Yesus oot orqeeddaat kolliy
(mar. 10,1-12)
19
1 helpaan iyyat hin ishaama kaysiy kanna kelila sohad illo paat se haq yortaanos patin kiyyo huss yihutaatep aan.
2 siip lekenno iyy kanni annin;
iyyat illo iyyaa ila orr baaqiyu ulli diniy.
3 helpaanette faraset ila karatiddu Yesus kapop dehaaden illo iyy kap fada,
"ikkim namat dakusotayy akkan hawhawi kikkiyyu minin purrinninu halitt qarass hedaassantemu kat?"
kiden iyy kaassaden.
4 Yesus illo sedep kid iyyaa mitaattiy,
"uumampayt hirayta qara nam,
diirtanne iskattet koda uumaayy inn inwaarusinnemu?
5 lamm,
'sed minann namat appayyenne inkotayy alldiinnin illo dakusotayy olle senin,
iyyaa lakkaddun soha shakkanooh koddin'
6 semmaalla iyyaa sed kanneeshsh soha shakkanooh male amm lakkemu.
hin Moohot shakkanoohi kod namat inreehin."
7 faraset lamm,
"kat maanaass muuset,
'nam dakusotayy purrinniyyu tsaafa purreshadd iddayyu illo purriyu' kid?"
he iyyi kiden.
8 iyyat illo,
"muuset ikkim dakusawaann purrinnintani inni owwo kid,
oot mutsuraann iij kodden maalla male hirayta qara amm sedepamu.
9 "antu lamm innass kidinkiyyaa,
'nyauura minann kodda male nam dakusotayy purrinniyyu illo iskattet pilt qeeddiyyu dahenn nyauuriy."
10 soolleshiyy illo,
"orqeeddot et sedep koddiyy koddo orqeedda diitta hedikk" he iyyi kiden.
11 Yesus lamm sedep iyyaa kid,
"lel sed orr it iyyaa daassanteeh male namat dahenn qeeddatta amm fottiyyamu.
12 nam karatiy iyy aata qeedda fotta diinninu koddin dalannin;
nam karatiy lamm nam iyy murin;
nam karatiy lamm oot daamum moont maalla kidin nam muramep ikkodin.
semmaalla nam lel sed qeeddatta fottinu heqeeddadu."
Yesus medda qor
(mar. 10,13-16; Luqaa. 18,15-17)
13 helpaanette ikkim harkayy qari qapinu illo Mooha iyyaa dinkaminoss orrat meddan Yesus kapop deyen;
soolleshiyy lamm orr sett tushen.
14 Yesus illo,
"oot daamum Mooha orr medda hinep kikkiyyoss kodd maalla,
medda dawura diiyyaa,
he an kapop deyenii" kid.
15 harkayyenno meddaan qari qap qor illo por sette sohad aan.
shorokum husslahatenne daamum moontallet
(mar. 10,17-31; Luqaa. 18,18-30)
16 nam shokku Yesus kapop dey illo kide,
"kollisampayt,
kiyyat parpar akkattaass,
iyaan dikk antu erkanninu maaniya?"
kid kaassad.
17 Yesus illo sedep kid immitaattiy,
"oot iyaan dikkat maanaass an kaassannin?
iyy dikk,
shokkooh;
et kiyyat parpar qallep kala hinnaatto acac lushadu"
18 nam settenno,
"acacada hekann?"
he ikkid.
Yesus illo,
"acacaddaan,
ikasa diiyii;
arpaluma diiyii;
hasha diiyii;
maanyet eerpa kodda diiyii;
19 appaytenne inkotayt serkiyii;
nam dahenn qum att ihoxsaannishshop hoxsaadu kidiyy."
he ikkid.
20 kolkolt hin lamm "acacadda hin dahenn henluushad;
hepil iyaan an qara kellaw maaniyya?"
he ikkid.
21 Yesus illo sedep ikkid,
"et nam haasutta dap kodda hinnaatto aanii,
hin att qaftu kashii illo hiyyayya dayyii;
shorokum moontalle akkanninta;
hooyii an kanni deyii" ikkid.
22 oot kolkolt hin lamm shorokum lek qapu kodd maalla,
helpaan iyyat sed dakayekuless dappetann aan.
23 sekkannakul Yesus soolleshayyess kide,
"shaakketin inni lelin,
shorokittass daamum moont qallep kalot rakkot kaant kida.
24 lamm qarin oorin inni lelin,
shorokitt daamum Mooha qallep kala kapa kaalass ura milmet qallin luumot hoshilaay."
25 helpaan soolleshiyy sed dakayenekuless ikkaaness shammaden illo,
"kat aynu dina fottinaa?"
kiden.
26 Yesus lamm poraaddoosh tooy illo,
"hin amm nam fottamiyyamu;
lamm moohaass heiket fottamin" kid.
27 essete betsiroos sedep kid immitaattiy,
"toare,
innu heikketin alldiinn hed kanni antaalle kinn;
kat maanan akkanninna?"
28 Yesus illo sedep iyyaa kid,
"shaakketin inni lelin,
helpaan antu meet nam,
sheedda serka daamumaawu qari lainniyo inn iyyaan an kanni anniy huss awshittalle sheedda hundann lakk qarass laintan;
mayt israaelet hundann lakk peashinnintan.
29 nam an minann manayy shoke insharaddooyyanne ankasaddooyy shoke alawutaddooyy shoke appayyenne inkotayy shoke meddooyy shoke ulayy alldiiyy dahenn hark tseet qeeddannina;
kiyyat parparatenno tayna.
30 hekoddu male orr hin lek turi qatt,
kann oorinninan;
hin kann ooriyy,
turass qattinan."