aynu nam heikk qara taw?
(mar. 9,33-37; Luqaa. 9,46-48)
18
1 helpaanette soolleshiyy Yesus kapop dehaaden illo,
"daamum moont qalle nam dahetaynu qara tawu ayno?"
kiden iyy kaassaden.
2 iyyat illo medda tinnaxa hemb,
otanshaddu ili ellashshiy;
3 illo kide,
"shaakketin inni lelin,
et qaapayn oohatta illo qum meddaatep kinnaatta diittane amm daamum moont qallep kalihintanemu.
4 nam qum meet sedetep lahaat iqapiyu daamum moont qalle iyy ikaan koddina.
5 nam meet sedep kiyyu mahhaawun qeeddanniyyu an qeeddannin.
kohayt nami kodda qara illushatta
(mar. 9,42-48; Luqaa. 17,1-2)
6 "nam,
hin tittinnax an amaaniy ila iyy shokku patindapusinniyu daka ombasha ikkaan holmayy qudi ihhiddam,
iyyat didim pakatet kelop allkasham kid iyyi hedikk."
7 "iyaan nam patandapusinniy minann husslahatess pelawu!
kohayt deyaayy amm hatinamu;
hekoddu male nam se kohayt iyy minin deyiyyoss pelaw!
8 et harkaatt shoke lukkeshitt patin hed dapusinnishsho quur allkashii!
harka lakk shoke lukka lakk qafnaatta illo apitt parpar qallep kashama kapa hark kumannat shoke lukket shoopaytet qafnaatta illo por kiyyat qallep kala hedi hedikk.
9 settep lamm et iilshitt patin hed dapusinnishshu koddo qeeddii allhappii!
iinda lakk qafnaatta illo apitt kehanam ilop kashama kapa;
iilt shakkaah qafnaatta illo por kiyyat qallep kala hedi hedikk.
10 oot hitaymiyyooddua hin moontalle kiyy,
miint appaawu se moontalle kiyyu akkiyyan maalla,
hin tittinaxa ila shokkooh naf tuffatta qara illushadaa.
11 [meet nam dey,
hin tawad dinisaass kida."]b
helemmat tawwatt akkaatt
(Luqaa. 15,3-7)
12 "maana inni paahnaannin?
et nam shokku helemma tseet qafnaad illo helemmaan ila it shakk tawwatt kid,
helemmaan hund tsinqotann tsinqota utet qari alldiinniyu illo helemmat se tawwatt shakkaah kann fada anniyyomu?
13 shaakketin inni lelin,
helpaan it akkaatte helemmaan tawwatta diiy hund tsinqotann tsinqot qareell helemmat se akkaatt shakkaah maalla masmasin.
14 settep appaann hin moontalle kiyyu hin tittinax ila shokkooh naf ikkim allapatinu amm fadiyyamu.
oot nam qarkalaat
15 "et kafittaatt hed qarakalo heden iyyeeh kodda illo qarkalaayy ilelii;
et hed qara dakayo kafittaytess kodannint.
16 et hed qara dakaya diiyyo lamm oot maanyetumat nam lakk shoke halpattin ishaahmanniyu maalla,
nam shokku shoke nam lakk iolle qapadu iyy kapop aanii.
17 et iyyaa qara dakaya diiyyo lamm maapar kristaanat lel;
et maapar kristaana qara dakaya diiyyo qum nam Mooha amaana diiyyetep shoke qarats quurampaytap toyii.
18 "shaakketin inni lelin,
hin inn husslah qara ulla hidditen dahenn moontallenno iyaan hiddam koddinan;
hin inn husslah qara allfuritten moontallenno iyaan furisam koddinan.
19 lamm innassin lelin;
inn ila nam lakk husslah qara iyaan iyyaa dinkamanniyyan qari et ollisenan dinkamadane,
appaawu hin moontalle kiyyu iyyaass kaysinnina.
20 nam lakk shoke nam halpatt por iyyaa an minann orqudiqapamiyane,
antu iyyaa ollenn kinnaannina."
all olli diitta
21 helpaanette betsiroos Yesus kapop dehaad illo,
"poldaawo!
et kafittaawu an qarkalo helpa meeqan all iyyi diinnina?
helpa tappaamu?"
hekid kaassad.
22 iyyat illo sedep iyyi kid,
"hak helpa hund tapp,
tappin qar orrintu all iddinnntoss male amm helpa tappaaha hedi kidinkiyyamu;"
23 daamum moontall Daam se kodashshet se erhamayy qara kishshu olle shallakatta (dihatta) qaapad paahnaannin;
24 helpaan iyyaa shallakatta (dihatta) hirene nam kuur taalantetc kum hund qara kishshu qapam dehad.
25 erhayt hin kuur se daatta oot iyyat fotta diiyy maalla,
iyyanno,
dakusotayyenno,
meddooyyanno,
iyaan iyyat qaponno dahenn ikkim kashaminan illo kuraayy daassaminu poldaayy acac.
26 erhayt hin lamm lukka poldaayy kelas kilpiyad illo kide,
'poldaawo!
jawuhayeseeh ani duupadu,
antu dahenn all hedi daannina!
' kid dinkamad.
27 poldaayyenno immutsurood illo all hayy;
kuraayyenno all iddiyy.
28 "hekoddu male helpaan erhayt hin ulla sohad anniyyo,
kayshaayy aylet se tinaaretd tseet iyy qara pirkaattisad akk illo qohjuul illo 'kodashshet antu hed pirkaattiy ani ooriyii!
' ikkid.
29 kayshayy lamm lukkayy kelass isunk illo,
'tonhedess ani duupadu,
hedessin daannina!
' ikkid dinkamad.
30 iyyat illo 'amm koddintamu' ikkid.
lamm heqap inxaan illo hak kuur se iyy qara kiyyu iyyat daanninu man hidanati all hidusiy.
31 aylammaan shakkan katayy kodd lamm helpaan iyyaa iyaan iyyat erkay dahenn akkene ikkaaness dappiyyen illo aanen hin kodd dahenn poldaaddu lelen.
32 pold settenno erhayt sett hembusiy illo,
'yem aylet nayqa!
oot att an dinkamatt maalla kuur se hed qara kiyyu dahennin all hedi diiyipa;
33 qum antu kuuraayt all hedi diiyyep,
kayshaayt erhayt sedess kuuraayy all iyyi diitta hed fadusinniyyomu?
' ikkid.
34 jiiaytannenno poldaayy,
hak iyyat kuur se iyy qara kiyyu dahenn daanninu erhayt set kaadayt man hidanati tarpiy day.
35 "sedeeshsh innanno shokku shokkotayne et kafittaayni mutsuroonn qallell qeedda illo allhattot iddaatta diittane lamm appawu hin moontalle kiyyu settep inn kodina.