Matiyoos 26

sulat Yesus qari sulant

(mar. 14,1-2; Luqaa. 22,1-2; yewa. 11,45-53)

1 helpaan Yesus hin dahenn ishaam kaysiy kanna soolleshayyess sedep kid, 2 "lashsh lakk kanna lashsh serkila faasika koddaadd heufutan; meet nam rahhamaass tarpisamina daassamina."

3 helpaanette kaadayya suukammaatenne qimaayya siip, man suuka suukamma se qayaafa kidamiyyotess orqudiqapamen; 4 paana iyyaa yesusin qapinan illo ikanninan suladen. 5 hekoddu male "ikkim siipat orqarass insohanniness, lashsh serkila qari kodda amm fadusinnishshamu" hekiden.

iskattet shakk mashsh Yesus qari shittot tiiqit

(mar. 14,3-9; yewa. 12,1-8)

6 helpaan Yesus sapara pitaaniyaate man simoon se turin payloodete, 7 dama dama qara kiyyo, iskattet shakk, fashkot daka se alpastsiros kidamiyyu ila soorumant, shittot heriyatidd tsorin kishshshun Yesus kapop deyt illo shittot se mashshayy qari tiiqit. 8 helpaan soolleshiyy sed akkene hejiiaden, "shittot hin maanaass aypot allpatin? 9 it heriyy kaan qeeddin illo hiyayya daassamaanemu?" kiden. 10 Yesus lamm sedep kidaaddu ufnaadd illo, "maanaass it rakkusinnin? it anass iyaan dikk erkatt; 11 hiiyyaya helpa mitt inn olle kiyyaanninan; antu lamm amm helpa mitt inn olle kiyannihinamu 12 it shittot sed an qari tiiqit, mooka an dikkisaadd kida. 13 shaakketin inni lelin, husslah qara por lel masmasunt sed ulli lelamiyyo dahenn hin it erkatt lamm itnqaapattaass lelaminan." kid.

yihutot Yesus tarpisa daattaass sen

(mar. 14,10-11; Luqaa. 22,3-6)

14 helpaanette soolleshayy hundann lakk ila iyy shokku yihuta asqorootishsh kidamiyyu kaadayya suukamma kapop aan illo 15 "etin Yesus tarpiyyu inni dayyo maana ani daannittan?" ikkid. iyyaa illo pirret shaakk hund halpatt iddihen. 16 iyyat illo esseteeshsh hir helpa dikk iyyat uqqalli Yesus tarpinninu daanninu fadattaalle kiyy kida.

eetot faasikaat

(mar. 14,12-21; Luqaa. 22,7-14;21-23; yewa. 13,21-30)

17 lashsh hirayta serkila laaqqotate soolleshiyy Yesus kapop dehaaden illo, "eetot faasika damaass aylassin hedi dikkinnina?" kiden kaassaden. 18 iyyat illo "helpaan inn saparaallep kalishshane namaayt kapop aanaa illo, 'kollisampayt helpaawu hedehaadene, soolleshawu olle eetot faasika manaaytessin damin hekidin' ikkidaa" kid. 19 soolleshayyenno qum se Yesus ishaam qarass eetot faasika sett ulli dikkiyen. 20 helpaan lashsh ponnaattekuless Yesus soolleshayy hundann lakk olle eetot dama lai. 21 iyyaa eetot damiyyane Yesus, "shaakketin inni lelin, inn ila iyy shokku an tarpinnina daannina" hekid. 22 soolleshiyy illo ikkaani dappisan, "polda, an koddinanemu?" kidan shokkushokkotaddo iyy kaassatta hiren. 23 iyyat illo sedep kid iyyaa mitaattiy, "nam an tarpinninu daanninu, se an olle shomb sed qalle dama qeeddanniyyu kida. 24 meet nam qum it ootaayy tsaafant qarass toyina; hekoddu male nam se meet nam tarpinniyyu daanniyyoss pelawu! nam hin et dalatta diiy kid iyyi hedikk." 25 yihuta se iyy tarpinninu daanninonno, "kollisampayt! an koddinanemu?" hekid. Yesus illo, "qum att kiditepa" ikid.

eetot poldat

(mar. 14,22-26; Luqaa. 22,15-20; 1 qoro. 11,23-25)

26 helpaan iyyaa dama damiyyane Yesus laaqqot qeedd, Mooha aypisad, qall mooss illo soolleshayyess, "hindaa damaa! hin sohaawu" kid iyyaa day. 27 waalletanno qeedd Mooha aypisad, iyyaa day illo, "dahetaynin waallet sed qalle ukaa; 28 hin diikaawu heka kaka awshiyya se oot diissima juppot nam heikk maalla alltiiqaminot. 29 antu lamm innassin kidine, hakan daamum appaawu qalle woynet awshittet inn olle ukinoss sed kanneeshsh woynet sed amm lakkiyya ukinhinamu." 30 helpaan iyyaa laalet laaladen kanna utet ekertada qarop fayyaden.

