Yesus nam muluhuluh diniyy
(mar. 2,1-12; Luqaa. 5,17-26)
9
1 sekannakkules Yesus konikallep fayyad pakatet se qar tarip illo saparooyap dey.
2 orrat nam muluhluh rohan haxiyen iyy kapop indeyen.
Yesus illo amaanteshaddu akk nam se muluhluh kide "meetaawo,
hayy!
naha diyii!
jupposhitt all hedi ushuqant".
3 essete kollisampayya halitt ila shakkan mutsurooddu qalless "nam hin Mooha otin" hekiden qaapaden.
4 Yesus lamm qaapaaddu ufunaad illo,
"maanaas iyaan nayq mutsuroonn qalli qaapannin?
5 kat 'jupposhitt all hedi ushuqant' kidaanne 'sohadu aanii!
' kida ila hekann hoshilin?
6 hekoddu male antu meet nam husslah qara juppot all ushuqa hayyotum qafinaataawu ufunaadaa!"
hekid illo nam se muluhluhess,
"sohadu afandoott haxisadu illo manaytep kalii" ikkid.
7 nam settenno sohad illo manayyep kal.
8 siipat sed akkene heshammaden illo huurran Mooha se hayyotum sedep kiyyu nami dayy aypisaden.
Yesus matiyoos hemb
(mar. 2,13-17; Luqaa. 5,27-32)
9 helpaan Yesus ulla sohad anniyyo,
nam maatiyoos kidamiyyu qarats quura laiyy akk illo "hooyii an olle" ikkid;
iyyat illo sohad iyy olle aan.
10 helpaan Yesus man maatiyoose dama qara kiyyo,
qarats quurampayyaannea juppampayya lek dey illo yesusenne soolleshayy olle laiyy.
11 faraset illo soolleshayyess,
"kollisampaytaann maannass qarats quurampayyaanne juppampayya olle damin?"
kiden.
12 Yesus lamm sed dakay illo "baaqampayyass male orr dikkass amm akimishsh fadusinniyyamu;
13 hekoddu male aanaa illo lel matsaafa hin,
'antu fadiyyu olli mutsurootta male amm laaqqaamu' kidiyyu maana kida,
ikkim kodd kann fadaa;
qall qaapadaa.
antu dey,
juppampayya ikkim juppot qara mitaatinan hembaass male amm tsillampayya hembaassemu" iyyaa kid.
14 helpaanette soollet yewannis heka ahalisampayt Yesus kapop dehaaden illo,
"innonne faraset helpa leken dama kapa duupannin,
soolleshitt kat maanaass dama kapa duupatta diinnin?"
ikkiden.
15 Yesus illo sedep iyyaa kid,
"helpaan haypanish iyyaa kapa kiyyo paallet dama kapa duupattot iyyaa fadusinniyyamu?
hekoddu male helpaan haypanish iyyaa kapa qeeddaminu deyina;
essete dama kapa duupanninan.
16 nam uuwaat kerdit qari erpet awshittet erpiyu amm hekiyyamu;
et erpane lamm,
erpet awshittet uuwaat kerdaytet sett all kakkaain,
illo kaaxamunt settenno heka tureeshsh qara tawnnaannin.
17 nam akal pahayt qalli ukot weynet awshittet oorinniyu amm hekiyyamu;
et settep kodane lamm akal hin paqiy,
weynet settenno alltiiqamin;
akal setteno aypotass allpatin;
semmaalla tank awshitt akal awshittalli oorisama fadusinnin;
et sedep kodaneeh ollin olata fottin."
inant yairosenne dakusot se uuwaat Yesus qapatt
(mar. 5,21-43; Luqaa. 8,40-56)
18 helpaan Yesus sed ishaama qara kiyyo,
kaadayt shokku dey illo lukkaayy keli kilpiyad,
"meeshiyu ammann toyish;
hekoddu male et deytu harkayt qari qafito dinanninit" ikkid.
19 Yesus illo sohad soolleshay olle iyy kanni aan.
20 essete iskattet shakk par hundan lakk diikat qara ella dinniyu patayalleeshsh dey illo qema uuwaashayy qappat;
21 it sedep kodit,
"etin uuwaashayy nafeeh qappado dinanninhina" kidan muturood qalli qaapataann kida.
22 Yesus lamm ippateesh mijir kid it tooy illo "haayy!
naha diiyii,
meetoot!
amaanteshitt hed hedinitt" ikkid.
it illo esseteeh dinatt.
23 helpaan Yesus man kaadayt settete paiye orr tarpa dawiyyonne pawuriyu akk illo,
24 "meet hin hepeat male amm hetoytemu;
are allkiddaa!"
iyyaa kid.
iyyaa lamm deffeeqa iyy qara holisaden.
25 helpaan siip hin allsohad kanna Yesus por se inant hin ulla kishshop luum harkadd qapp it illo hayt.
26 hin kodenno huss se qalless dahenn dakayisamaaden.
Yesus indamala lakk diniy
27 helpaan iyyat ulla sohad anniyyo,
indamala lakk iyy kanni anta hir illo,
"meet taawite!
tonhedess innu mutsuroodu!"
kidan ullupen.
28 helpaan iyyat tallop kale indamalaan iyy kapop dehaaden,
illo Yesus,
"ikkim antu hinep kiyy erkasa fottiyyu amaanikkishshanemu?"
iyyaa kid.
iyyaa illo "heye polda!"
kiden immitaattiyyen.
29 essete iyyat illo,
"qum amaanteshayn mitt inni kodditu" kid indaaddu qappad.
30 indooddonno lak akka hiren;
Yesus illo,
"hin inni erkawusam nam lela diiyyaa!"
hekid qimiy iyaa acac.
31 iyyaa lamm ulla sohaden illo paat se qallesh dahenn ootaayy torren.
Yesus nam kapatucam diniy
32 helpaan orr hin indaaddu dinaden ulla sohaden kanna orr pil,
nam qayyin qapam kapatucamenn Yesus kapop deyen.
33 helpaan qayyatin qara sohad kanna nam hin kapatucam hewaar.
siipanno,
"amm apure hinep kiyy israaelet kapa heakkaadenemu" kidan shammaden.
34 faraset lamm,
"pielsepul,
sheela qayyatenn qayy sohashshinnin" hekiden.
Yesus siipass dappiyy
35 Yesus manna dinkam ayhuta talla kollisaanne lel masmasunt heka daamum Mooha lelaanne kattikalaanne baaq dahenn dinisaan saparadaanne paattaal dahenn mimmitaatin kida.
36 helpaan iyyat siip akke oot iyyaa qum helemmaan sinkitt dap baaquriyyanne por uqqari mitaata dapep kinnaaden maalla iyyaass dappiy.
37 helpaanette soolleshayyess sedep kid,
"uunt palhit helekit;
erkamampayya lamm heqoj.
38 semmaalla ikkim erkamampayya uunt sett hitinu appa uunt sett dinkamaa."