Yesus serka kaanenn yerusaalemep kal
(mar. 11,1-11; Luqaa. 19,28-40; yewa. 12,12-19)
21
1 helpaan yesusenne orr se iyy olle kiyyu yerusaalemi dehaadene,
utet se tarr ekertada kidamishshu kapa paat se petefaake kidamiyyo paiyene,
Yesus sedep kid soolleshayy ila nam lakk hit;
2 "paat se inn tureesh kiyyop aanaa;
ulla harret ookkodd olle ulli hiddant esseteeh akkintane,
furiyyaa illo ani indeyaa.
3 et namat inn kaassanniyyo,
'poldass fadusinnin' ikkida.
iyyanno esseteeh harrawaan hitina."
4 hin sedep kodden,
hin himampayt,
5 "yerusaalem se sapara tsiyoon kidamishshoss
'toare!
daamaatt dippatayt kodd harretanne,
ookka harret qarass laiyy hed kapop deyin!
' kidaa iti lelaa."
kid ikkim kaysaanninaness kida,
6 soolleshayyenno heaanen illo qum se Yesus iyyaa acac koden.
7 harret settenne ookkaaddin iyyi deyen;
uuwawoddonno pati haayen;
Yesus illo qari laiyy.
8 siip se ilanno orr lek uuwawoddu paanalli afen;
orr shokku lamm lappa qoyrat qeqqepiyen paanalli serka iyy turi afen.
9 orr iyy turi qattenno hin iyy kanni deyiyanno,
"hoosaaynaa meet taawitess aypila koddenii!
iyy mahh poldatin deyyu iqoram!
hoosaayna!
aypila ele erri koddenii!"
hekidin ullupin.
10 helpaan Yesus yerusaaleme paiye orr saparanett dahenn,
"hin ayno?"
hekidin honjin.
11 siip iyy oll deyenno,
"hin himampayt se hafta kelila qalle sapara nasreetete dey yesuspa,"
hekiden.
Yesus orr kapiyaat man miilot talla ariy
(mar. 11,15-19; Luqaa. 19,45-48; yewa. 2,13-22)
12 lamm man miilot altop aan illo orr se ulla kapiya kashiyyonne heranniyu kann ariy.
teekka (tsarabeesa) kodashshet oohampayyaatenne sheedda orr se eleela kashiyot lahop allquqqupaappiy.
13 "manaawu man dinkamat kidamina' hekidant tsaafant;
inn lamm pohot ponqampayyaatess koditen!"
iyyaa kid.
14 helpaan Yesus man miilot talla kiyyo indamalanne shoopayya iyy kapop dey illo iyyat diniy.
15 hekoddu male kaadayya suukammaatenne kollisampayya halitt shammot Yesus erkay akkaaddonne man miilot talla medda,
"hosaainaa!
meet taawitess aypila koddeni!"
kidiyyan ullupiyyane dakayaaddonn hejiiaden.
16 semmaalla yesuses,
"iyaan meddayn kidiyyan dakayikkishshamu?"
ikiden;
iyyat illo,
"heyye,
dakayinkiy;
lel se,
'meddaanne iyyaan luukiy kapass aypila miskitt' kidiyyu inn inwaarusinnemu?"
iyyaa kid.
17 all iyyaa diiy saparaan qalle sohad illo paat se pitaaniya kidamiyyop aan illo ulli pead.
qoyr peleset se Yesuset pish
18 Yesus etikel saparaap anniyyo hetuff;
19 qoyr peleset paana kapa akk illo kapop aan;
hekoddu male lappaa pateeshsh amm dalot uqqara heakkademu.
semmaalla,
"sed kanneeshsh dalot hed ila akkaatta diittu!"
hekid;
illo qoyr settenno esseteeh kok.
20 helpaan soolleshiyy sed akkene,
"qoyr peleset sed ashshann esseteeh kok!"
hekiden shammaden.
21 yesuse illo sedep kid iyyaa mitaattiy,
"shaakketin inni lelin,
et amaantet qafnaattan,
shurshura diittane qum it qoyr peleset sed qari erkawusantepaah kodda male et utet sed nafess,
'sohadu illo pakatet ilop allhappam!
' kiditane koddinta.
22 et amaantet qafnaattane hin inn dinkamin kaassannishan dahenn akkannihhintan."
kaassiy oot hayyotum Yesuset dehaad
(mar. 11,27-33; Luqaa. 20,1-8)
23 helpaan Yesus man miilot altop kal kollisa qara kiyyo,
kaadayya suukammaatenne qimaayya siip iyy kapop deyen illo,
"att hin erkannishshu hayyotum hekannenne?
hayyotum sed aynu hedi day?"
kiden kaassaden.