Yesus ikkim betsiroos iyy marmanninu lel

(mar. 14,27-31; Luqaa. 22,31-34; yewa. 13,36-38)

31 essete Yesus soolleshayyess, " 'shinkaytin dawina, ikannina; heelt helemmaatenno purjaajint' hekidant tsaafante; awaddat sede dahetaynen an alldiinnintan. 32 hekoddu male etin toxt ila sohado kelilaapin inn turin qattina annina." hekid.

33 betsiroos lamm, "et orr pil dahenn all hed diiyyan nafe, amm antu all hed diinninhinamu" hekid immitaattiy. 34 Yesus illo, "shaakketin hedi lelin, aww awadd lukkalot iia turann halpattann an marmannint" ikkid. 35 iyyat lamm, "et hed olle toya naf fadusinnishshu koddo toyinhina male, amm hed marmanninhinamu!" he ikid. soollet se hattenno dahenn sedep kiden.

dinkam Yesus ketesemaane

(mar. 14,32-42; Luqaa. 22,39-46)

36 essete Yesus soolleshayy olle por se ketesemaan kidamiyyop aan illo iyyaa ulla paiyyene soolleshayyess, "antu ayteeshin annin dinkamannina inn ari laxaa." kid; 37 illo betsiroosenne medda saptiyoos lakkenn iolle aan, ulla lamm dappisaanne baaquura hir. 38 illo, "mutsuraawu dappet kaantenn toxt qarin paen; ari ella qimaa lushadaa." iyyaa kid. 39 iyyaa kapa jawshayi sekaad aan, miintayy lahan qappad illo, "aappo, et fottaminto waallet rakkot sed an kapa tarpitu; hekoddu male qum hasaayt qari koddu male, hasaawu kodda diiyyu." kid dinkamad.

40 lamm helpaan iyyat soolleshayy halpatt se kapop mitaat deye, hepeaden iyyat akk illo betsiroosess, "amm saatet shakkaah nafi an olle qima lushatta hefottitenemupa? 41 ekkawsamaallep kala tura qimaa dinkamadaa; laaffot shaakketass hedikkisatt; soha lamm tashshampayya" ikkid.

42 Yesus lamm lakkiyaassenno sekaad aan illo, "aappo! waallet rakkot sed antu qeeddatta male et tarpa fottama diinnintu koddo, hasaayt koddu" kid dinkamad. 43 ammannenno helpaan iyyat qaraashsh mitaat deye oot peot indaaddu tashshusitt maalla, iyyaa pead qarass pai. 44 settep lamm heaan qum se iyyat tureeshsh dinkamadep halpattiyyaassenno dinkamad. 45 ukkannanno soolleshayy kapop mitaat dey illo, "sanu peot ila kishshan haysannimu? saatetin hepaitt! toare, meet nam hark juppampayya qalless tarpina daassamina. 46 sohadaa innu annu! toare hin an tarpinninu daanninu hedehaad!" iyyaa kid.

tarpisama daassamaanne qapama Yesus

(mar. 14,43-50; Luqaa. 22,47-53; yewa. 18,3-12)

47 helpaan Yesus sed ishaama qara kiyyo, yihuta hin soolleshayy hundann lakk ila iyy shokku kodd hedey; iyy ollenno orr lek iyyaan pillawanne holholt qapad kiyy; iyyaanno kaadayya suukammaatenne qimaayya siip kapa hitamen. 48 yihuta se iyy tarpinniyyu daanniyyonno orr settess, "iyy inn qapintan, se antu dinkiyyu" hekid ishaak iyyaa dayy.

