toxt ila sohatta Yesus
(mar. 16,1-10; Luqaa. 24,1-12; yewa. 20,1-10)
28
1 sampata ayhuta tarp kanna lashsh hirayta tappaate (uhute) etikel tuqqan maariyaam mektelishshetanne maariyaam se shakk poosa Yesus tooyaass aanen.
2 essete uilinhaash hussat shild;
hitaymishsh Mooha moontallett lekkad,
daka poosaan kapin duhamenno allkatt illo daka se qari lai.
3 hitaymishsh settenno paqanaap otawin;
uuwaatayyenno haahisaass haahinnin.
4 lushampiyyaanno hitaymishsh se tura huuraann helishattan pukkaap kodden.
5 hitaymishsh settenno iskatt settess,
"huura diiyyaa;
Yesus se rahham ikkim fadishshan henxupa;
6 iyyat amm are hekiyyamu;
qum iyyat turiqatta lelep hesohad;
por se iyyat ulli haayam hooyaa tooyaa.
7 shakar kida aanaa illo soolleshayyess,
'toxt ila hesohad,
kelilaass inn turin qattina,
ullass iyy akkintan!
' ikkida;
toare innassin lel" he iyyaa kid.
8 iskatt settenno huuraanne masmasunt kaantenn ulla sohaden illo soolleshayyi lela feelen.
9 esseteeh lamm Yesus iyyaa mini pai illo,
"andot inni kodditu!"
iyyaa kid.
iyyaa illo iyy kapop dehaaden lukkaayy qari sunken ishshoomaden.
10 essetekul Yesus,
"huura diiyyaa!
aanaa illo ikkim kafaawu kelilaap anninan ilelaa;
ullass an akkinaane" he iyyaa kid.
11 helpaan iskatt hin antona qara kiyyane,
wottaattarada ila karatiddu saparaallep kalen illo hin kodd dahenn kaadayya suukammaati lelen.
12 helpaanette kaadayya suukamma qimaayya olle orqudqapamen suladen illo wottaattarada kodashshet lekit dayyen
13 illo iyyaa kidene,
" 'innu peane soolleshiyy awadd deyen illo hashen intawen' kidaa siipi lelaa.
14 et lamm peashisampayt sed dakayo,
ikkim rakkot inn qarass indeyiness innu iyy qappannannina."
15 wottaattaradaanno kodashshet sett qeeddaden illo qum se op iyyaa lelenep koden;
sedenno hak awwetess orr ayhuta kapa ikkaaness ishaamamin.
Yesus soolleshayyess akkaad
(mar. 16,14-18; Luqaa. 24,36-49; yewa. 20,19-23; er. 1,6-8; 1 qoro. 15,3-8)
16 essete soollet hundann shokkotin por se iyyat lele,
utet se kelilaalle kishshop aanen.
17 helpaan iyyaa Yesus akkene iiss shoomaden;
orr shakkan lamm heshurshuren.
18 yesusenno iyyaa kapop dehaad illo,
"hayyotumat dahenn hussanne moontall ani daassam.
19 semmaalla siip husslah dahenn kapop aanaa;
mahh appaaten,
mahh immaten mahh laaffot miilotatin ahaliyaa illo soolleshawu kodaa.
20 hin antu inn acacenno ikkim lushanninani,
kolliyaa!
toare antu hak muutayta husslahatess helpa min inn ollenn kiyyaannina."
iyyaa kid.