lel masmasunt
se Luqaas tsaaf
1
1 hed se serkisam tofiloosello!
torroot oot iyaan otanshaynu qalli kaysaadet akkinnishshu orr lek hetsaafen.
2 hitaym sed orr innu tarpiy,
iyyaan hiraym qara hirad indan akkenne erkamampayya lel Mooha kodd kida.
3 settep lamm ananno akkan dahenn hirayteell kann fuqan torroot sed orkanni pahisan hedi tsaafa ani dikkaad.
4 iyaan antu maalla sedep kodenno,
lel Mooha hin att kollit shaakket koddaayy ikkim ufnaannintu fadaann kida.
dalata yewannis heka ahalisampaytat hitaymishsh turiqatta lel
5 sapan herootis Daam huss yihuta kodde suukamma man miilot ila suukishsh sakaariyaas kidamiyyu qootan suukum appiya ila kiyyu kiyy.
iyyat dakusot hotta aron ila dalatt elsapeet kidamishshu qapa.
6 iyyaanno lakkaddonn Mooha turass iyyaan tsillot qap illo acacanne halitt Mooha dahenn haasutta male lushanniy kida;
7 oot elsapeet haay daft maalla,
amm medda heqapanemu.
lamm lakkaddon heqimaayumen.
8 helpaanette erkama suukum man miilot tara sakaariyaas kida.
semmaalla sakaariyaaset erkama suukum Mooha turi erkasa qara kiyyo,
9 qum halitt suukum man miilotatep,
man miilot tallop kala illo hitsaana doohisaass hitsot iyyi pei.
10 helpaan man miilot tala hitsaanot doohiyo,
siipat dahenn altass ellin Mooha dinkamannin kida.
11 hitaymishsh Mooha por se op uqqari itsaana doohinniyan kapass dind miskitt qari ell sakaariyaasi akkaad.
12 helpaan sakaariyaas hitaymishsh se akkekuless henah illo ikkaan huur.
13 hitaymishsh settenno sakaariyasess kide,
"sakaariyaas!
huura diiyii,
dinkamaatt hedakaysamaad;
dakusoshitt elsapeet imm hedi haayinta;
mahhayyenno yewannis kidinta qari kodinta.
14 dalattaayyen hedess masmasunt kaant dakaysamaannina;
orr lekenno dalattaayyen settep masmasinan.
15 maana maalla,
iyyat pold turass nam kaan koddina;
ukot woynetatenne hepil iyaan nam taaranniy dahenn amm ukinamu;
dalatta male helpaan iyyat kard inkoshayy qalle kiyyo,
iyy laaffot miilotin innaakood koddina.
16 iyyat siip israaelet ila orr lek por pold por moohaaddotep mitaatinnina;
17 qum eeliyaasep laaffotanne irrotin kinnaattaann,
mutsura appadatenne mutsura medda orqudop dehannina,
orr se acac dakaya diinniya por ufnaata tsillampayyaatep mitaatinnina;
illo siipanno hayyisaan ikkim pold dikkisanninan kodina."
18 sakaariyaas lamm hitaymishsh settess,
"lel hin shaakket koddaayy maanaannn ufunaanina?
ananno henkerd,
dakusoshawonno heqimaayunt" he ikkid.
19 hitaymishshhinett lamm aset kid immitaatiyy,
"antu kapireel,
iyy Mooha turi elliyu,
lamm lel masmasunt hedi lela Mooha kapa hitam kida.
20 att lamm lelaawu se helpooyy paiyane kaysaanninu amm heamaantemu,
semmaalla hin antu hedi lel hak helpooddu painan iyaa kaysaanninaness iyy kaptucam koddinta;
amm ishaama fottihintamu" he ikkid.
21 helpaanette oot sakaariyaas man miilot talli olad maalla,
siipat shammattaann iyy lushannin.
22 helpaan sakaariyaas man miilot tallaashsh altop luume,
orr se ulla kiyyu olle ishaama amm hefottemu.
semmaalla iyyaa ikkim man miilot talla raaet iyyi akkaatess ufunaaden.
iyyat illo harkan iyyaa olle ishaamatta hir.
sedep kodaann kap tuccaman olad.
