Yesus nam baaq payloti qapua diniyy
(mar. 1,40-45; Luqaa. 5,12-16)
8
1 helpaan Yesus utet se qareett lekkade siip lek iyy kanni aan.
2 helpaanette nam paylotin baaqiyyu Yesus kapop dey turi kilpiyad illo,
"poldaawo!
et hinnaatto an dinisab fottihhint" ikkid.
3 yesusenno harkayyin iyy qappad illo,
"henhinnaade dinii!"
ikkid.
paylot settenno esseteeh iyy qara tawit.
4 sekkanakuless Yesus nam se paylot qara tawitess kide,
"hin hedi erkawsam namass illelan;
sekkapa aanii suuka Moohaat iakkiyyii;
ikkim siipi maanyet koddintu daayy se muuset acac oot dinayteti Mooha dehayyii" ikkid.
Yesus erhayt sinkitt tseetat diniyy
(Luqaa. 7,1-10)
5 helpaan Yesus sapara qifirnaahometep kale sinkitt tseetat iyy kapop dey illo,
6 "poldaawo,
erhaytaawu hemuluhluh talli pead illo ikkaani rakkannin" kid iyy dinkamad.
7 Yesus illo,
"an annina dininina" ikkid.
8 sinkitt tseetatenno sedep ikkid,
"poldaawo,
manaawu tallop lumaass amm hedi koddintamu;
hekoddu male leleeh lelii;
erhaytaawu dinannina.
9 antu mashshawoss hayyot an qareell kiyy antu iacacamiyun qap,
wotaattara antu ikannaatt acaciyyonno hekiyyan.
iyyaa ilanno etin iyy shokkoss 'aanii!
' kidiyyo anniyy;
etin iyy shokkossenno 'hoyyii!
' kidiyyo deyiyy;
etin erhaytaawossenno 'sed erkayyii!
' kidiyyo erkanniyy."
10 helpaan Yesus ishaamaayy dakaye heshammad illo orr se iyy olle kiyyossenno sedep kid,
"shaakketin inni lelin;
nam amaantet sedep kaant qapu israaelet naf ila amm apure henxakkemu.
11 orr lek dind lashsh yaamishshooshshanne peishshooshsh deynan;
aprihaamenne isaaqenne yayqoop olle daamum moont qalle dama kapi lainan hen inni kidin.
12 lamm hin daamum moontall iyyaa dikkisant poorinnat se qint ilas alti kashaminan;
ullanno pooytanne iliha ollin qum koddint.
13 sekkanna Yesus sinkitt tseetatess,
"aanii;
qum amanteshayitett hedi kodditu" kid.
erhaytaayyenno helpaan ili dinad.
Yesus orr lek baaqaddu ila diniyy
(mar. 1,29-34; Luqaa. 4,38-41)
14 helpaan Yesus man betsiroosep aane,
inkot haypaat betsirooset qefan paaqin ulli peatt iyaat akk.
15 harkaadd qappadekul qefaanettenno it qara tawen;
it illo sohatt iyaan yesusi fadusinniyy ierkasa hirt.
16 helpaan lashsh ponnaatte orrat orr lek iyaan qayyin qapamenn Yesus kapop deyen illo iyyat lelayin laaffot oshshittet qara ariyy;
baaqampayyaanno dahin diniyy.
17 sed erkasaayyenn him hin isaayaas himampayt ,
"iyyat kattikalaannu qeeddad;
baaqaaynonno haiyy" kid kaysaad.
orr se Yesus kanni anniyy qarass rakkot deyishshu
(Luqaa. 9,57-62)
18 Yesus helpaan siip lek iyy kapop deyiyyane akk illo ikkim pakatet patop tarpinani soolleshayy acac.
19 lamm nam shokku iyy kollisampayt tampet kodd dey,
illo "kollisampayt,
por se att annishop dahenn hed olle aanonu" ikkid.
20 Yesus illo,
"kaxalt qaaw qafta;
hampiraanno ays qapan,
antu meet namc lamm por antu mashshaw ukeli qapanninu naf amm henqapamu" hekid immitaattiy.
21 soolleshay ila iyy shokku,
"polda,
turaqatta aanonu appaawu mookonud" heikkid kaassad.
22 Yesus illo,
"raawet pukkaddu mookadenii att lamm an kanni hooyii;"
ikkid.
Yesus kaahatta pakatetat rui kidusiy
(mar. 4,35-41; Luqaa. 8,22-25)
23 Yesus konkaallep fayyad illo soolleshayenno iyy olle aanen.
24 oot kota kaan pakatet qara sohaden maalla kaahatta pakatet konka se limusisa hir;
Yesus lamm hepead.
25 soolleshiyy illo sohaden Yesus kapop dehaaden illo,
"Polda!
patinkinn;
innun hati!"
kiden iyy hayyiyen.
26 iyyat illo,
"inn hin amaantet inni qoj!
maanaas nahin?"
iyyaa kid.
illo sohad haayyaanne kaahatta pakatet sett tush;
iyaanno pawui kiden.
27 orr settenno shammattaan,
"hin haayyaanne kaahatta pakatet naf iyy kap dakayiyyan,
nam ashshann kiyyo?"
kiden.
Yesus nam lakk iyyaan qayin qapam diniyy
(mar. 5,1-20; Luqaa. 8,26-39)
28 helpaan Yesus pakatet kelila qara tarp huss se kerkesenon kidamiyop deye,
nam lakk iyyaan qayyin qapam poosa qara sohad iyy mini paiyy;
oot orr hin lakk iyyaan nannayq kodden maalla,
amm namat paana se qallin tarpa fottiyyamu.
29 iyyaanno "meet moohaate,
maana innu olle qaft?
helpaan paisa male innu miida deitemu" hekiden ullupen.
30 iyyaa kapeesh por jawihayy seka,
heelt maashat,
it hiikant kiyy.
31 laaffot oshshittet hinet illo,
"et innu sohashshinnishshu koddo,
tonhedess,
heelt maashat sett qallep innu hayyii!"
kidit dinkamatt.
32 Yesus illo,
"aanaa!"
iyyaa kid.
semmaalla laaffot oshshittet hinet orr se qara hesohatt illo heelt maashat sett ilop kalt.
heelt maashat settetenno dahenn kamara qareett feelanta yaamen illo pakatet se ili limamen raawen.
33 shinkama maashat settetenno feeladen,
saparaallep kalen illo hin heelt maashatatenne orr se laaffot oshshittetin qapam qari kodd dahenn ishaamen.
34 sekkanna orr saparaanett dahenn Yesus akka sohaden aanen;
helpaan iyyaa iyy akkenekuless ikkim hussaaddu qalle sohanninu all anninu dinkamaden.