tampet appadaat
(mar. 7,1-13)
15
1 helpaanette farasetanne kollisampayya halitt muus yerusaalemeeshsh Yesus kapop deyen illo,
2 "soolleshitt maanaass tampet appada allpaqinnin?
toare!
helpa dama damiyyane amm harka jiqanniyyanemua!"
ikkiden.
3 Yesus lamm sedep kid iyyaa mitaattiy,
"inn maanaass tampeshayn lushatta maalla acaca Mooha allpaqinnin?
4 Moohot,
'appaytenne inkotayt serkiyii;
nam appayyenne inkotayy otiyyu hetoyu' hekid acac.
5 inn lamm,
et namat appayyenne inkotayyess,
'qarqaarsa inn an qara akkannishshan daayy moohaatessin kodin' kido,
6 'nam hin appayyb [shoke inkotayy] serkisa amm iyy fadusinniyyamu' hekkidinpa;
seminan tampet lushatta maalla lel Mooha allipaqinnin.
7 inn ippeepampayya!
isaayaas himampayt ootayn sedep kid,
8 'siip hin kapayyenneeh an serkinnin male,
mutsurooyy an kapa hesek;
9 tampet namat soorumadeeh qum tampet moohaatep kollisan,
aypoti ani shoomannin."
hekid shaakketin him lel.
iyaan nam oshumusinniyy
(mar. 7,14-23)
10 ukkannass Yesus orr sett ikapop hemb illo sedep iyyaa kid,
"dakayaa!
qallqaapadaa!
11 iyaan nam oshshuminniy iyaan kap nam qalle sohanniy male amm iyaan kapallin kardallep kaliyamu!"
12 essete soolleshiyy hedeyen illo,
"faraset hin att ishaant dakayan ikkim jemperayen heufunaatemu?"
kiden iyy kaassaden.
13 iyyat lamm sedep kid iyyaa mitaattiy,
"hin appaawu heka moontall diha diiy dahenn allpushamina;
14 all iyyaa diiyyaa!
iyyaa indamala,
indamala turqeeddiy kida;
indamala et indamala turqeeddan koddo lakkaddonn ollin qaawwallep peinan."
15 betsiroos illo,"
furila paahnat sed innu lelii" iyyi kid.
16 Yesus illo sedep iyyaa kid,
"inn lamm iyyaan hak ammannet qallqaapatta diinniyyamu?
17 hin kapallin kaliyy dahenn ikkim kardallin tarpin altop sohanniyan ashshann qalltaysatta diinnin?
18 hin kapalle sohanniy lamm mutsuraalle sohannin;
iyaan nam oshshumusinniyyanno hin iyaa;
19 qaap nayq,
nam ikasa,
arpalum,
nyauur,
hashant,
eerpan maanyuma,
mahh nam qara patisa kida.
hin dahenn mutsura nam qalle sohannin.
20 iyaan nam oshshumusinniyy hin male harkaan jiqama diiyin damot amm nam oshshumusinniyyamu."
amaantet iskattet shakkat
(mar. 7,24-30)
21 Yesus ulla sohad illo paat se tsiroosenne sitoona kidamiyyop aan;
22 essete iskattet shakk kenaxanishet ulla sohatt Yesus kapop deit,
"polda!
meet taawitello!
inanshawu laaffot oshshittetin qapam illo ikkaani rakkannine,
tonhedess ani mutsuroodu!"
kidit ullupit.
23 iyyat lamm akkan shokkooh naf it lel male rui kid;
soolleshayyenno iyy kapop dehaaden illo,
"oot dakusot hin innu kanni deyin ullupishshu maalla all it hayyadu!"
kiden dinkamen.
24 iyyat illo,
"antu hitam,
orr se man israaelet talla qum helemmatep all qishaweteseh kida;"
hekid mitaattiy.
25 dakusot hin lamm hedeit lukkaayy keli kilpiyatt illo,
"poldaawo!
tonhedess an qarqaarii!"
ikkidit.
26 Yesus lamm,
"dama medda qeedda herrada kashot amm hedikkamu;"
hekid.
27 it illo,
"poldaawo!
heyye shaakket,
hekoddu male herrada nafenno moossansanaan appaddu kapa yeiy daminpa" hekidit immitaattit.
28 helpaanettekul Yesus,
"yenta!
amaanteshitt iqinte;
qum hinnashayt qari hedi kodditu!"
he it kid.
laaffot oshshittetanno inanshadd qara sohatt,
it esseteeh dinatt.
Yesus baaqampayaa lek diniy
29 Yesus ulla sohad illo pakatet kelila kapop dey;
utet qaropanno fayyad illo ulli lai.
30 siip lek orr hokkalliyyonne,
indamalanne,
shopayaanne,
orr kapitucamenne baaqampayya pil iyyaan lekennenno Yesus kapop deyen;
lukkayy keli haayen;
iyyat illo diniy.
31 semmaalla siipat helpaan orr kapitucam ishaamiyane,
shoopayya diniyyane,
orr hokkalliyyonno pahin anniyyane,
indamala lak akkiyan iyyaa tooyene heshammaden illo Mooha israaelet aypisaden.
Yesus nam kum afur dansiyy
(mar. 8,1-10)
32 Yesus soolleshayy hemb illo,
"siip hin lashsh halpatt an olle kaysiyyen;
iyaan iyyaa daminan oot iyyaa dapen maalla an yeyiyen;
paanaalle tuffetin dootootta tura all iyyaa hayyatta amm henfademu;"
iyyaa kid.
33 soolleshiyy lamm,
"kat dama siip sed dahenni kayna are qershaalle ahailan akkannina?"
hekiden iyy kaassaden.
34 Yesus illo,
"laaqqot meeq qaftan?"
kid iyyaa kaassad.
iyyaanno,
"laaqqot tappanne qurtsummet jawshaddin qafn" ikkiden.
35 sekkanna Yesus ikkim siipat lahi lainos acac.
36 laaqqot tappanne qurtsummet settenno qeedd Mooha aypisad illo qallmooss soolleshayyi day;
iyyaa illo siip setti qooten.
37 siip settenno dahenn damen quuhen;
moossansanaan ukkela hat qunna tapp haaden.
38 orr damaan damenno iskattanne medda dihama male diiddaah kum afur kida.
39 sekkanna Yesus siip sett hayyad;
konkaalli laiyy illo paat se mektoon kidamiyyop aan.