him se Yesus oot paqisama man miilotati lel
(mar. 13,1-2; Luqaa. 21,5-6)
24
1 lamm Yesus man miilot talla sohad anniyyo soolleshiyy mannaan man miilot alta dakallan diham iyyi akkisaass kapop dehaaden.
2 iyyat lamm,
"hin dahenn akkikkishshanemu?
shaakketin inni lelin,
daka daka qari dawam tiiqama male amm ulli lainamu."
hekid iyyaa mitaattiy.
rakkotanne kann arsama dexema pold tureeshsh deyinu
(mar. 13,3-13; Luqaa. 21,8-19)
3 helpaan Yesus utet ekertada qari laiyye,
soolleshiyy hawwass iyy kapop deyen illo,
"hin awame koddinan?
helpa dexemaatatenne muutayta husslah maanaannin ishaakina?"
kiden iyy kaassaden.
4 iyyat illo sedep kid iyyaa mitaattiy,
"namat patann inn indapusinnin illuushadaa!
5 orr lek,
'antu kristoos!
' kidinan mahhaawun deyinan;
orr lekenno patin dapusinninan.
6 toranne ishaama torat dakayintan,
hekoddu male naha diiyyaa.
hin koddaaddu amm hatinamu;
hor muutaytoot amm sanu hedehaademu.
7 siipat siip qarass,
daamumat daamum qarass sohannina;
por por ilassenno laaotanne shilda hussat koddina.
8 hin dahenn qum hirayta laashamunt haayat.
9 essete rakkotass inn tarpinninan daanninan;
inn ikanninan,
siipat dahenn mahhaawu minann inn qar hittinninan.
10 essete orr lek amaantet alldiinninan kohaytisaminan,
orr tatarpinninan daanninan;
ollin jijiianninan.
11 himampayya eerpampayyaan lekenno sohanninan,
orr lek patin dapusinninan.
12 nayqunt lekan anta minann hoxsunt orr leki qappannawint.
13 hekoddu male nam hak muutaytaat duupattan kokkaad dinannina.
14 siipass dahenn ikkim maanyet koddintoss husslah dahenn qarass lel masmasunt heka daamum Mooha lelamina;
essete muutayta husslah deyina.
rakkot nayqat
(mar. 13,14-23; Luqaa. 21,20-24)
15 "iyaan nayq oshshiyya kodd taaniel himmapayt lel,
et por se miil ili ellan inn akkitane,
nam waarusinniyyu qallqaapadu!
16 helpaanette orr huss yihuta qalle kiyy utawa qarop allfeeladenii
17 nam faattalle kiyyu man talla mehadda qeeddatta lahop lekkatta diiyyu.
18 nam ulalle kiyyonno uuwaat qeeddatta ikkanneesh mitaata diiyyu;
19 essete iskatt medda kardalle qapanne luukissotass pelawu!
20 hekoddu male ikkim feelattaann helpa kashanatenne shoke lashsh sampata qarass inkoddin dinkamadaa!
21 essete rakkot kaant,
it hak husslah uumameeshsh hirte hak awwet apure kodda diitt ittureeshanno itap kishshu kodda diinnintu koddina.
22 lashsh rakkot sett hummaootta diitt kid amm nam soha uuwad dinatta fottaayemu;
hekoddu male lashsh rakkot sett oot orr se moohan pahisam maalla hummaonnint.
23 "essete et aynonno,
'kristoos toare kiyy!
' shoke 'todase kiyy!
' inni kidiyyo kap dakaya diiyyaa.
24 eerpampayyaan 'antu' kristoos kidiyyanne himampayya eerpampayya sohannina.
et iyyaa fottanto,
orr se moohan pahisam naf patin dapusisass iyaan nam shamusinniyyanne ishaakaddaan kakkaan akkinninan.
25 "toare turassin qattiy inni lel.
26 semmaalla et 'toare,
kristoos lak patpatt kiyyu qalle kiyy!
' inn kidiyyane,
sohatta diiyyaa;
et 'toare man talla kiyy' inni kidiyyane,
amaana diiyyaa.