23 helpaan iyyat tara erkamaayy kaysiy kanna sakaariyaas manayyep kal.
24 helpaan qoji kannakuless dakusoshiy elsapeet medda koyatt illo hak leha henett talla sohatta male olatt illo kidite,
25 "Moohot dikkunt sedep kishshu ani erkay;
otant siip ila deesot se an qara kishshu an qara allhattiy."
kapireel hitaymishsh dalatta Yesus lel
26 elsapeet medda koyatte leha lehiyya qara hitaymishsh kapireelet Mooha kapaatt sapara nasireetep hitam.
nasirat saparaan huss kelila qalle kiyy kida.
27 hitaymishsh hin hitam,
inant issin kishshu maariyaam kidamishshu kapop.
it imm hotta taawit ila kodd yoosef kidamiyyoss rapant.
28 hitaymishsh settenno maariyaam kapop dey illo,
"hed se qoran akkatt,
andot hedi kodditu!
poldat hed olle kiyy [att iskatt ila it qorant koddit]" iti kid.
29 it lamm ishaama hitaymishshatenn ikaaness nahit illo,
"hin paanussa ashshann kiyyaa kat?"
kiditt qaapatta hirt.
30 hitaymishsh hin illo sedep iti kid,
"maariyaame,
huura diiy!
Mooha turass kaanusa akkatte.
31 qomaannihinta imm haayinta;
mahhayyenno Yesus kidinta inhembinta.
32 iyyat nam kaan koddina;
meet rumma meet Mooha kidamina;
Mooha poldanno daamum appayy heka taawit iddaannina.
33 haka parparatessenno israaelet qari daamumina;
daamumayyenno amm muutasha heqapamu."
34 maariyaam lamm hitaymishsh moohaatess,
"antu isseninkiyya,
hin lamm ashshann kodda fottinan?"
hekidit kaassatt.
35 hitaymishsh illo,
"laaffot miilot hed qarop deyina,
irrot Mooha hekat rummaatenno hed qari kaattunnannina.
semmaalla meet hin att haayintu iyy miil,
meet Moohaat kidamina.
36 kafitteshayt elsapeet it haay daft kidaman kallaatt naf ammann kerdana ila medda kodatt,
imm kardalle qafta;
hak it medda kodatteeh toare leha lehiyaadd kida.
37 iyaan moohan pushiyy amm hekiyanemu."
38 ukkanna maariyaam,
"toare antu erhaytet moohaate,
qum kapayteti ani kodditu" hekidit immitaattit.
helpaanette hitaymishsh settenno it kapa reehad taw.
maariyaam elsapeet kaassattaass ant
39 helpaanette maariyaam elsapeet kaassattaass paat utawaate huss yihutaatep shakar kiditt ant.
40 man sakaariyaas tallop luunt illo paanussa elsapeeti dehatt.
41 helpaan elsapeet nass paanussa maariyaam dakayte,
meddaan it qalle kiyy hetottoren;
elsapeetenno laaffot miilotann inanakott;
42 nassaddenno erri qeett illo,
"att iskatt ila it qoran akkatt.
meet att haayintonno iyy qoram.
43 inkot poldaawu an kaassatta deyaadd anass serka ashshann kiyya?
44 antu nass paanusaatt dakaye,
meddaan analle kiyy masmasuntann tottoren.
45 oot att iyaan Moohot hedi lel ikkim iyyat kaysinninu amaant maalla,
it hartott koddit."
dinkamanne aypila maariyaam
46 maariyaam asset kidit,
"nafseshiyyu Mooha serkinnin
47 antu moohaawu qoricaawonn masmasinkiy;
48 Moohot an erhateshayy se tuffashant tooy,
awweesh hirattan dalashot dahenn it hartoott ani kidinan;
49 Moohot irrampayt erkamaan kaan ani erkay.
mahhayyenno iyy miilaw kida.
50 Moohot orr iyy huuriyoss dahenn
dalashotaashsh haka dalashotati mutsurottaayy akkinnin.