24 Yesus lamm,
"ananno kaassiy shokkoohin inn kaassannina;
et kaassiyaaw an mitaatittane ananno ikkimin hayyotum hekannen sed erkanniyyu innassin lelina.
25 ahalila yewannis kat ahayla deyen?
Mooha kapaamu nam kapa?"
he iyy kid.
iyyaa illo sedep kiden ollin mariyaden;
"etin 'mooha kapa' kidino,
'illo maanaass iyy amaana diitten' he innu kidina.
26 etin 'nam kapa' kidino lamm,
oot siipat dahenn yewannis himampayt kidiyyan maalla siipin huurin" hekiden.
27 semmaalla "amm henxufnamu" kiden iyyi mitaattiyyen.
Yesus illo "ananno ikkimin hayyotum hekannenn hin erkanniyyu amm inni lelinhinamu" iyyaa kid.
paahnat medda lakket
28 ukkannas Yesus,
"ammann maana inni paahnaannin?
nam shokku medda lakk qapa;
iyyaa ila iyy shokku kapop dey illo,
'meetoot,
awi ul woyneshawu qallep aanii illo erkama kodii' ikkid.
29 meet hin illo,
'amm anninhinamu' kid hittiy.
ukkannakuless lamm iyyass dakaysamaatt iyyat illo erkamaanetti aan.
30 ukkanna lamm imm lakkiyya kapop aan illo ikkim erkama kodinu acac;
imm settenno 'owo appollo anninhina' hekid.
hekoddu male amm heaanemu.
31 medda hin lakk ila kat hekann has appaayyi kaysiy?"
hekid iyyaa kaassad.
iyyaa illo,
"se hirayta hitam!"
kiden.
Yesus lamm,
"shaakketin inni kidin;
qarats quurampayyaanne arpalayya daamum moont qallep kalaass inn turann qattinan.
32 yewannis,
ahalisampayt paana tsillotb inn akkisa deye amm iyy heamaantenemu;
qarats quurampayyaanne arpalayya lamm heamaanen;
inn sed akkiten nafe amm juppot qara hemitaaten amaantenemu."
paahnat peehampayya ul woynetat
(mar. 12,1-12; Luqaa. 20,9-19)
33 "paahnat pil dakassadaa;
nam shokku dihot woynet dih;
patanno qaad;
qaaw woynet uqqalli jiipaatenno qosh,
woynet se uqqaraashsh lushassenno kawwashsha rahha soorum.
sekanna kul ikkim dihot sett kel sooruminaness peehampayya day illo huss pilap aan.
34 helpaan woynet hin palhite,
ikkim daloot woynet settetin ideynaness peehampayyaan kapop aylammaayy hit.
35 peehampayyaan lamm aylammaayy qapen illo iyy shokku tolen,
iyy shokku ikayen,
iyy shokku lamm dakan reepen.
36 iyyat lamm lakkiyya orr se iyyat turaqatta hit qara tawuniy hit.
iyyaanno qum se iyyaa orr se turaqatta hitam qari kodenep iyyaa qari koden.
37 muutayta qara lamm,
'meetaawu huurinan' kidaann meetayy hit.
38 helpaan peehampayyaan meet se akkene lamm,
'hin taymampaytaayyipa!
hooyaa innu all ikannu;
ulayyin tayinna!
' olli kikkiden.
39 meet se qapen,
ul woynet sett qalle allqeedden ikayyen.
40 kat helpaan appa ul woynet sett deyo peehampayyaan afa ashshann kodaayep inni kinnaan?"
hekid iyyaa kaassad.
41 iyyaa illo,
"iyyat orr se nayq allrawinnina,
ul woynet settetenno peehampayyaan helpa min dalot woynet sett iddaanninass daannina."
he iyy kiden.
42 Yesus lamm sedep iyyaa kid,
"se matsaafa miilot qarass,
'daka se man dihampayya alltuffaden,
daka kaysila man kodd;
hinenno erkama Moohaat;
indaannu turassenno shammot kod;'
kidant tsaafant apure inn inwaarusinnemu?
43 "semmaalla daamum Mooha inn qara qeeddamina illo orr se qunda daamum set daanniyyu daassamina. [
44 nam daka se qari sunkiyyu allqeqqepina;
nam daka hin iyy qari sunkiyyu lamm allbarjajawna."]c