paahnat hotta
(mar. 4,1-9; Luqaa. 8,4-8)
13
1 awusette Yesus talla sohad aan illo pakatet kapi lai.
2 oot siip lek iyy kapop dey maalla konkaallep fayyad laiyy;
siipanno dahenn pakatet se kapeesh ellen;
3 iyyat illo sedep kid paahnatin iyaan lek iyyaa ishaam,
"toare peehampayt shokku hotta seisa sohad.
4 helpaan iyyat seinniyyo hotta karatiy paana kapeesh pei illo hampira deyen damen.
5 hotta karatiy lamm onk huss qoj qapu qarass pei;
oot iyyat huss merd kodda diiy maalla hottotin esseteeh deh;
6 hekoddu male helpa ototate oot sakkattaan hittin kodatta diiyen maalla heruq kok.
7 hotta karatiy lamm otant huushsha quddet ilass pei,
huushsha quddet settetenno sakkattaan qari kaanen illo sakkattaan nyiren.
8 hotta karatiy lamm lak somm qalless pei deeh illo qunda lek kodad;
karatiy qunda tseet,
karatiy hund leh,
karatiy lamm hund halpatt kodad.
9 nam lappa dakayiy qapu hedakayu!"
maannass Yesus paahnatin ishaamin
(mar. 4,10-12; Luqaa. 8,9-10)
10 lamm soolleshiyy Yesus kapop dehaaden illo,
"maannass paahnatin iyyaa ishaamin?"
kiden iyy kaassaden.
11 iyyat illo sedep kid iyyaa mitaattiy,
"hin dekam heka daamum moont ufunaattot innass hedaassam;
iyyaass lamm amm hedaassamemu.
12 se qaposs ikkim illekinaness qarass iddaasamint;
se dap qara lamm se iyyat qapu nafenno qara qeeddamint.
13 oot iyyaa heakkitete akka diinniyyan,
hedakaytete dakaya diinniyyan lamm immashshaqafinaatta diinniyyan maallan paahnatin ishaamin.
14 sedenno se him isaayaas,
'dakaya dakayikkishshan male amm immashsha qafnaannikkishshanemu;
akkaasenno akkikishshan male amm illissannikkishshanemu.
15 mutsura siip sed illashsh kodden;
lappoddonno hedahhen;
inddaaddonno oriqimbiyyen;
et sedep kodda diiyyan kida,
indaaddonn akkaayen,
lappoddonnenno dakayaayen,
mutsuroddonnenno qall qaapannaayen,
illo an kapop mitaatayen antu iyyaa dininnaay.'
kidiyyu iyyaa qari kaysaannina.
16 "inn lamm oot indaann akkiyan lappaannanno dakayiyyan maalla hehartootten.
17 shaakketin inni lelin,
himampayaanne tsillampayya lek hin inn akkishshan akkaass hadaden,
hekoddu male amm heakkenemu;
lamm hin inn dakayishanenno dakayaass hadaden,
hekoddu male amm hedakayenemu.
furila paahnat hotta
(mar. 4,13-20; Luqaa. 8,11-15)
18 "semmaalla,
inn paahnat hotta seysampayt ikkim maanaa kodd dakassadaa;
19 hotta hin paana kapi pei akkinniyyu,
nam lel daamum Mooha dakayiyyu illo qall taysatta diinniyyu kida;
iyy se nayqanno deyin illo lel se mutsuraayya qalli seysam qalle alliqeeddin.
20 hotta hin onk qari pei akkinniyyu,
lamm nam lel Mooha dakayin illo esseteeh masmasuntin qeeddanniyyu kida.
21 hekoddu male oot lel hin mutsuraayy qalli hittin torpatta diiy maalla helpaasseeh qeeddannin;
lamm helpaan miidamaanne rakkot oot lel Mooha maalla qari paiyane esseteeh sunkin.
22 hotta hin huushsha quddet ili pei akkinniniyu,
nam lel Mooha dakayiyyu kida;
hekoddu male,
qaap husslahatenne hoxsunt shorokumat mutsurayy qallep kalin illo lel se iyyat dakay nyirin;
iyyat illo qunda male hatin.
23 hotta hin lak somm qalli pei akkinniyyu,
nam lel Mooha dakayiyyu illo qall taysanniyu kida;
iyyat qunda qafinaannin;
ishokku tseet,
shokku hund leh,
shokku hund halpatt daannin."
paahnat yeitot
24 Yesus sedep kid paahnat pil iyyaa lel,
"daamum moont nam ulayy qalli hotta somm seiy paahnaannin;
25 helpaan orrat peade lamm olishsh dey illo kaappayy ila yeitot seiy illo taw.
26 helpaan kaappotin kamm fiite,
yeitot settenno essete ishshahamat.
27 aylammayyanno appa ul kapop dehaaden illo,
'polda,
ulayyt qalless hotta somm seyitt makess?
yeitot ahayla uqqalli sohatt?
' ikkiden.
28 iyyat illo 'olishsh sedep kod' iyyaa kid.
aylammaan lamm 'annihinn all oosinnamu?
' he iyy kiden.
29 iyyat illo 'amm koddintamu,
helpa yeitot se all oosishshane saapaass kaappaanno oosamina.
