bilaatsoos kapop yesusin aanen
(mar. 15,1; Luqaa. 23,1-2; yewa. 18,28-32)
27
1 etikel tuqqanayyann kaadayya suukammaatenne qimaayya siip dahenn Yesus ikusisa suladen.
2 yesusenno hidden inxaanen illo peashisampayt se bilaatsoos kidamiyyu tarpiyyen dayyen.
3 yihuta se iyy tarpiy dayyenno Yesus qari horat toxt quuramaadd akke iyyass dakaysamaatt iyyat illo pirret hund halpatt sett kaadayya suukammatenne qimaayya siipat allmitaattiyy day;
4 illo,
"nam nayqunt dap toxt tarpisa daattawonn juppotin erkay!"
kid.
iyyaa lamm "maana innu rakkusiy!
hin rakkotayt!"
he ikkiden.
5 iyyat illo pirret hund halpatt sett man miilot talli allpulpul aan issiipiy toy.
6 kaadayya suukammatenno kodashshet sett qeedden illo,
"kodashshet hin oot it kodashshet diik koddit maalla,
amm kodashshet man miilot olle laha innu hedaassantemu" kiden.
7 ollennenno mariyaden illo ikkim kalaytass por poosa kodinu ul okkoot kodampaytatin pidden.
8 semmaalla hak awetess ul hin "ul diikat" kidamin hembamin.
9 essete him ermiyaas himampayt,
"heriy medda israaelet ibadden pirret hund halpatt qeeddaden;
10 qum poldat an acac mitti ul okkoot kodampaytati dayyen" kid him kaysaad.
bilaatsoos turop Yesus dehayyen
(mar. 15,2-5; Luqaa. 23,3-5; yewa. 18,33-38)
11 essete Yesus peashisampayt turop dehaad illo iyyat,
"att Daam ayhutaatemu?"
kid iyy kaassad;
Yesus illo,
"qum se att kiditepa" ikkid.
12 lamm helpaan kaadayya suukammaatenne qimaayya iyy kasasiyyane amm akkan shokkooh naf hemitaattiyemu.
13 essete bilaatsoos,
"iyaan lekin hed kasasaaddu dakayishotemu?"
he iyyi kid.
14 Yesus lamm hak peashisampayt hin ikkaan shammanninoss amm lel shokkooh naf iyyi hemitaattiyyemu.
toxt Yesus qari quuram
(mar. 15,6-15; Luqaa. 23,13-25; yewa. 18,39-40; 19,1-16)
15 peashisampayt hinet parpar kapa helpa serkila faasika ayhutaate orr hidam ila nam siipat ikkim iyyaa fursaminu fadiyyan ifurisa koll.
16 essete nayqisampayt ufunasham,
"parpaan" kidamiyyu hidan ila kiyyu kiyy.
17 semmaalla helpaan iyyaa orqudiqapamene bilaatsoos,
"aynu inn furisa fadin?
parpaanemu shoke Yesus se kristoos kidamiyyu?"
he kid kaassad.
18 iyyat maalla sedep kid,
Yesus tarpisa daataaddu maxashannumin koddaayy oot iyyat upu maalla kida.
19 helpaan iyyat sheedda horat quura qari lae haypaashiyy,
"nam sed minann hallupu awwadd ommotannin ikkaan rakkade,
nam hin miilampayt,
akkan shokkooh naf eiiy qari koda diiyi" hekidit hitaym iyyi hitt.
20 hekoddu male kaadayya suukammaatenne qimaayya,
"ikkim parpaan innu hayii!
Yesus toyu!"
kidinan kaassanninaness siip sossopen.
21 peashisampayt illo,
"iyyaa lakk ila ikkimin aynu inni furinninoss fadin?"
kid siip kaassad.
iyyaa lamm,
"parpaan!"
kiden immitaattiyen.
22 iyyat illo,
"Yesus se kristoos kidamiyyu ashshann koda an fadusinnin?"
iyyaa kid.
iyyaa lamm dahenn,
"herahhamu!"
kiden immitaattiyen.
23 peashisampaytinett,
"maanaasse?
nayqunt iyyat erkayy maaniyya?"
iyyaa kid.
iyyaa lamm,
"herahhamu!"
hekiden lekiyyen ullupen.
24 semmaalla bilaatsoos ishaama hin siip orqari sohashshisa pateeshsh iyaan qunda dap koddaaddu akkekuless haq qeedd harkooyy siip se ilaashsh all jiqad illo,
"antu toxt nam sed ila amm henkiyyamu;
inn inkaasawusamina!"
kid.
25 siipat lamm dahenn,
"hin toxshayy minin deyiyy innonne meddoonnu qari koddeni" he ikkiden.
26 essete bilaatsoos parpaan furiy all iyyaa hayy;
illo Yesus litsootin kaypusiy kanna ikkim rahhaminu iyyaa tarpiyy dayy.
wottaattarat Yesus qarass beejjiyaden
(mar. 15,16-20; yewa. 19,2-3)
27 essete wottaattaradda peashisampayt setti,
yesusenn man peashisampayt altop aanen illo wottaattarataddaanettenno dahenn Yesus pat mantaren.
28 uuwwashayyenno pata furiyyen illo uuwaat roomat uuwashshiyen.
29 qoyqoyt quddetatenno maren,
illo mashshayy qari ihaayen;
harkayy miskittishshann halitt layma qapusiyyen illo turi kilpiyattan,
"Daam ayhutaatello!
andot hedi kodditu!"
kidan qari beejjiyaden;
30 ambushshanno ili shuhaden illo halitt se qara qeedden mashshayy qarin daddawen.
