paahnat orr sarketi hembamet
(Luqaa. 14,15-24)
22
1 lamm Yesus paahnat pilet sedep kid ishaam;
2 "daamum moontall,
Daam se sarket immayy kod paahnaannin.
3 Daam settenno orr se sarket hembam ikkim por sarketatep hembinaness aylammaayy hit;
orr hin hembam lamm amm deya hefadenemu.
4 "iyyat illo lakkiyya sedep kid aylamma pil hit;
'orr se hembam kapop aanaa illo,
toare,
damot sett hensoorum;
hormaddaawonne mertadaawonno heqalamen;
heikk hedikkisamen;
semmaalla hooyaa!
' kidaa iyyaa lelaa' kid.
5 orr hin hembam lamm hembantaayy tuffaden illo iyy shokku ulayy qallep taykiyy,
iyy shokku nakatayy aan;
6 orr shakkan lamm aylammaayy qapen tolen liiliyen illo allrawiyyen;
7 Daam setteno lamm hemiirood illo orr adant hit orr se all raawiy;
saparaaddonno ikkim apittin alldoohinninan kodusiy;
8 sekkana aylammaayyass kide,
'toare damot sarket hedikkisant;
hekkoddu male oot orr hin hembam iyyaan damot hin iyyaa fadusitt kodda diyyen maalla,
9 paana kakkaan qalleesh aanaa illo nam inn akkiten dahenn por sarket setttep hembaa' kid.'
10 aylammaayy illo paanaallep aanen orr se iyyaa akken nayqisampayyaanno koddu orr diddikkanno dahenn hemben;
semmaalla man sarket sett dahenn orr hembamin innaakkood.
11 lamm helpaan Daam hin orr se hembam dey tooya man damot sett tallop luume,
nam uuwaat serka uuwatta diiy ulla akk.
12 illo,
'moyshe!
uuwaat serka uuwatta male ashshann arep luuma fottit?
' ikkid.
nam settenno akkan iyyat ishaaminu dap.
13 Daam hin lamm aylammaayyass kide,
'lukkooyyanne harkooyy hida,
altop sohashiyaa illo poorinnat se alta kishshu ilop allkashaa;
ullanno pooytanne iilla ollinquma koddinta' ikkid."
14 ukkanna lamm,
"orr hembam iyyaan lek,
orr pahisam lamm iyyaan qoji" hekid.
kaassiy oot tiiqot daattaat dehaad
15 sekanna faraset heaanen illo ikkim ashshann kodinan Yesus ishaamaayyin qapa fottinan mariyaden;
16 soolleshaddonno orr herootisa olle Yesus kapop hiten illo,
"kollisampayt!
att tsillampayt koddaaytenne ikkim paana moohaatenno shaakketi kollinnishshu innu henxufn;
iyaan att nam tura huuran erkannishshu amm hekiyanemu;
amm qariqatta erkannikkishshamu"
17 "intu innu lele;
maana hed paahnaannin?
halitt muus qara Daam roomaat tiiqot daattot hekiyyamu shoke adixinkiyyu?
ikiden.
18 Yesus lamm nayqunshaddu ufnaad illo,
"inn ippeepampayyaa!
maanaass an kap fadin?
19 kodashshet se tiiqot daassamishshu intu ani akkiyyaa!"
iyyaa kid.
semmaalla iyyaa tinaaretan deyen iyy akkiyen.
20 iyyat illo,
"kodashshet sed qara paahnat hin kishshonne mahh hin tsaafam hekop ayno?"
kid iyyaa kaassad.
21 iyyaanno,
"heka Daam roomet" hekiden;
iyyat illo,
"semmaalla heka Daam daamass,
heka Mooha Mooha daayyaa."
iyyaa kid.
22 iyyaa lamm helpaan iyyaa sed dakayen kanna ishaamaayyan shammaden illo all iyy diiyen tawen.
kaassiy se oot toxt ila sohatta orr raaweti dehaad
(mar. 12,18-27; Luqaa. 20,27-40)
23 essete orr satuqet hin,
"toxt ila sohattot amm hekiyyamu."
kidiyy Yesus kapop deyen illo,
24 "kollisampayt!
muuset,
'nam shokku et haypaat qeeddu illo medda haaya male qaran toyo,
insharaayy it dahalu illo ankasaayy se toy kanna mahh hembusiyyu' hekid.
25 ammann kolkolla tapp iyyaan ollin dalad otanshaynu ila kiyy.
ankasaaddu hin qart kodd haypaat qeedd illo medda haaya male qarin toy;
semmaalla insharaayy it dahal.
26 settep lamm inshar lakkiyyaanno halpattiyyaanno hak inshar tappiyyaatess it dahalen illo raawen.
27 iyyaa kanna lamm iskattet hin toxt.
28 tappaddon it qeeddene,
kat helpa toxt ila sohattaate hekanness aat koddint?"
hekiden iyy kaassaden.
29 Yesus illo mitaattiy iyyaa kide,
"inn matsaafa miilotanne irrot Mooha ufunaatta diittaayn maalla patandapin.
30 orr raaw et toxt ila sohanniyyane qum hitaymiyya Mooha hin moontalle kiyyatep koddinan male amm orqeeddinanemu.
31 oot toxt ila sohattaat lamm hin Moohot,
32 'antu Mooha aprihaamenne,
Mooha isaaqenne,
Mooha yayqoop;
' inni kid inn inwaarusinnemu?
semmaalla Moohot Mooha orr kiyyat qapot male amm Mooha orr raawetemu."
33 helpaan siipat sed dakayene kollilayyan shammaden.
acac se kaan
(mar. 12,28-34; Luqaa. 10,25-28)
34 helpaan faraset,
Yesus iyaan iyyaa ishaaminan dapusisan satuqet rui kidusisaayy dakayene shokkohumann orqudopiqapamen;
35 illo iyyaa ila kollisampayt halitt ishshokku,
Yesus ekkasa fad illo, b
36 "kollisampayt!
halitt ila acac hekann ikkaan?"
kid kaassad.
37 Yesus lamm sedep kid immitaattiy,
"Mooha,
poldaayt mutsuroott dahennenn,
nafseshayt dahennenn qaapayt dahennenn hoxsaadu;
38 acac heikk qara tawonne acac turaqatta hin iyy.
39 acac lakkiyyanno iyyap kiyy;
settenno se,
'nam dahenn qum att ihoxsaannishshop hoxsaadu.
' kidiyyu kida.
40 acacadda hin lakk,
kollila halittatenne heka himampayya dahenness sheeht kodden."
kaassiy se oot kristoosi dehadd
(mar. 12,35-37; Luqaa. 20,41-44)
41 faraset orqud qapamene Yesus,
42 "oot kristoosess kat maana kidin?
meet opa aynop inni kinnaannin?"
hekid iyyaa kaassad.
iyyaa illo,
"meet taawitpac" kiden immitaattiyyen.
43 iyyat illo settekul "ashshann taawit sinkuma laaffot miilotatin 'pold' kidin iyy hembin?
44 taawit,
'poldat poldaawoss,
hak antu olishshadaatt lukkaatt keli hedi kodinu,
miskittaawu qari laii!
' heikkid.