orr pil qari horat quura diitta
(Luqaa. 6,37-42)
7
1 Yesus asset kid,
"horat inn qari quurama tura nam qari horat quura diiyyaa;
2 se inn nam qari horat quurishanep horat inn qari quuramint;
hin inn inhurtenennenno inni huramint.
3 qapayya se iilshayt ila kiyyu akka male maanaass shoqqa se iilt kafittaayt ila kiyyu tooyin?
4 lamm qapayya se iilshayt ila kiyyu allqeedda male,
ashshann kafittaayti,
'intu an shoqqa se iilshayt ila kiyyu qeeddono' kidin?
5 yem ippeepampaytu!
turaqatta qapayya se iilshayt ila kiyyu all sohashshiyii;
sekkanna shoqqa se iilt kafittaayt ila kiyyu qeeddaass dikkinnihhint akkintta.
6 iyaan miilaw herrada daatta diiyyaa;
inqoshaynennoa maashat turi kasha diiyyaa;
maashat inqoshayn qall lukkan iqannint;
herradaanno mitaatinan inn qaninninan.
dinkam
7 "dinkamadaa innass daassaminta;
fadadaa akkannihhintane;
karfa kokkoyiyaa innass qahisamina;
8 nam dinkamanniyu dahenn qeeddannina;
nam fadanniyonno akkannina;
nam karfa kokkoyinniyyossenno qahisamina.
9 inn ila nam meetaayy laaqqot fadanniyyo daka iddaanniyyu ayno?
10 helpa qurtsummet fadanniyyo maakot iddaassamiyamu?
11 et inn iyyaan nannayq kodditete meddaannass iyaan dikk daatta ufunaattene,
appaann heka moontall orr se iyy dinkamanniyyoss ashshann seqara tawunisan iyaan dikk idaatta diinnina!
12 semmaalla iyaan ikkim namat inn erkanninu inn fadishshan dahenn settep lamm innanno nami erkayaa.
halittanne kollila himampayyaatenno sedeeh leline.
kaalt hippawt
(Luqaa. 13,24)
13 "kaalt hippawt qallin kalaa;
kaalt hin por nayquntatep namin annishshu it paldat,
paana kaalt settetenno iyy pald.
orr ullop kaliyonno iyyaan lek.
14 kaalt hin por kiyyatatep namin annishshu lamm hippot;
paana kaalt sett iyy nam rakkusinniyyu;
orr paana se akkanninonno iyyaan qoj kida.
qoyrat dalotayyenn ishshahmannin
(Luqaa. 6,43-44)
15 "himampayya eerpa hin pattallel helemma pahannaanniyy lamm tallanhaat qum sessepaatep ponqampayya kodd inn kapop deyiyy qara ittooyadaa.
16 inn iyyaa ufunaannintan qunda erkamooddoten kida.
quddeet ila dalot woynet,
haashshet ila dalot daishsh pohiyanemu?
17 settep qoyr dikk dahenn dalot dikkat dalin;
qoyr nayq lamm dalot nayqat dalin.
18 qoyr dikk amm dalot nayq dala fottiyyamu;
qoyr nayqanno amm dalot dikk dala fottiyyamu.
19 qoyr dalot dikk dala diinniyyu dahenn,
all quuramin apitt ili all kashamin.
20 semmaalla himampayya eerpa qunda erkamooddotenn ufunaannintan.
21 nam daamum moont qallep kalinu,
iyy has appaawu se moontalle kiyyu kaysinniyyu male,
amm nam,
'polda!
polda!
' ani kidiyyu dahennemu.
22 lashsh horatate orr lek,
'polda!
polda!
innu mahhaaytenn him inhiminemu?
innu mahhaaytenn qayy insohashinemu?
mahhaaytenn shammot lekitenno inxerkannemu?
' he ani kidinan.
23 ananno lashsh sette,
'amm apure inn henxupamu!
inn iyyaan nayqunt erkanniyy an kapa all sekaadaa!
' hen iyyaa kidina.
paahnat man shilk qaratenne heka shaahatt ilat
(Luqaa. 6,47-49)
24 "nam lelaawu sed dakayiyyu erkaman akkinniyyu dahenn,
nam qalpet qapu shilk qari manayy dih paahnaannin.
25 roopanno roop,
malhaatanno deit,
haayyaanno haayyaw illo man se tuqquur;
hekoddu male oot man hin shilk qari diham maalla amm hesunkemu.
26 nam lelaawu sed dakaya erkaman akkisa diinniyyu dahenn,
eepayt shaahattalli manayy dihad paahnaannin.
27 roopanno roop,
malhaatanno deit,
haayyanno haayyaw illo man se tuqquur;
man settenno esseteeh sunk,
sunkantayyenno innayq kodd."
28 helpaan Yesus kollila hin kaysiyy kanna siipat kollilaayyann dikkiyen shammaden.
29 iyyaa shammaden,
oot iyyat kollisampayyaaddu hin halitt kollinniyap kodda male hayyotap kollinniyyu maalla kida.