kollila utet qarat
5
1 Yesus siip lek akk illo utet qarop fayyad ulli lai;
soolleshayyenno iyy kapop dehaaden.
2 iyyat illo sedep kid iyyaa kollisa hir.
orr hartood
(Luqaa. 6,20-23)
3 "Orr Moohot iyya fadusisaayy ufnaad,
oot daamum moontall iyyaa kodd maalla,
hehartooden.
4 orr dappinniyu oot Moohot iyyaa kokkinniyu maalla
hehartooden.
5 oot dippatayya huss tayinan maalla hehartooden.
6 orr tsilluma tuffiyonne deepoonniyu oot iyyaa duttanninan maalla,
hehartooden.
7 orr nam mutsuroonniyu oot Moohot iyyaa mutsuroonninu maalla,
hehartooden.
8 orr mutsuraan miili qapu oot iyyaa Mooha akkinan maalla hehartooden.
9 orr otant siip qalle ararsane andotin deyiyyu
oot iyyaa medda Mooha kidaminan maalla hehartooden.
10 orr oot tsilluma maalla miidamiyu,
oot daamum moontall iyyaa koddit maalla
hehartooden.
11 "an minan et orrat inn otiyanenne,
inn miidiyane,
eerpaannenno mahh inn qara patinniyane inn iyyaan hartood kida.
12 daamum moontall qalle oot heriyaann ikkaan kodd maalla,
masmasuntin onyaraa;
himampayyaan inn tureeshsh kiyyanno sedep miidene."
paahnat sookittatenne attumat
(mar. 9,50; Luqaa. 14,34-35)
13 ukkannass lamm Yesus asset kid,
"inn husslahattess sookitt;
hekoddu male et sookitt mololoquntayy dapo,
maanaann meawa fottina?
altaash all happama illo lukka namatin iqawusama pateeshsh ittureesh amm akkani koddinamu.
14 inn husslahatess attumat;
saparaan utet qari diham amm dekatta fottiyyanemu.
15 et ispa qapusiyane amm qunna uqqari qupaappinniyanemu.
sekapeesh ikkim man talla nam dahenni akkaanninoss akkan kaan qarass haayin.
16 sedep lamm ikkim orrat erkamaann hin dikk akkinan illo appaayin heka moontall aypisanninaness attumashayn nam dahenn turi akkaattu."
halitt olot
17 lamm Yesus asset kid,
"afan halittanne kollila himampayya all paqisa deyep it inass inkinnaannin;
antu dey,
ikkim kaysaanninaness male amm all paqisaassemu.
18 shaakketin inni lelin,
hak hussanne moont tarpinaness halitt dahenn kaysaannina male,
fitala qoj shoke mossannat jawshadd naf amm qara allhatintamu.
19 semmaalla nam acacada hin ila se qoj shakkaah naf qarin tarpiyyu illo orr pilanno ikkim qumaayyep erkanninan kollinniyyu,
daamum moontall qalle iyy tinnax koddina.
hekoddu male nam acacadda dahenn kayisinniyu illo orr pilanno ikkim kaysinninan kollinniyyu daamum moontall qalle iyy kaan koddina.
20 innasin lelin,
et tsillumaann tsilluma kollisampayya halittatenne heka faraset qara tawunaatta diiyyo amm daamum moontall qallep kala fottihinitanemu.
21 "se orr oloti lelant heddakayten;
settenno se,
'ikasa diiyii;
nam,
nam ikay qarass horat quuramina' kidishshu kida.
22 antu lamm innassin lelin,
nam kafittayy qari miiroonniyu dahenn horat qari quuramina;
lamm nam kafittayy 'att nam awuta dapp!
' kidiyyu otiyyu horatass dehaannina;
nam,
'att nam mashsh dap!
' kidiyyu nam otiyyu dahenn apitt parpar ilop kalina.
23 semmaalla helpaan att por laaqqaa uqqari dehasa qari daayaayt dehannishsho,
nam hed qari dappiy kinnaattaayy et immashsh oorisatto,
24 dayaayt por laaqqa uqqari dehasa turi diiy illo aanii turaqatta nam se olle araaramii;
ukanna mitaatii illo daayaayt dehayii.
25 helpaan nam inn orfadishshan hed kasasu illo inn por horat quuraatep paanaalle annishane nam se olle senii.
et sedep koda diitto,
horat quurampaytass hed tarpinnina;
horat quurampaytanno waartiyass hed tarpinnina daannina;
waartiyaanno man hidanatep hed kalinnina.