27 qum paqana moont ila paqin illo por lashsh yaamishshooll hak por lashsh peishshu akkaanniyyannep dexema meet nam koddinan.
28 por se akkan toy kiyyanep ayyapitt orqudaqapamin.
dexema kristoos
(mar. 13,24-27; Luqaa. 21,25-28)
29 "lashsh rakkot sett kanna esseteeh lashsh poorinnannint;
lehaanno amm attumashayy akkinninamu;
iskaanno moontalle allyeinan;
irrampayya moontatenno shildinan.
30 helpaanette inxishaaka meet namat moontalle akkaannina;
essete nam husslah qara kiyyu dahenn pooyina.
meet namatenno irrotanne serka kaanin urrashshet qara deyiyyo akkinan;
31 hitaymiyyoyyanno nass kaas,
iy kaan olle hitina;
iyyaanno dind afureeshsh muutayta moontateeshsh hak muutayta moontatess orr se iyyin pahisam orqudiqapinan."
paahnat qoyr peleset
(mar. 13,28-31; Luqaa. 21,29-33)
32 "paahnat qoyr peleset qara kollaa;
helpaan haarrayy soliyanenne lappa qara mulmuliyane helpaanette pararra dehaataaddu ufunaannin.
33 settep lamm inn sed dahenn akkishshane helpaan meet nam uqqalli deyinu altatalle ikkim dehaaden ufnaadaa.
34 shaakketin inni lelin,
hak hin dahenn koddinaness dalashot hin amm tarpintamu.
35 moontanne huss tarpinan;
lelaawu lamm amm tarpinamu."
nam lashanne helpa dexema pold upu amm hekiyyamu
(mar. 13,32-37; Luqaa. 17,26-30;34-36)
36 "oot lashsh settetenne helpaanett appa pateeshsh hitaymiyya moontalletenno koddo,
meetanno koddo,
nam upu amm hekiyyamu.
37 qum it sapan noohe kodditep dexema meet namatenno settep koddint.
38 sapan sette lashsh haq patet turann,
hak lashsh se nooh konkaallep kalinoss orrat damaanne ukaanne orqeeddaanne orxaatumisaalle kiyyan.
39 lamm haka haq patet dey dahenn all ushuq intawess amm iqqara heufunaadenemu;
dexema meet namatenno sedep koddinan.
40 essete nam lakk ulalle erkama ollin kodinan;
nam shokku qeeddamina iyy shokku hatina;
41 iskatt lakk yooqa yooqinan;
it shakk qeeddamint it shakk hatint.
42 semmaalla lashsh poldaann uqqari deynu amm heuftanemo qimaa illuushadaa.
43 hekoddu male sed ufunaadaa;
et appa man helpaan kerot uqqall deynu ufunaad kid,
ikkim manaayy inqoshaminess hayaay lushannaay.
44 semmaalla oot meet nam saatet inn qaapatta diitten qall deynu maalla dikkisattan kallaadaa."
paahnat aylet amaanametenne iyy amaanama diiyyet
(Luqaa. 12,41-48)
45 "aylet amaanamenne mutsura qapu,
poldat ikkim iyyat helpa ili orr manaayeti dama daanninu kaadumusiy ayno?
46 helpaan poldatin mitaatiyyo aylet erkamaan iyyi daassam erkanniyyu iyyat qara paiyyu iyy hartood.
47 shaakketin inni lelin;
aylet sedep kiyyu poldat shorokumaayy dahenn qarass kaadumusinnina.
48 aylet hin amaanama diinniyyu lamm et,
'poldaawu olannina' kidan
49 kataayy hin iyy olle erkanniyy dokkosa hiru,
illo taarampayyaa ollenno damiyyu ukiyyu koddo,
50 poldaayy lashsh iyyat lushatta diiyyenne helpaan iyyat ufunaatta diiye painnina,
51 aylet sett ikkaani horsinnina;
ikkim hitsaayyenno ippeepampayya olle koddinu kodina;
ullanno iilla ollin qumaanne pooyt koddinta.