30 semmaalla ullidiyyaa;
hak oyhanat kaappaanno yeitotanno ollin kammenii;
helpa oyhanate oyhampayyaassin,
"turiqatta yeitot oosaa apittin doohisaassenno maraa;
kaappa lamm orqudop qapaa illo unkulaawu qalli naqaa" hen iyyaa kidina.
' he ikkid"
paahnat hotta hakala
(mar. 4,30-32; Luqaa. 13,18-19)
31 Yesus paahnat pilet iyyaa dehay,
"daamum moont qunda hakala hin namat ulayy qall seiyetep kinnaannin;
32 qunda hotta sed qunda hotta dahenn kannett heqoj;
helpa kaanane lamm dihot ulall dahenn qara tawunaannin;
hampiraanno deyyiyan qari qaain illo manaddu uqqari dihannin."
paahnat jaraytat
(Luqaa. 13,20-21)
33 paahnat piletenno iyyaa dehayy,
"daamum moont jarayt pukessa hayisa iskattet qeett daamma kaappa qunna halpatt olle donshoort paahnaannin."
Yesus maanaass paahnatin kolliyy
(mar. 4,33-34)
34 Yesus ishaamaayy dahenn paahnatann siipi ishaam;
paahnat male amm hekolliyemu.
35 it maalla sedep koddit him hin,
"pahanatannin ishaamina;
hin haka husslah uumame hiram dekamin ishaamina."
kidiyyu ikkim kaysaanninoss kida.
Yesus paahnat yeitotat furiy
36 essete Yesus siip haayyad illo man tallop kal.
soolleshayyenno iyy kapop deyen illo,
"intu paahnat yeitot ul sett innu furiy" iyy kiden.
37 Yesus illo kide,
"hin hotta somm seiy meet namat;
38 ulat husslahat;
hotta hin somm meeda daamum Moohaat;
yeitot medda iyy se nayqat kida.
39 olishsh hin yeitot seyiyy taapiloos;
helpa oyhana,
muutayta husslahat;
oyhampayya hitaymiyya Moohaat kida.
40 qum yeitot oosamishshu apittin doohisamishshop lashsh muutayta husslahate sedep koddint.
41 essete meet nam hitaymyoyy hitina;
iyyaanno hin kohayt koddiyyanne nayqunt kodiyy dahenn daamumaayy qalle orqudop qapinan all sohashshinninan.
42 apitt kuuhisa kuuhinniyyu ilopanno all kashinan;
ulla lamm pooytanne iilla ollin quma koddint.
43 tsillampayya lamm daamum appaaddu qalle qum lashshatep otawnan;
nam lappa dakayiyy qapu hedakayu!"
paahnat pas se dekamet
44 sekanna Yesus,
"daamum moont shorokum ulalli dekam paahnaannin;
helpaan nam shokku akke qar ori alldek;
oot iyyat masmas maalla heaan illo iyaan iyyat qapu dahenn allakash illo ul se pidd."
he iyyaa kid.
paahnat inqot tsortet a\f* tsort
45 ukanna Yesus,
"lamm,
daamum moont nakkaatishsh inqot tsort kanna fadiyyu paahnaannin;
46 helpaan nakkaatishsh hin inqot se akke heaan iyaan iyyat qapu dahenn all kashi illo inqot se pidd."
hekid.
paahnat urkupa qurtsummetat
47 ukkannassenno Yesus,
"lamm daamum moont urkupaan op qurtsummetin ola pakatet qari qaasen illo qurtsummet hawhawi kikkishshu uqqalli qapant paahnaannin;
48 it innaakotte lamm huss qarop tishin illo lahi qaain qurtsummet diddikk uqqalle pahinnin shaarallep naqin illo hin nannayq all apaltin.
49 lashsh muutayta husslahate sedep koddnit;
hitaymiyya Moohaat deyina illo juppampayya tsillampayya ila allreehina.
50 juppampayya apitt kuuhisa kuuhinniyu ilop allkashinan;
ulla pooytanne ila ollinquma koddint."
51 Yesus lamm,
"hin dahenn inn hekalenemu?"
he iyyaa kid.
iyyaanno "heyye!"
kiden.
52 semmaalla sedep kid iyyaa mitaattiy,
"kollisampayt halitt hin,
iyaan dekam heka daamum moontall dikkiy upu,
qum appa man se shorokumaay pahayitanne awshitt por se iyyat ulli haaye sohashshinniyyu paahnaannin."
qar hittilaan naasirete Yesus qari pai
(mar. 6,1-6; Luqaa. 4,16-30)
53 helpaan Yesus sed ishaama kaysiy kanna ulla sohad taw;
54 hussayye sapara naasratep dey illo hak siipat shammanninu man dinkamaaddu talla kolliyy;
orr dakayenno shammattan,
"nam hin ufnat sedenne iyyaan nam shamusinniyy ahayla qeedd?
55 hin imm soort manatin hinemu?
mahh inkoshayy maariyaam inhinemu?
insharaddaayyanno yayqoopenne yoosefenne simoonenne yihuta inhinemu?
56 alawutaddaayyanno dahenn innu kapa kiyyanpa?
kat illo sed dahenn ahayla qeedd?"
kiden.
57 sed minann iyy qeeddatta diiyyen.
Yesus lamm,
"himampayt orr hussayyetenne orr manayyetenn serkisama diinnin male amm orr pilin serkisama diinniyamu" iyyaa kid.
58 oot iyyaa iyy amaana diiyyen maalla amm ulli shammot lekit hekodemu.