26 shaakketin hedi lelin,
kodashshet horat se hed qari quurant sikkinnot hed qari hata male hak daannintu kaysinnintoss man hidan talla amm sohannihintamu."
oot arpalumat
27 ukkannas Yesus asset kid,
" 'arpaluma diiyii!
kidamaadd hedakayten;
28 antu lamm,
'nam por iskattatep tooy illo hadad dahenn mutsurooy qalleet it olle arpalum' hen inni kidin.
29 et ilshitt miskittishshet paatin hed dapusinnishsho,
qeeddii allkashii!
dakinshitt dahenn kahannam apitt parpar ili kashama kapa,
dakinshayt ila meel shokkooh daft kid hedi hedikk.
30 et harkaatt miskittishsh patin hed dapusinniyyo,
quurii allkashii!
dakinshitt dahenn kahanamep kashama kapa dakinshayt ila meel shokkooh daft kid hedi hedikk.
oot purret
(mati. 19,9; mar. 10,11-12; Luqaa. 16,18)
31 " 'nam dakusotayy purrinniyyu dahenn tsaafa purreshadd iddayyu' hekidant.
32 antu lamm innass kidinkiyya,
nyauura minin kodda male,
nam dakusotayy purrinniyyu dahenn ikkim nyauurintoss kodin;
nam dakusot purrit qeeddiyyonno dahenn it olle nyauurin.
oot ashkotat
33 "orr olotess lamm se,
'eerpa ashkatta diiyii;
hekoddu male se att Mooha turi ashkat kaysiyii' kidant heddakayten.
34 antu lamm,
'amm ashkot fadusinnishamu' hen inni kidin.
oot moont sheedda Mooha koddit maalla,
moontin ashkatta diiyyaa,
35 oot hussat por iqashshet lukka Mooha kodd maalla,
husslahatennenno ashkatta diiyyaa;
oot yerusaalem sapara Daam se kaan koddit maalla,
yerusaalemennenno ashkatta diiyyaa;
36 oot att rifant mashshayt ila shakkaah naf it atat shoke ipoorati koda fotta diinnishu maalla,
mashshaytin ashkatta diiyii.
37 sekapeeshsh et ishaamaann shaakket koddane heyye kidaa,
et kodda diinniyane iyyokku kidaa;
sed qari kaka padawot lamm heka iyy se nayqat kida.
haarot oorsatta
(Luqaa. 6,29-30)
38 "se 'iilt kapass iilt,
ilhitt kapass ilhitt' kidant heddakayten.
39 antu lamm assetin inni kidin,
nam iyaan nayq inn qari kodiyu qara haarot oorsatta diiyyaa.
nam aaddaatt miskitt paaliyyoss aaddaatt pihitot mitaattiyyii.
40 et namat tsuppuqoshayt qeeddatta fadu illo hed kasasiyyo ikkim kopportaaytenno qeeddanninu kod.
41 nam shokku et,
'an olle paana qoj aanii' kidu hedi koomo,
att lamm paana settep kiyyu qari padaw olle aanii.
42 nam hed qara fadanniyu dayyii;
nam hed qara pirkaattisatta fadiyyu dawura diiyii."
orr nam qar hittinnu hoxsaatta
(Luqaa. 6,27-36)
43 ukkannass lamm Yesus asset kid,
"lel se 'nam dahenn hoxsaadu;
nam hed qar hittinniyyu qar hittiyyii' kidiyyu hedakayten.
44 antu lamm,
orr inn qar hittinniyy hoxsaadaa;
[orr inn pishiyu qoraa;
orr inn qar hittinniyyoss iyaan dikk erkayaa;]
b orr inn miidiyyoss Mooha dinkamaa hen inni kidin.
45 et sedep koditane medda appaayn se moontalle kiyyot koddintan.
iyyat orr se nannayqassenne orr se diddikkass lashsh yaaminnin;
settep lamm tsillampayyaanne juppampayyaass roop roopinnin.
46 et orr inn hoxsaanniyooh hoxsaannishshan koddo heriyaanna maana?
juppampayaanno sedep kodinpa?
47 et kafaynesseh paanussa dehannishan koddo,
maanann orr shokku qara tawutan?
orr husslahatenno sedep kodinpa?
48 semmaalla qum appaann heka moontall ihaasutta dap koddep,
innanno iyyaan haasutta dap koddaa."
hekid.