oot kollisampayya halitt muusetenne shonkum faraset
(mar. 12,38-39; Luqaa. 11,43-46; 20,45-46)
23
1 sekanna Yesus siipanne soolleshayyess sedep kid,
2 "kollisampayya halittatenne faraset por muus ilass laiyen.
3 semmaalla iyaan iyyaa inni leliyyan dahenn erkayyaa,
lushadaa;
hekoddu male oot iyyaa qum ishaamooddotep erkasa diinniyyan maalla erkamaaddu kanni anta diiyyaa.
4 haisot hursaatt,
nam rakkusinnishshu hiddin illo hashitt nam qar hausinnin;
mashshaddu lamm harkaddu nafin qappattaass amm fadiyanemu.
5 hin iyyaa erkanniyyan dahenn nam innu akku kidaass nam turi erkannin;
ashenkitaapetaddua paldawsannin immini hidannin;
uwawaaddu mini qotsara deerawsannin.
6 por hembantaate por serka,
man dinkam talla sheedda serka qapatta hoxsaannin.
7 kapiyyaalle ikkim namat paanussa serka iyyaa dehanninu illo 'kollisampayt' kidinu iyyaa hembinoss fadin.
8 inn lamm oot kollisampaytaann shokkooh kodd innanno dahetaynin kaf oll kodditen maalla,
amm inn 'kollisampayt' kidaman hembamihintanemu.
9 lamm oot inn moontalle appa shokkooh qaftan maalla husslah qara aynossenno 'appa' kidan hemba diiyyaa.
10 oot ufnatampaytaann kristoos shokkooh kodd maalla,
'ufnatampayt' kidan orr hemba diiyyaa.
11 inn ila nam ikkaan kodd erhaytaayn koddu.
12 nam ikkaaninniyyu tinnaisamina;
nam ittinnainniyyu kaanisamina.
tuuhama kollisampayya halittatenne heka faraset
(mar. 12,40; Luqaa. 11,39-42;44;52; 20,47)
13 "inn ippeepampayya,
kollisampayya halittatenne faraset,
oot inn ikkim namat daamum Mooha qallep inkalini kaalt duhishshan maalla pelawu innass!
inn mashshayness amm uqqallep kalikkishshanemu;
orr ulqqallep kala fadiyyonno dawrikishshan;
[
14 "inn ippeepampayya,
kollisampayya halittatenne faraset,
oot inn akkaatta maalla dinkam derannishan illo man iskatt se irishadaaddu qarin raawen tall damishshan maalla pelawu innass!
inn qarass horat kaant quuramina.]b
15 "inn ippeepampayya,
kollisampayya halittatenne faraset,
oot inn nam shokku amaanteshayn ilop kalisa errann lahin kidishshan,
helpaan inn iyy qeeddatten kannakul hark lakkin hekaayn qara tawu nam apitt parparat dikkisam kodishshan maalla pelawu innass!
16 "inn sinkiyyaan ilpat!
pelawu innass!
'et namat man miilotatin kakado amm akkan koddinamu' hekidin;
'et lamm worqet man miilotatin kakado kakaayyan qapamina' hekidin.
17 eepayyaanne indamala!
worqet settenne man miilot se worqet se miilumusinniyyu ila hekann taw?
18 settep lamm,
'et namat por laaqqa uqqar dehasa hin man miilot talla kiyyin kakado amm akkan koddinamu;
et lamm laaqqaan por laaqqa uqqar dehasa qara kiyyin kakado kakaayyann qapamin' hekidin.
19 inn indamala!
laaqqaanne por laaqqa hin laaqqaan inmiilawiyan ila hekann taw?
20 semmaalla nam por laaqqaatin kakanniyyu,
por laaqqaatennenne hin por laaqqa qara kiyy dahennenn kakannin.
21 nam man miilotatin kakanniyyu,
man miilotatenne Mooha se ulla kiyyonn kakannin.
22 hin moontin kakanniyyu sheedda Moohaatenne Mooha se sheeddaan qari lainniyyon kakannin.
23 "inn ippeepampayya,
kollisampayya halittatenne faraset!
pelawu innass!
kontikoossaanne hiwwayyatanne sukupat qara hark hundalle hark shokku daannin illo hin halitt qari haayam ila iyaan qiqqim,
shaakketin horat quuraanne olli mutsuroottaanne amaanama alldiitten;
helpaan inn hin erkannishshane hin inn alldiittenenno erkasa inn fadusinnin kida.
24 inn sinkiyaan ilpat!
raasa all pohin illo kaal kirdinnin.
25 "inn ippeepampayya,
kollisampayya halittatenne faraset!
pelawu innass!
inn kuppayyaanne shomb pat jiqikikkishshan;
iyaa lamm tallann ponqantaanne yexemaann innaakooden.
26 att indamala,
farasishsh!
turqatta kuppayyaanne shomb tallin alljiqii!
essete patallelanno iyaan miil koddinane.
27 "inn ippeepampayya,
kollisampayya halittatenne faraset!
poosaan altin ponkan roopam sommomiy,
lamm tallanhaat lafalla orr raawetenne oshshum heikketin ulli innaakoodep kishshan.
28 settep lamm altann namass afa miilampayyaap kinnaannin akkaannin;
qallinhaat lamm ippeepaanne nayquntann innaakkootten.
29 "inn ippeepampayya,
kollisampayya halittatenne faraset,
pelawu innass!
poosa himampayyaat soorumin,
poosa tsillampayyaatenno sirin illo,
30 'olo sapan appadaannoten kinnaann kid diik himampayya alltiiqa amm iyyaa olle seninhaanemu' kidin.
31 sedenn medda orr se himampayya rawiyi koddaayness inn iqqarass maanyetumin.
32 lamm innanno erkamaan appadaann hiren kaysiyyaa.
33 inn maakada,
medda puushat,
horat kahanem kela ashshann passatta fottintan?
34 semmaalla toare antu himampayyaanne orr ufunat qaponne kollisampayyan inn kapop hitina;
inn lamm iyyaa ila shakkan ikannihintan;
shakkan rahihintan;
shakkan lamm man dinkamaayn tallass tolintan;
sapara shakkanaash shakkanap kann arinnintan.
35 semmaalla diik tsillampayt heka apeeleeshsh hiraan hak diik sakkaariyaas heka imm perakiyu se inn otant man miilotatenne por laaqqa uqqar dehasa ili ikattentenet,
diik se miil husslah qari alltiiqam dahenness inkaasawusama inn qari paina.
36 shaakketin inni lelin;
horat hin dahenn dalashot sed qarass paint."
Yesus yerusaalem pooy
(Luqaa. 13,34-35)
37 "yerusaalem,
yerusaaleme!
hed se himampayya ikannishshu!
orr se hed kapop hitam dakan reepishshu ikannishshu!
qum lukkalittet jujitoodd karpalloodd kelop qapannishshop,
ananno meddaatt ikkettop qapaass helpa meeqan fad!
inn lamm amm hefaditenemu.
38 semmaalla,
manaann heka miilot enayt koddina.
39 innassin lelin,
'nam mahh poldatin deyyu iqoram' haka kidintaness sedeeshsh amm an akkihintanemu."