51 harkayy se qimenn irroshayy heakkiy;
foojampayyaanno qaapaaddu olle allpulpul.
52 peashisampayyaan kakkaan por serkaaddu qara all lekkiy;
orr tuffashamenno lamm serka kaan qari haay.
53 orr tuff iyaan dikkann quuhiy;
shorohot lamm harkaa patt hayyad.
54 Moohot mutsurootta iyyat aprihaamenne hottayy hak parparat akkiyy immashshioorsattaann
erhaytaayy israaeli hes.
55 sedenno iyyat maalla kod,
irraxatet se iyyat appadaannu dayy kaysisass kida."
56 maariyaamenno leha halpattass elsapeet kapa kallaatt illo ukkanna manaddep qareeshsh mitaat kalt.
dalatta yewannis heka ahlisampayt
57 helpa haayaad paiyene elsapeet imm haayt.
58 qahittaaddenne kafaadd,
poldat it mutsuroottaayy dakayen illo it olle masmasen
59 meet hin dalade lashsh lakkushiyaate karrasamiyyo iyyaa kapi akkaaden.
meet settenno ikkim mahh appayyetin hembaminoss sakaariyaas kida hinnaaden makess.
60 inkoshiyy lamm,
"amm koddinamu,
mahaayy yewannis kidama fadusinnin" hekidit.
61 orr hin illo,
"kafayt ila nam mahh sedin hembam amm hekiyamu ukul?"
iti kiden.
62 sekannakuless,
"meetaatt ikkim aynu kidaminu hembaminoss fadin?"
hekiden akkilan appa meet kaassaden.
63 sakaariyaasenno iyaan op uqqari tsaafinan ikkim iyy daanninaness kaassad,
"mahhayy yewannis" kid tsaaf.
orr ulla kiyyonno dahenn sedenn shammatta patt kodden.
64 uilaxataah arrap sakaariyaas fursam iyyat ishaama fott;
moohassenno aypila daatta hir.
65 sed qara sohattan qahittaddonno dahenn huuren;
ishaamanettenno huss yihutate paat utawatess dahenn dakaysamaden.
66 orr ishaamaan dakay dahenn,
"meet hin maana koddina kat?"
hekiden mutsurooddu qalleetta shammaden.
hin kodden,
oot hesaym Mooha shaakket iyy olle kiyyu maalla kida.
him sakaariyaas
67 appa meet sett sakaariyaaset laaffot miilotann innaakood illo sedep kid him lel,
68 "oot Moohot mutsuroottayyin siipayy tooy diniy maalla,
Mooha israaelet,
pold heaypisamu!
69 hotta erhaytaayy hotta taawit ila dinisampayt kaan innu sohashiy;
70 qum iyyat olo hirad kap himampayya miilampayyaatin lelep;
71 harka olishshadannotenne heka orr innu qara hittinniyyu kela innu diniy;
72 sedep kodayyenno appadaannu mutsuroottaayy akkisaassenne
kakaan miil iyyat lel kaysisa qaapattan kida.
73 kaka hinenno appaynu aprihaamess ashkotin dayy;
74 huura male ikkimin iyyi erkanninoss
irraxatet setten hark olishshadaannu kela innu passiyy;
75 settep lamm kiyashaaynu se innu husslah qara qafnaanninu qalless dahenn,
ikkimin miilumanne tsillotin Mooha turi kallaata fottinoss kida.
76 lamm att meet,
himampayt rumma heka Moohaat kidaminta.
pold paana soorumass turaqattinta tureesh anninta.
77 poldat jupposhaddu alli iyyaa diittaann
ufunat dina siipayy daannina.
78 moohannu iyy nami mutsuroonniyyonne lahalattot koddayyen attumat dina erreett ikkim innu otawintoss kodina.
79 iyyat orr se poorinnatanne kaatta toxt kela kiyyoss dahenn attumannina;
antonaannonno por andotatep pahinnina."
80 meet settenno hekamm,
qaapannenno qim;
hak iyyat siip israaelet turop erkaman akkaanninossenno lak patpatt kiyyu qalless kallaad.