan illo,
"innu mesihishshin akkann!"
ikid.
(mesihishb kidot kristoos kida.)
42 sekannakuless intriyaas simoonenn Yesus kapop dey.
yesusenno heillisad tooy illo,
"att meet yoon simoon;
hekoddu male sekanneeshsh kefa kidamint" ikkid.
(kefa kidot kap kriketatenn betsiroos kida;
betsiroos kidot lamm shilk kida.)
Yesus filiboosenne natnael hemb
43 paarreshadde Yesus kelilaap anta fad;
filiboosenno akk illo,
"an kanni hooyii" ikkid.
44 filiboos qum intiryaasenne betsiroosep nam sapara petesaaytaat kida.
45 filiboos natnael akk illo,
"iyy muuset ootaayy matsaafa halitt qalli tsaaf,
himampayyaanno matsaafa him qalli tsaafen,
Yesus nasratishsh meet yoosefin akkann" ikid.
46 lamm natnael,
"nasrete akkan dikk akkaanninanemu?"
he kid.
filiboos illo,
"hooyii,
tooyii" ikkid.
47 Yesuset natnael iyy kapop deyiyyo akki illo,
"toare iyy shonkum dap israaelishsh shaakk!"
hekid ootaayy lel.
48 natnael lamm,
"aha an ufta?"
heikkid.
Yesus illo,
"filiboos hed hemba tureeshsh att qoyr peleset kela kishshon hed akk" hekid immitaattiyy.
49 helpaanette natnael,
"kollisampaytallo!
att meet Moohaat!
Daam israaeletat!"
he ikkid.
50 Yesus lamm sedep kid,
"att amaant,
oot antu,
'qoyr peleset kela att kishshon hed akk' kid maallamu?
akkan sed qara tawu akkint.
51 shaakket shaakketin inni kidin,
moont qahisamishshu hitaymiyya Mooha,
meet nam qara fayyanniyyanenne lekanniyyane akkintan" he ikkid.