orrhitaym hundann lakk
(mar. 3,13-19; Luqaa. 6,12-16)
10
1 Yesus soolleshayy hundann lakk ikapop hemb illo ikkim laaffot oshshittet sohashinninanenne kattkala dahenn dininninan hayyotum iyyaa dayy.
2 mahh orrhitaym hundann lakk settetenno hiniy;
shokkiyyot,
simoon se betsiroos kidamenne kafitaay intiriyaasenne,
medda saptiyoos yayqoopenne yewannis,
3 filiboosenne paritolomoosenne tomaasenne matiyoos qarats quurampaytanne imm ilifiyoos yayqoopenne taatiyoosenne
4 simoon se hussay maalla sotiyyonne yihuta asqoritishsha se Yesus tarpiyy dayy.
orr hitaym hundan lakk kolila hitamaaddu
(mar. 6,7-13; Luqaa. 9,1-6)
5 Yesus orr hitaym hundann lakk settess sedep kid acac illo hit,
"orr se ayhuta kodda diiy kapop anta diiyyaa;
sapara orr samaariyaatep anta diiyyaa;
6 sekapeeshsh isiraelet se qum helemmaatep qishshawt kapop aanaa male.
7 et antane,
'daamum Mooha hedehaad" kidaa kolliyaa.
8 baaqamipayya diniyaa;
nam toy hayyiyaa;
orr paylot qap diniyaa;
qayyanno ariyaa;
patti qeeddattene patt dayaa.
9 paanaas woriqet koddonno pirret koddonno taamunet koddonno okolet kela inxannatta diiyyaa;
10 shoke karatsitet koddonno tsippuqot lakk shoke hopa koddonno halitt koddonno qeedatta diiyyaa;
erkamampaytass dama ifadusinnine.
11 por heikkete sapara shoke paat se inn ullop anten qalle nam inn qeeddanninu tooyaa illo hak ulla sohannintan ulli laxaa.
12 et man tallop lumishshane paanussa dehayaa.
13 et orr man sett paanusaann inn qara qeedadane andoshayn iyyaa kodditu;
et qeeddatta diiyyane lamm andoshayin all inni mittaatu.
14 et namat inn qeeddatta diinniyyonne lelaayin dakaya diinniyyu inn man sette shoke saparaanette sohannishshane tsura lukkaann pata allihissisadaa illo sohadaa.
15 shaakketin inni lelin,
lashsh horatate saparaan kapa huss sotometenne heka kamoraatess horat hoshilint.
rakkot dexema pold turan deyintu
(mar. 13,3-13; Luqaa. 21,12-17)
16 "qum helemmaatepin otant sessepa ilop inn hitina;
semmaalla qum maakaatep paasamppayya,
qum elelaatep dippatayya koddaa.
17 orrat horatass mooraallep inn dehanninan,
man dinkamaddu tallassenno inn tolinane illuushadaa.
18 mahhaawu minann peashisampayaanne daamada turop horati inn dehanninan;
sedenno iyyaassenne siip husslahatess ikkim maanyet koddintaness kida.
19 helpaan iyyaa inn taripinniyyan daanniyayne,
'ashshannin ishaminna shoke maanan kidinna?
' kidan baaqura diiyyaa;
iyaan inn essete ishaamintan innass daassaminan.
20 iyy ishaaminu laaffot appaayin se inn qalle kiyyu male amm innamu.
21 kafitt kafittayy,
appaanno meetayy toxt taripinnina daannina,
meddaanno leemmooddu qarass sohanninan ikanninan.
22 mahhaawu minann namat dahenn inn qari hittinnina;
hekoddu male nam hak muutaytaat kokkaanninu dinannina.
23 saparaan shakkan qalle et inn miidiyyane sapara pilap allifeeladaa;
shaakketin inni kidine,
hak meet nam deyinu amm sapara isiraelet oriminin kayisinnihinitanemu.
24 amm soollet kollisampayt qara tawnaannishshamu;
amm ayletanno poldaadd qara tawnaannishshamu.
25 soollet qum kollisampaytaddetep,
ayletanno qum poldaddetep kinnaatto iiss kayina.
et appa manati 'pielsepul' kidane,
ashshann mahh sed qareell nayqin orr manaayy hemba diinninan!
ikkim aynu hura fadusinniyyu
(Luqaa. 12,4-7)
26 "sedeeshsh nam tura huura diiyyaa;
hin qar shuqishuqisam qar pulamaaddu,
hin dekamenno ufunashamadu amm hatinamu.
27 semmaalla hin antu poorinnat pati inni ishaamiyyu attumat mina ishaamaa;
hin inn hashashin dakayiten mooraalle por siipat dahenn dakayiyyu ishaamaa.
28 nam se soha ikasaah fottiyyu nafeset ikasa fotta diinniyyu huura diiyyaa;
sekapeeshsh Mooha se nafisetanne soha kehanem qalli allipatisa fottiyooh huura.
29 pumpunnayya lakk pakkannaas kashaminpa?
hekoddu male has appaayin heka moontall male pumpunnayya shakkannooh naf amm husslah qara ullinhaasha peiyan all hatimu.
30 inn lamm rifant mashshayn naf dihaassa qaft.
31 sedeeshsh huura diiyyaa inn pumpunnayya lek qara tawutan.
32 semmaalla nam se nam turass hekaawu koddaay leliyyoss dahenn antu lamm appaawu se moontalle kiyyu turass hekaawu koddaayin lelina;
33 nam se nam turi an marmanniyyu ananno lamm appaawu se moontalle kiyyu turasin iyy marmannina.
34 antu husslah qarop deyy andotassep inas inkinnaannin;
torannin deyy male amm andotannemu.
35 antu deyy,
immat ikkim appaay qarass,
inant inkotadd qarass,
haypaat haqitotadd qaras ollishshumin sohanninaness kida.
36 semmaalla namass orr manayyet olishshada ikoddina
37 nam an qara tawuniniyyu appaayyenne inkotayy hoxsaanniyyoss hekaawu koddot amm iyyi fottamiyyamu;
nam an qara tawuninnin immayy shoke inantayy hoxsaanniyyu amm hekaawu koddot iyyi fadusinniyyamu.
38 nam masqaletay haisatta illo an kanni anta dinniyyoss hekaawu koddot amm iyyi fadusinniyyamu.
39 nam kiyyatayy akkatta fadiyyu dahenn kiyyatayy allpatinnina;
nam ootaawu maalla kiyyatayy allpatinniyyu kiyyatayy akkannina.
40 nam inn qeeddanniyyu ann qeddannin;
nam an qeeddanniyyu lamm se an hit qeeddannin.
41 nam himampayt,
himampaytumaayyin qeeddanniyyu heriy himampaytat qeeddanina;
nam tsillampayt tsillampaytumaayyin qeeddanniyyu heriy tsillampaytat qeeddanina.
42 shaakketin inni lelin;
nam hin titinax ila iyy shokkoss oot iyyat soolleshawu kodd maalla haq qapanaw kuppayya shakkanooh naf daanniyyu amm heriyayy dapinnamu."