paahnat erkamampayya ul woynetat
20
1 "daamum moont nam se erkamampayyaan ul woyneshayy qalle erkama kodina fada etikelayan sohadep kinnaannin.
2 iyyanno lashshass tinaareta shakkaah daattass erkamampayyaan olle sen illo ul woyneshayy qallep hit.
3 saatet halpatt qaranno sohad illo orr pil iyyaan erkama male mooraall qaai akk;
4 iyyaassenno kide,
'innanno ul woynet sett qallep aanaa illo erkama kodaa;
kalisot fadusinnishun inni daannina' kid.
5 iyyaanno ul woynet sett qallep aanen;
lamm saatet lehenne saatet tsinqot qaranno sohad illo settep kod.
6 saatet hundann shakk qaranno sohad orr pil iyyaan ulli ell akk illo,
'inn lamm lashsh sed mumet erkama dapan maanaass ari elliten?
' kid iyyaa kaassad.
7 iyyaa illo,
'nam erkama innu hembanninun dafin' ikkiden;
iyyat illo,
'et settep koddo innanno ul woynet set qallep aanaa illo erkama kodaa' iyyaa kid.
8 helpaan lashsh ponnaatte appa ul woynet sett kaadayt erkamatess kide,
'erkamampayya hembii illo orr se kanneeshsh erkama deye hiradu illo hak orr se hirayta erkama deyet kalisot erkamaaddu iyyaa dayyii' ikidd.
9 semmaalla orr saatet hundann shakk qara dey hedeyen illo mashshmashshi tinaret shokkushokko qeeddaden.
10 orr hin turi qatta erkama dey lamm helpaan iyyaa deyene afa orr se kanneeshsh dey qara tawuninnan qeeddanninanep iyyaa kinnaatt makess;
hekoddu male iyyaanno shokku shokkotaddo tinaret shokkushokko qeeddaden.
11 iyyaa qeedadenekuless appa ul sett qarass sedep kiden kumuliyaden,
12 'orr hin erkama saatet shakkaahat erkayyen;
hekoddu male tashotanne otot lashsh muumetass amm innu qari heakkenemu,
att lamm innu olle iyyaa qafit.'
13 appa woynetatenno erkamampayyaan ila nam shokkoss sedep kid immitaattiy,
'moyshe!
amm hed qar henkalemu;
innu olli senn lashshass tinaaret shakkaah hedi daattaassin hinemu?
14 semmaalla se antu hedi dayyep nam se kanneeshsh dey daattaassenno an hinnaade,
se hed daassant qeeddadu aanii.
15 kodashsheshawun iyaan antu hinnaad erkasa aynu an dawurina?
shoke oot antu iyy dikk kodd maalla att maxashanumimu?"
16 "hin kann ooriyy turass qattinan;
hin turi qatt kann oorinninan."
heikkid.
Yesus oot toxshayyet halpattiyya lel
(mar. 10,32-34; Luqaa. 18,31-34)
17 lamm Yesus yerusaalemep anniyo soolleshayy hundann lakka set ikapop hemb illo iyyaa kide,
18 "toare,
ammann yersaalamepin annin;
ullass lamm meet nam kaadayya suukammaatenne kollisampayya halittatess tarpisamina daassamina;
iyyaanno horat toxtat qari quurinan.
19 orr ayhuta kodda diiyessenno tarpinninan daanninan;
iyyaanno qari beejjiyanninan;
liitsotin kaypinan;
masqalet qari rahhinan;
lamm lashsh halpattiyaate iyyat toxt ila sohannina."
20 essete inkot op saptiyoos meddaadd olle Yesus kapop deyt illo turi kilpit,
ikkim akkan shokku it erkanninu dinkamatt.
21 Yesus illo,
"maana fadin?"
iti kid.
it illo,
"daamumaayt qalle meddaawu hin lakk,
ikkim iyy shokku miskittaayt qarass iyy shokku pihitoshayt qari lainnan ani kodii!"
ikkidit.
22 iyyat lamm,
"iyaan inn dinkamannishan amm heufutanemu;
waallet rakkot se antu ukkinu,
ukka fottihintanemu?"
iyyaa kid.
iyyaa illo,
"heyye fottinhinna!"
kiden.
23 Yesus lamm,
""shaakkenn waallet se antu ukkinu ukkihhintan;
hekoddu male miskittaawonne pihitoshawu qari laisot orr appaawu iyyaa dikkiyess male amm an iyyaa daanninamu" ikkid.
24 soollet hin hatt hund helpaan iyyaa sed dakayene insharanne ankas lakka sett olle jiien.
25 Yesus lamm dahenn iyyaa hemb illo sedep iyyaa kid,
"peashisampaya siip,
siipaaddu irrotan piddin;
ikkim sinkiyyaaddonno iyyaa qari hayyotum qapan heufutan.
26 inn kapa lamm amm sedep kodda fadusinnishshamu.
hekoddu male inn ila nam ikkaan kodda fadiyyu erhayt inni koddu.
27 settep lamm nam inn qara tawunaatta fadiyyu aylet inni koddu.
28 meet namatenno ikkim erhaytap erkanninu illo orr lekess mashshiqa koddinu kiyashayy daanninnoss dey male amm ikkim iyyi erkanninaness deyemu."
Yesus indamala lakk dinisaayy
(mar. 10,46-52; Luqaa. 18,35-43)
29 iyyaa sapara iyaarkote sohaden anniyyane orr lek Yesus kanni sohad.
30 essete indamala lakk paana kapi laiyy illo helpaan iyyaa Yesus ullin tarpaayy dakayene,
"polda,
meet taawite!
tonhedess innu mutsuroodu!"
kidan ullupen.
31 siipat illo,
"rui kidaa!"
kiden iyyaa tushen.
iyyaa lamm,
"polda,
meet taawite!
tonhedess innu mutsuroodu!"
hekiden lekiyen ullupen.
32 Yesus illo ulli ell iyyaa hemb illo,
"ikkimin maana inni kodinoss fadin?"
kid iyaa kaassad.
33 iyyaa lamm,
"poldallo,
ikkim indaannu qahisaminanesin fadin!"
he iyy kiden.
34 iyyat illo iyyaa mutsurood indaaddu qappad;
esseteeh indaaddonno lak akken iyyaa illo Yesus olle anta sohaden.