kaassiyy ishshaak akka dehaad
(mar. 8,11-13; Luqaa. 12,54-56)
16
1 farasetanne satuqet Yesus kapop deyen illo iyy kap fada,
"Moohot hed hitaayy innu inxishaakinnu moontalle innu akkiyyii" kiden iyy kaassaden.
2 iyyat lamm,,
["uldat et moont roormaattu inn akkishshane 'parint' hekkidin;
3 etikel lamm,
'moont heurrashatt roormaatte awi roopint' hekkidin;
paahanunt moont reeha heufutan;
hekoddu male hin inn sapan sedin ishaakintan reeha amm fottikkishshanemu.]a
4 dalashot nayq amaantet daft ishaak fadin;
hekoddu male ishaak yonaas heka himampayt pateeshsh ishaak pil amm iyyaa daassaminamu."
hekid iyyaa mitaattiy.
sekkanna Yesus por pilap all aan.
jarayt farasetatenne heka satuqetat
(mar. 8,14-21)
5 helpaan soolleshiyy dase pakatet patop tarpiyyane laaqqot immashshi patisaden;
6 Yesus lamm soolleshayyess kide,
"ittooyadaa;
jarayt farasetatenne heka satuqet kela illushadaa."
7 iyyaa illo,
"sedep kidaayy oot innu laaqqotin deyatta diinn maallaamu?"
hekiden ollin ishaamaden.
8 iyyat lamm qaapaaddu ufunaad illo,
"inn iyyaan amaantet inni qoj!
maanaass 'oot innu laaqqotin deyatta diinn maallapa' kidin ollin ishaamannin?
9 sanu inn iyyaan qalltaysatta diinniyy kidaamu?
laaqqot hen ikkim nam kum hen kaytenne moossansana ukkela hat qunna meeq ikkim haaditen immashshioorissannishshanemu?
10 settep lamm laaqqot tapp ikkim nam kum afur kayt illo moossansana ukkela hat qunna meeq ikkim haaditen immashioorsannishshanemu?
11 sedeeshsh 'jarayt farasetatenne heka satuqet kela illushadaa!
' antu kid inni lel,
oot laaqqot kodda diittaayy ashshann qallqaapatta diinnin?"
iyyaa kid.
12 soolleshiyy illo Yesuset "illushadaa" kidiyyu,
kollila farasetatene heka satuqet qara male jarayt laaqqot qara ikkim kodda diiy ufunaaden.
betsiroos Yesuset kristoos koddaayy lel
(mar. 8,27-30; Luqaa. 9,18-20)
13 helpaan Yesus huss se filiboos qisaariya kidamiyyo paiye,
"kat orrat an meet namatessb aynu kidin?"
hekid soolleshayy kaassad.
14 iyyaa illo,
"orr shokku,
'yewannis ahalisampayt' hekidin;
shakkan,
'eliyaas' hekidin;
shakkan lamm,
'ermiyaas shoke himampayya ila iyy shokku' hekidin" ikkiden.
15 Yesus lamm,
"inn illo aynu ani kidin?"
hekid iyyaa kaassad.
16 helpaanette simoon hin betsiroos kidamiyyu,
"att kristoos,
imm Mooha kiyyatat;"
hekid immitaattiy.
17 Yesus illo sedep ikkid,
"imm yoon simoone,
att iyy hartood!
sed iyy hedi ufunaytiy appaawu se moontalle kiyyu male amm nam hedi ufunaytiyyemu.
18 ananno sedepin hedi kidin,
att betsiroos (shilk);
shilk sed qarassenno maapar kristaanatinc dihina;
maapar orr amaaniyyu sedetennenno amm irrot toxt pusha fottintamu
19 hedess,
qulfetd daamum moontalletine qahisaatin daannina;
hin att husslah qara ullhiddit moontallenno iyaan hiddam koddinan;
hin att husslah qara allfuritt moontallenno iyaan furisam koddinan."
20 sekannakuless Yesus soolleshiyy iyyat kristoos koddaayy ikkim iyyaa namass inleliness acac.
Yesus rakkotanne toxt iyy qari deyintu shokkiyya lel
(mar. 8,31-33; Luqaa. 9,22-27)
21 Yesus esseteesh hir soolleshayy,
ikkim yerusaalemep anta iyyi fadusinnishshonne ullassenno qimaayyaanne kaadayya suukamma Moohaatenne (qeesawaanne) kollisampayya halitt muus rakkot lekkitin iyy qari deya iyy ikasa illo lashsh halpattiyaate toxt ila sohattot iyyi fadusinniyyu iyyaa kolliy.
22 betsiroos lamm Yesus hawi allqap illo,
"poldaawo!
amm sedep koddintamu!
hin amm apure hedi koddintamu!"
kidan iyy tusha hir.
23 Yesus lamm mijir kid illo betsiroosess,
"att seetsan!
an kapa allkiddii!
att heka namat qaapannin male amm heka Mooha qaapannikkishshamu;
semmaalla kohayt ani koddit" ikkid.
24 helpaanette Yesus soolleshayyess kide,
"nam an kanni anta fadiyyu et kiyaado heihaimu;
masqaletayyenno haisadu illo an kanni deyu.
25 nam kiyyatayyin hattata fadiyyu dahenn allpatinnina;
nam kiyyatayy ootaawu maalla allpatinniyu dahenn akkannina.
26 namat et shorokum husslah dahenn akkadu illo nafsetayy allpatiyyo maana iyy koyna?
shoke namat oot nafseshayyet heriya ashshann kiyyu daatta fottina?
27 antu meet nam serka appawotennin hitaymiyyoyyu olle deyina;
essete nam namass qum erkamoyyat heriy daannina.
28 shaakketin inn lelin;
orr se ari ell ila karaddu iyyaan antu meet nam daamumawun deyiyyo haka akkinan raawa diinnina kiyy."