toxt yewannis hek ahalisampayt
(mar. 6,14-29; Luqaa. 9,7-9)
14
1 helpaanette herootis hin peashisampayt kelila kodd torroot Yesus dakay;
2 illo erhamaayyi sedep kid,
"nam hin,
yewannis ahlisampayt;
iyy toxt ila sohad;
shammot hin dahenn iyyin erkawsamishshu sed minann kida."
3 herootis,
herootiyaata se haypaat kafittaayy hekat filiboos koddit minann yewannis man hidanatep kaliyy.
4 sedenno oot iyyat,
"amm it qeeddot hedi hedaassamemu."
kid maalla kida.
5 semmaalla herootis yewannis ikasa fadin;
hekoddu male oot siipat qum himampaytatep yewannis tooyyiyyu maalla hehuur.
6 herootis lashsh dalattaayy serkinniyyo inant heraotiyaata hirpann iyy masmasusitt.
7 semmaalla herootis,
"iyaan att fadishshu dahenn an kaassadu,
hedessin daannina!"
kid iti ashshkad.
8 itanno inkoshadden korsant illo,
"mashsh yewannis ahalisampayt shomball haayamu ammann ani ddaassamu!"
iyyi kidit.
9 lamm Daam settenno hedappiy;
hekoddu male,
oot ashkunshayy maallanne orr se iyy kapa kiyyu maalla ikkim iti daanninan acac.
10 semmaalla man hidanatep nam hit illo mashsh yewannis quurusiy.
11 mashsh se quuramenno shomball haayen illo meet sett dayyen,
it inkoshadd daatt.
12 soollet yewannis lamm heaanen dakint yewannis qeedden mooken illo deyen yesusi ishaamen.
Yesus nam kum hen dansiyy
(mar. 6,30-44; Luqaa. 9,10-17; yewa. 6,1-14)
13 helpaan Yesus toxt yewannis dakay kanna konkaalless lai illo por tahaw kiyyop iyyeeh aan;
siipat lamm sed dakayen illo saparaaddalleeshsh lukkan iyy kanni aanen.
14 helpaan Yesus konkaalle lekkanniyyo siip lek akk immutsurood;
baaqampayyaanno diniyy.
15 lashsh pea tureeshsh soolleshiyy Yesus kapop dehaaden illo,
"lak hin por tahaw kiyyu,
lashshanno hepoonnaatt.
semmaalla siip sed all hayyadu illo paattaan arikapaash kiyyap aanen dama piddadenii" he ikkiden.
16 Yesus illo,
"iyaan iyyaa daminan inn iyyaa dayyaa male amm anta iyyaa fadusinnishshamu!"
iyyaa kid.
17 soolleshiy lamm,
"laaqqot henenne qurtsummet lakk pateeshsh amm hepil henqafnamu" he ikkiden.
18 iyyat illo "arep inhooyaa."
iyyaa kid.
19 ikkim karjaalli qaainninaness siip acac illo laaqqot hena settenne qurtsummet lakka se qeedd moontallel tooy illo aypila dehay;
laaqqot se qall mooss illo soolleshayy ddayy;
iyyaa illo siipi dehayyen.
20 siipanno dahenn damen quuhen illo soollet moossansanaan ukkela hat qunna hundann lakk orqudop qeedden.
21 orr damaan damenno meddaanne iskatt dihama male diiddaah nam kum hen koddaayen.
Yesus pakatet qaraash aan
(mar. 6,45-52; yewa. 6,15-21)
22 lamm esseteeh soolleshayyess,
"hak antu siip hayyanninu shakar kida konkan dase pakatet patop an turi tarpaa!"
kid acac.
23 helpaan iyyat siip hayyad kanna,
dinkamattaass iyyeeh utet qarop fayyad;
helpaan lashsh ponnaatte Yesus iyyeeh ulla kiyy.
24 helpaanette konka hin otant pakatet qara kiyyo haayya miint minaashsh deyiyun tuqquuramaann,
kaahatta pakatetatin yumashawaalle kiyy.
25 awadda saatet tsinqot kanna Yesus pakatet qaraash lukkan antan iyyaa kapop dey.
26 lamm soolleshayyenno helpaan iyyat pakatet qaraash lukkan deyiyyo akken illo,
"hin ehotpa!"
kiden illo ikkaani nahen huuran ullupen.
27 Yesus illo esseteeh,
"haayy!
huura diiyyaa!
anpa."
iyyaa kid.
28 helpaanette betsiroos,
"poldaawo!
et hed koddito,
pakatet qaraash ikkimin hed kapop lukkan anninu an acac!"
he iyy kid.
29 iyyat illo,
"hooyi!"
iyyi kid.
betsiroosenno konka se qalle lekkad illo Yesus kapop pakatet qaraash lukkan anta hir.
30 iyyat anniyyo haayyotin irrampayt koddaayy akk illo huuri;
helpaan iyyat pakatet se qalli limama hire,
"poldaawo!
an passiyyii!"
hekid ullup.
31 esseteeh Yesus harkayy iqap illo,
"yem,
hed se amaanteshitt kellot koddit!
maanaa maalla shurshurt?"
ikkid.
32 helpaan iyyaa konka qallep fayyadene hayya settenno heell.
33 orr se konka se qalle kiyyonno,
"shaakketass att meet Moohaat!"
hekiden yesusi shoomaden.
34 helpaan iyyaa pakatet se qara tarpene,
huss se kenserets kidamiyyo paiyyen.
35 helpaan orr ulla kiyyu Yesus koddaayy ishshaakene,
paattaan ukapaash kiyy dahennep orr hiten illo baaqampayyan kapop deyen.
36 lamm baaqampayya qema uwashayy naf qappattaass iyy dinkamannin.
orr qappadenno dahenn dinaden.