31 helpaan iyyaa qari beejjiyaden kanna uuwaat se roomat pata allfuriyen illo uuwaatayy uuwashshiyen;
allrahhaassenno inxaanen.
rahhama Yesus
(mar. 15,21-32; Luqaa. 23,26-43; yewa. 19,17-27)
32 iyyaa ulla sohattaalle kiyyane qereenishsh simoon kidamiyyu akken illo ikkim masqalet se Yesus uqqari rahhaminu hainninu ikkoomen.
33 sekkanna lamm por se kolkoota kidamiyyo paen;
furilaayyanno "hilayyat mashsh" kida.
34 ikkim ukot woynet se qayyot olle lahant ukinossenno iddehayyen;
iyyat lamm kapanneeh kod male amm uka hefademu.
35 helpaan iyyaa Yesus rahhen kanna uuwashayy qarass hitsa kashaden olliqooten.
36 illo ulli qaaen iyy qari luushin.
37 dapat iyyat inkasasam ufnaytisaass tsaafa,
"hin Yesus Daam ayhutaat" kidiyy tsaafen illo masqalet se iyyat qari rahham qari mashshayy mineett ulli daaen.
38 essete ewwa lakk,
iyy shokku miskittaayy qarass,
iyy shokku pihitoshayy qari rahhen.
39 orr ullin tarpiyyonno mashshaddu kilinkilisannin otin,
40 illo,
"hed se man miilot paqinnin lashsh halpatt dihiyyu,
intu iddiniyye!
et meet Mooha koddito intu masqalet qara lekkado!"
kidan qari beejjiyaden.
41 paana sedenn kaadayya suukammaatenne kollisampayya hailttatenne qimaayya ollenn sedep kidin iyy qari deffeeqa lelannin.
42 "orr pil hediniy;
mashshayy lamm amm iddinisa fottiyyamu;
et iyyat Daam israaelet koddo,
intu ammann masqalet qara lekkado,
innonnon iyy amaaninna!
43 iyyat Mooha amaan;
'antu meet moohaat' hekidine et Moohot iyy hoxsaanniyyu koddo intu ammann iyy diniyyo!"
44 settep lamm ewwaan iyy olle rahhamenno iyy otin.
toxt Yesus
(mar. 15,33-41; Luqaa. 23,44-49; yewa. 19,28-30)
45 kallap saatet leheeshsh haka saatet tsinqotatess husslah qara dahenn poorinnat koddit.
46 helpaan it saatet tsinqot koddite,
Yesus,
"elohe,
elohe!
lama sepaqtani?"
hekid illo nass kaanin ullup;
furila lel settetenno,
"moohaawo!
moohaawo!
maanaass all an diitte?"
kida.
47 helpaan orr hin ulli ell sed dakayene,
iyyaa ila orr shokku "toayte eliyaas himampayt a hembin!"
hekiden.
48 esseteeh iyy shokku feel nuuffanb dey illo jaraytin innaak;
shompoqqot qari kod ikkim Yesus ukinu kapi qap.
49 orr shakkan lamm,
"ellaa,
eliyaas deya iyyin hataayin tooyinna!"
hekiden.
50 lamm Yesus lakkiyyaass nass kaanin ullup illo nafseshayy tarpiyy dayy.
51 essete kaarrata man miilot erraat haka lahat lakki qall kaaxam;
hussanno shild;
shilkalla qall kakkaaxamen.
52 poosaanno qahisamen;
miilampayyaan raaw ilanno iyyaan lek toxt ila sohaden;
53 toxt ila sohatta Yesus kanna saparaan miil yerusaalemep kalen orr leki akkaaden.
54 sinkitt tseetatenne hin iyy kapa kiyy Yesus lushiy helpaan iyyaa shilda hussatenne hin kodd akkene ikkaaness nahen illo,
"hin shaakketass meet Moohaat!"
kiden.
55 iskatt lek iyyaan kelila hir yesusi erkanniy lamm por sekaashsh hin koddiy tooyin.
56 iyyaa ila maariyaam mektelishetanne maariyaam inkot yayqoopenne hekat yoosefenne inkot opsaptiyoos kiyy.
mookama Yesus
(mar. 15,42-47; Luqaa. 23,50-56; yewa. 19,38-42)
57 helpaan lashsh ponnaatte shorokitt shokku armaatishsh,
soollet Yesus ila yoosef kidamiyyu dey.
58 iyyanno bilaatsoos kapop dey illo ikkim dakint Yesus idaanninu dinkamad.
bilaatsoos illo ikkim dakint Yesus idaassamintu acac.
59 yoosefenno dakint Yesus masqalet qara lekkiy illo waalt qahnat miiltin dikkiyy;
60 poosa awshiyaan iyyat shilk ila qosh qalli haay;
daka kaanenno kapop katt illo poosaan kapin duh.
61 maariyaam mektelishshetanne maariyaam se shakk,
poosaan mineeshsh ulli laen.
62 parreshadde aww sampata ayhutaate kaadayya suukammaatenne faraset ollenn bilaatsoos kapop aanen,
63 illo kidene,
"polda!
iyaan patindapusisampayt hin helpaan iyyat kiyyatin kiyyo,
'lashsh halpatt kanna toxt ilan sohannina' kid innu mashaoor.
64 semmaalla hak lashsh halpattat ikkim qiminninan poosaayy lushinan acacii;
hin inkinnekuless soolleshayy deyina dakinshayy hashina illo siipass,
'toare toxt ila sohad' kidina.
patandapusilayn lamm hin tureesh qara iyaan taw koddinan."
hekiden.
65 bilaatsoos lamm "toare wottaattara lushinu hekiya;
aanaa illo paana inn ufutan qari lushusiyaa" he iyyaa kid.
66 iyyaa illo aanen daka se qari maatam koden illo poosaan wottaattarin luushusiyyen.