nam dapi daatta
6
1 lamm Yesus asset kid,
"nam innu akku kidan erkamaann hin dikk nam turi erkasa qara illushadaa;
et nam innu akku kidan erkannishane,
appaayn appa moontall kapa amm heriy akkannihhintanemu.
2 semmaalla helpaan att nam dapi daannishsho qum ippeepampayya man dinkamatenne paanaalle ippeepa daanniyanep daatta diiy;
shaakketin inni lelin,
iyyaa heriyaddu turaqattaass akkaden.
3 lamm helpaan att daannishsho hin harkaatt miskittishsh daanniyyu pihitishsh ufunaatta amm fadusinniyyamu.
4 et daannishsho deketi dayyii;
appaatt hin iyaan deketi erkawusamiyy akkiyyu,
erkamaatt hin dikkass heriy hedi daannina.
oot dinkamat
(Luqaa. 11,2-4)
5 et dinkamannishshane,
qum ippeepampayyaatep kodda diiyyaa!
iyyaa ikkim namat akkinoss kidin por orqud qapamaatenne paana kapi ellan dinkamatta hoxsaannin.
shaakketin inni lelin,
iyyaa heriyaddu turaqattaas qeeddaden.
6 att lamm et dinkamannishsho,
manayt tallop kal karfa duhadu illo appaayt se akkaatta diinniyyu kapop dinkamadu;
appaatt hin iyaan deket erkawusam akkiyyu heriyaayt hedi daannina.
7 "helpaan inn dinkamannishshane qum orr Mooha amaana diiyyetep aypoti lel qar oxoora diiyyaa;
iyyaa lel qar oxooraaddu maalla afa Moohot dinkamaaddu iyyaa dakaynop iyyaa kinnaannin.
8 lamm oot appaan iyaan inn fadusinniyy inn dinkamatta turin upu maalla,
qumaddop kodda diiyyaa.
9 semmaalla sedep kida dinkamadaa:
'appaaynu hed se moontalle kallaanniyyu!
mahhaayt hemiilawu;
10 daamumaayt hedeyu;
qum hasaatt moontall koddep,
hussallessenno hekoddu.
11 dama lashsh,
aw innu dayyii
12 qum innu dapat orr innu qara kal all iyyaa diinninkinnop,
jupposhaynu all innu diiyii;
13 se nayq kela innun hatii male,
ekkawusamallep innu kalisa diiyii;
[daamumat hekayt irrotanno serkaanno
hak parparatess.
ameen.']
14 "et orr nayqunt inn qari kodess nayqunshaddu all iyyaa diittane,
appaayn heka moontalletenno nayqunshayn all inni diinnina.
15 et orr se nayqunt inn qari kod nayqunshaddu all iyyaa diitta diittane lamm appaayn heka moontalletenno amm nayqunshayn all inni diinninamu."
dama kapa duupatta
16 Yesus sedep kid,
"helpaan inn dama kapa duupannishshane qum ippeepampayyaatep melqama diiyyaa.
iyyaa dama kapa duupattaaddu nami ufunaytisaass miintaddu ponnaytinnin;
shaakketin inni lelin,
iyyaa heriyaddu heqeeddaden.
17 lamm helpaan att dama kapa duupannishsho miintaytenno jiqadu,
mashshaytenno tifin roopadu.
18 paana sedenn dama kapa duupattaayt appaayt se akkaatta diinniyyu pateeshsh nam pil amm ufunaanninamu.
appaatt hin iyaan deketi erkawusam akkiyyu heriyayt hedi daannina."
shorokum husslahatenne heka moontallet
(Luqaa. 12,33-34)
19 lamm Yesus asset kid,
"are husslah qara por se piletanne jaljalot all nayqinniyan,
keraxalaanno qeppinniyan hashiyan shorokumayn haayatta diiyyaa.
20 sekapeeshsh por piletanne jaljalot nayqisa diinniyyan,
keraxalaanno qeppisa hasha diinninane moontalli shorokumaayn haayadaa.
21 por se shorokumaatt kiyyo mutsurraattanno ulla kinnaanninane.
ispa dakintat
(Luqaa. 11,34-36)
22 iilt ispa dakintat;
et indaatt iyaan dikk koddane dakinshitt dahenn it attumatin innaakoott koddint.
23 lamm et indaatt iyaan dikk kodda diiyyane dakinshitt dahenn it poorinnatin innaakott koddint.
et attumat hin dakinshayt ila kishshu poorinnat koddito,
poorinnat hin ashshann hursaannint!
oot kallatat baaqura amm fadusinnishshamu
(Luqaa. 16,13; 12,22-31)
24 "nam shokkooh amm pold lakki erhayt kodda fottiyyamu;
shokku hittinnin,
shokku hoixsaannin;
shoke iyy shokku serkinnin,
shokku tuffannin;
innanno lamm helpa shakkanooha amm moohaanne kodashetass erhama kodda fottihhintanemu.
25 semmaalla sedepin inni kidin,
'maanan daminna?
maanan ukinna?
maanan uuwannina?
' kidan oot kallashayneti baaqura diiyyaa;
kiyyat dama qara,
dakintanno uuwaat qara intawtomu?
26 intu hampiraan moontallin hayyanniyy tooyaa,
amm uunt seysanniyanemu;
amm orqudi qapanniyanemu;
amm unkullaallepanno kalinniyanemu;
hekoddu male appaann heka moontall iyyaa dansinnin.
inn lamm hampira qara tawtanepa makess?
27 inn ila nam baaqurin paraayy qari lashsh shakkaaha naf padawatta fottinu ayno?
28 lamm oot uuwaatat maanaass baaqurin?
pulal shoqqa qersha qarash ikkim ashshann kammiyu intu tooyaa;
amm erkaman tashshiyyanemu amm shipiriyyanemu;
29 hekoddu male salamoon Daam naf serkayy hin kaanenn amm qumaddop heuuwademu hen inni kidin.
30 inn hin amaantet inn qoje,
kat Moohot shoqqa se aw akkaannin paarre apitt ili kashaminu et sedep siriyyu koddo,
ashshann shoqqa se qara tawunisan inn uuwashisa diinnina!
31 semmaalla maanan daminna?
maanan ukinna?
maanan uuwaninna?
kida baaqqura diiyyaa.
32 hin akkattaass orr husslahatenno sootinpa;
hin dahenn ikkim inni fadusinniyaness appaann,
appa moontall heup.
33 inn lamm turaqattiya daamum Moohaatenne tsillumaayyanno fadadaa,
hinenno dahenn innass padawaminan.
34 semmaalla oot paarreti baaqura diiyyaa;
paarr mashshaddess baaqqurint;
lashshass nayquntidd it kayint."