kaassiy oot sampataat dehaad
(mar. 2,23-28; Luqaa. 6,1-5)
12
1 helpaanette lashsh sampata ayhutaate Yesus,
ul kaappa qallenn tarpin;
soolleshayyenno hetuffen shiyya kaappa mitatta illo quma hiren.
2 faraset lamm sed akken illo "tooyii!
soolleshitt iyaan lashsh sampata qari erkawusama daassama diiy erkannin!"
ikkiden.
3 iyyat illo sedep iyyaa kid,
"taawitet helpa iyyanne orr se iyy olle kiyyu tuffene,
maana ikkim iyyat kod inn inwaarusinnemu?
4 iyyat man moohaatep kal illo laaqqot dayy it suukamma Mooha pateeshsh,
iyyanne orr iyy olle kiyyu dama iddaassama diitt dam.
5 lamm suukamma Mooha et lashsh sampata qari man miilotate erkama kodane,
halitt sampata qar tarpaaddu ikkim nayquntap iyyaa qari dihaminnintu inn halitt qara inwaarusinnemu?
6 antu lamm iyy man miilot qara tawu are kiyy he inni kidin.
7 lamm lel matsaafa se,
'antu fadiyyu olil mutsurootta male amm laaqqaamu' kidiyyu et qalliqaapattan kid orr nayqunt dap qari amm horat quurihaatenemu.
8 semmaalla meet namatenno pold sampataat kida."
Yesus nam harkayy liil diniyy
(mar. 3,1-6; Luqaa. 6,6-11)
9 lamm iyyat ulla sohade man dinkam ayhutaatep aan;
10 ulla lamm nam harkayy muluhluh kiyy;
orr shokku Yesus kasasa fadan,
"sampata qarass kat nam dinisot hedaassamemu?"
kiden kaassaden.
11 Yesus illo sedep kid iyyaa mitaattiyy,
"inn ila nam helemmat qapu et kinnaadu illo helemmat hin sampata qari qaawallep peit kid,
nam qaaw se talla qeedda diinnaay ayno?
12 namat ukkul helemmat qara taw!
semmaalla erkamaan dikk erkasot sampata qarass hedaassam."
ikkid.
13 sekanna lamm nam settess,
"harkayt qall pahiyyii" ikkid.
iyyanno harkayy qall pahiy illo hark se muluhulh dinad porayy oor.
14 faraset lamm ulla sohaden illo ashshann ikkim iyyaa Yesus ikanninan suladen.
erhayt Mooha se pahisam
15 Yesus lamm sulashaddu ufunaad illo all kidd;
siip lekenno iyy olle aanen;
iyyat illo orr baaqiyyonno dahin diniyy.
16 lamm iyyat aynu koddaay ikkim iyyaa inleliness orr se acac.
17 hin sedep maalla koden,
him se isaayaas himampayt him ikkim kaysaanninnoss kida,
18 "toare!
erhaytaawu iyy antu pahisad hin iyy!
iyyat iyy antu hoxsaanniyonne iyyin masmasiyyu;
laaffoshawun iyy qari haayina;
iyyanno horat pahitt siip husslahati eeshina;
19 iyyat amm shiittamanninamu shoke amm ullupinamu,
nassaayy amm paanaalle dakaysamaaninamu.
20 shompoqqot qall dokkosant amm qeppinninamu;
qayya shipira mina qayyawiyu amm liqinninamu;
iyyat sedep kodinu,
hak horat pahitt
heikketin pushintoss kida.
21 siip husslah iyy qarass irraxatet haayanninan."
yesusenne pielsepul
(mar. 3,20-30; Luqaa. 11,14-23)
22 sekanna orrat nam qayyin qapam indamala kodd,
kapatucamenn Yesus kapop deyen;
Yesus illo nam sett diniy;
iyyat akkaanne ishaama fott.
23 siipanno dahenn shammaden illo "hin meet taawit koddinamu?"
kiden.
24 helpaan faraset sed dakayene lamm,
"iyyat qayy sohashinniyyu pielsepul,
sheela qayyatenn kodda fadusinnin" hekiden.
25 Yesus lamm qaapaaddu ufunaad illo sedep iyyaa kid,
"daamum orqall qootiyu dahenn all patin;
settep lamm orr man shokkooh shoke sapara shakkanooh et orqall qootiyane amm qima ella fottiyyanemu.
26 et sheela qayy seetsanat seetsan sohashshinniyyo hepurjaaj kidapa?
ashshann daamumaayy ella fottina?