49 esseteeh dey, Yesus kapop dehaad illo, "kollisampayt! andot hedi kodditu!" kid dink. 50 Yesus illo, "moyshe! hin att maalla deit kaysiyii" ikkid. sekannakul orr hin dey Yesus qapen. 51 helpaanette orr se Yesus olle kiyyu ila ishshokku pillaw pushad illo erhayt suuka suukamma qar lapitt quur. 52 Yesus lamm, "nam pillaw pushanniyyu pillawann toyine, pillawaayt hap tallop allmitaattiyyii. 53 etin appaawu dinkamad kid, afa hitaymiyyoyy hin kumadda lek qareell kiyy anni hita fotta diinnaayyep hedi kinnaanimu? 54 et lamm sedep koddo lel matsaafa miilot hin, 'rakkot qeeddatta iyy fadusinnin' kidiyyu ashshann kaysaannina?" heikkid.

55 helpaanette Yesus siip se ullop deyess, "afa ewwa qapa deyishshanep an qapa pillawanne holholt qapatten deetenemu? lashmin antu man miilot talla kollinniyyu, inn olle kiyyo amm an heqqaftenemu; 56 hekoddu male, hin maalla dahin kodden, him himampayyan tsaafam ikkim kaysaanninoss kida" heikid. essete soolleshiyy dahenn all iyy diiyyen feeladen.

arfayt turop Yesus dehayyen

(mar. 14,53-65; Luqaa. 22,54-55; yewa. 18,13-14;19-24)

57 orr hin Yesus qap man suuka suukamma, man qayyaaffap iyyin aanen; ulla kollisampayya halittatenne qimaayya orqudass qapamen. 58 betsiroos lamm hak altat man suuka suukammaatess por sekaashsh Yesus kanni aan; ullop luum, erhama olle laiyy illo hin koddiyy tooyin. 59 kaadayya suukammaatenne arfayta dahenn Yesus qari horat toxt quurusisa maanyet eerpa fadaalle kiyyan. 60 ukkanna lamm maanyawwa eerpa iyaan lek hedeyen male, amm akkan qari heakkenemu; muutayta qara lamm nam lakk dey illo, 61 "nam hin 'man miilot heka Mooha paqisa illo lashsh halpattalli diha fottinhina' kid" kiden ishaamen.

62 suuka suukammaatenno errop ell illo, "maanaass maanyetum orr sed kanni oorisa diinnin?" kid iyy kaassad. 63 Yesus lamm rui kid. suuka suukamma illo lakkiyyaass, "mahh Mooha kiyyatatennin hed kakusinnin! att kristoos meet Mooha koddaayt innu lelii" ikkid. 64 Yesus illo, "qum att kiditepa; hekoddu male sedeeshsh meet nam miskitt Mooha heka irrampayt qari laiyyo akkintan; settep lamm moontallett urrashshetin deyiyyo akkintannin inni kidin" hekid iyyaa mitaattiy. 65 helpaanette suuka suukamma miirann uuwaatayy ipata kaai illo kide, "toare Mooha qarass otitta lel! innanno otittaayy hedakayten! sed qara tawu maanyet ashshann kishshu fadusinnin! 66 kat maana inni paahnaannin?" iyyaa illo, "toxt iyy fadusinnin!" kiden immitaattiyyen. 67 esstekul ambushaddu iyy ili shuhaden; shoshoomen; pappaalen, 68 illo, "kristoos, aynu hed daw? intu him innu hime!" ikkiden.

betsiroos Yesus marmad

(mar. 14,66-72; Luqaa. 22,56-62; yewa. 18,15-18;25-27)

69 betsiroos man suuka suukamma alta ulli lae erhaytet shakk iyy kapop dehaatt illo, "hedenno Yesus se nam kelila kodd olle kishshipa!" ikkidit. 70 iyyat lamm, "hin att kidishshu amm antu henxupamu!" he kid iyyaa dahenn turi marmad. 71 helpaan iyyat harraash anniyo lamm erhaytet pilet iyy akk illo orr se ulla kiyyoss, "nam hin Yesus nasiretishsh olle kiyy!" kidit. 72 betsiroos lamm, "nam se att lelishshu amm henxupamu!" hekid ashkattan lakkiyya marmad. 73 helpaan qoji kanna orr se ull ell betsiroos kapop dehaaden illo, "ishaamaatt ishshaahmannine shaakketass hedenno iyyaa ila iyy shokkupa" ikiden. 74 essetekul betsiroos, "amm antu nam sed henxupamu!" hekid ippishaanne ashkatta hir. esseteeh lukkalot iixi.

75 betsiroos illo lel se Yesus, "lukkalot iia male, halpattann an marmannint" kid immashioorsad illo altaash sohad qaydid pooy.