27 etin antu pielsepulin qayy sohashshinniyyu koddo,
meddaann lamm maanaann sohashshinninan?
semmaalla meddaann inn qarass horat quurinan.
28 etin antu laaffot moohaatin qayy sohashinniyyu koddo,
daamum Mooha inn kapop deyaayy ufunaadaa.
29 kat nam shokku turaqatta irrampayt qapa all hida male man irrampaytatep kala mehaddaayy ponqa fottiyyamu?
30 nam an olle kiyatta diiyy dahenn an shiittin,
nam lamm an olle orqudop qapa diinniyyu allpulpulin.
31 semmaalla innassin lelin,
juppotanne otitta dahenn orass all diissaminan;
hekoddu male nam laaffot miilot otess amm all diissamintamu.
32 nam meet nam qari lel otitta leliyyu dahenn all iyy diissamint;
nam laaffot miilot qari lel otita lel dahenn lamm ammannenno koddo ittureesh sapan deyyiyonno amm all iddiissamintamu.
qoyr dikk dalotayyenn ishaahamannin
(Luqaa. 6,43-45)
33 "qoyrat dalotayyenn ishshaahamannin,
qoyr dikk dalotayyenno it dikkat koddin;
qoyr nayq dalotayyenno it nayqat koddin.
34 inn medda pushat,
iyyaan nannayq koddtete iyaan dikk ishaama ashshann fottintan?
namat kapayyin ishaamiyyu iyaan mutsuroyy qall innaak illo all palljiyy kida.
35 nam dikk hin dikk iyyat mutsurooyy qalle qapu qara iyaan dikk sohashshinnin;
nam nayq lamm hin nayq iyyat mutsurooyy qalle qapu qara iyaan nayq sohashshinnin.
36 antu lamm innassin lelin,
namat lel se iyyat ullinhaash leliyyoss dahenn lashsh horatate kapass kaasawusamina.
37 maana maalla,
lelayt minanni tsillot akkannint;
lamm lelayt minann horat hed qari quuramint."
kaassiy ishaak akka dehaad
(mar. 8,11-12; Luqaa. 11,29-32)
38 helpaanette kollisampayya halittatenne faraset ila karatiddu,
"kollisampayt!
Moohot hed hitaayy innu inxishaakinnu akkan fadin;"
he iyyi kiden.
39 iyyat illo sedep kid iyyaa mitaattiy,
"dalashot nayqatenne amaantet daft ishaak fadin;
hekoddu male ishaak yonaas heka himampayt pateeshsh ishaak pil amm iyyaa daassaminamu.
40 qum yonaas kard qurtsummet kaant qalli kallapat halpattanne awaddat halpatt oladep,
antu meet nam huss kellassin kallapat halpattanne awaddat halpatt olannina.
41 orr sapara nenew lashsh horatate dalashot sed olle sohanninan horat iyy qari quurinan;
maana maalla,
iyyaa lel Mooha se yonaas ishaam dakayen illo jupposhaddu qara mitaaten;
ammann lamm iyy yonaas qara tawu are kiyy.
42 haaet asep dalashot sed olle hayint illo lashsh horatate iyyaa qari horat quurinta.
it ufunat salamoon dakayaass muutasha huss mina deitt.
toare ammann iyy salamoon qara tawu are kiyy"
qalli mitaata laaffot oshshittetat
(Luqaa. 11,24-26)
43 ukkannass Yesus sedep kid,
"helpaan laaffot oshshittet nam qara sohatto por haysatta fadattaann por haqat ulla teeke lak kok ili mimmitaatin;
hekoddu male amm akkannishshamu.
44 semmaalla,
'manaawu se antu ulla sohadepin mitaatina annina" hekidin.
helpaan it mitaatishsho lamm man hin patt kinnaann,
ushuqamin senin it akkin.
45 sekannakuless annishsh qayy tapp iyyaan it qareell nannayqin iolle deyin;
man se it turin ulla kishshop inkalin illo iyya ulli ollin kallaannin.
kiyyat nam settetenno hekat turaqatta qareell hekat kanneeshsh it nayq koddin."
dalashot sed nayq qarassenno sedep koddint.
inkot yesusenne insharaddaayy
(mar. 3,31-35; Luqaa. 8,19-21)
46 helpaan Yesus siipi ishaama qara kiyyo,
inkoshayyene insharaddaayy iyy olle waara faden illo alti ellen. [
47 illo orr se ulla kiyyu ila iyy shokku yesusess,
"toare inkoshaytenne insharaddaatt hed olle waara faden,
alti ellen" ikkid.]