ekawusama Yesus
(mar. 1,12-13; Luqaa. 4,1-13)
4
1 sekanna ikkim taapilosin ekkawusaminoss laaffot Mooha lak patpatt kiyyop yesusin ant.
2 helpaan iyyat kallapat hund afurenne awaddat hund afur dama dama male ulli olade hetuff.
3 ekkasampayt lamm Yesus kapop dey illo,
"et meet Mooha koddito dakalla hin ikkim dama koddinan acac."
ikkid.
4 Yesus lamm,
" 'namat lel se kap Mooha qara sohanniyonn kallaannin male amm damanneehamu' hekidant tsaafant."
he ikkid.
5 sekkanna taapilooset yesusenn saparaan miil yerusaalemep aan hayna man miilot qari ellashiyy illo,
6 "et att meet Mooha koddito,
intu areett all ikkashe!
'ikkim hed qar lushinaness Moohot hitaymiyyooy acacina,
iyyaa lukkoott dakan kohaytisama tura,
harkooddun hed qapinan.'
hekidant tsaafante" ikkid.
7 yesusenno,
" 'moohaayt poldaayt ekkawsatta diiyii.
' hekidant tsaafant" hekid immitaattiy.
8 ukkanna lamm taapiloos yesusenn utet kaant qarop aan daamum husslahatenno serkooddanno dahenn iakkiyy illo,
9 "et an turi sunkitu ani shoomatto hin dahennin hedi daannina."
ikkid.
10 helpaanette Yesus,
" 'moohaayt poldaayti shoomadu;
iyyeeh Mooha kodadu!
' hekidant tsaafante,
att seetsan,
an kapa all sekaadu!"
he ikkid.
11 sekkanna taapiloosenno all iyy diiy;
hitaymiyya moohaatenno deyen illo yesusi hitamen.
Yesus kelilaalless kollisa hir
(mar. 1,14-15; Luqaa. 4,14-15)
12 helpaan Yesus hidama yewannis dakaye kelilaap aan.
13 sapara nasreet alldiiy,
por se pakatet kelila kapeesh kiyyo,
huss sapilonenne huss niftalem qalle saparaan kiyy qifirnaahomep aan illo ulli kallaad.
14-16 hin sedep kodden,
lel hin isaayaas himampayt ,
"huss sapilonenne,
huss niftaalem,
kelila,
huss siip ayhuta kodda diiy,
paana se haq yortaanos patin pakatet kapin anniyyo,
siip poorinnat ila kallaanniyyu attumat kaant akk;
orr huss poorinnatatenn kaatta toxt kela kallaanniyossenno attumat sohatt."
kid lel ikkim kaysaanninoss kida;
17 Yesus esseteeshsh hir,
"daamum Mooha hedehaade juppot qara mitaataa!"
kidan kolliyy.
Yesus qurtsummet olampayya afur hemb
(mar. 1,16-20; Luqaa. 5,1-12)
18 helpaan Yesus pakatet kelila kapin tarpiyyo,
nam lakk ankasanne inshar,
iyyaanno simoon se betsiroos kidamenne insharaayy intriyaas,
oot iyyaa qurtsummet olampayya kodden maalla,
urkupa pakatet qari qaasiyane akk.
19 illo,
"an kanni hooyaa;
qum inn qurtsummet olishshanep ikkim orr ani hembintanessin inn kodina!"
iyyaa kid.
20 iyyaa illo esseteeh urkupooddu alldiiyyen illo iyy kanni sohaden.
21 sekkanna jawuhayyess antaap kodd illo orr pil medda saptiyoos ankasanne inshar,
yayqoopenne yewannis appaddu olle konkaalle urkupooddu il sussukanniyane akk illo hemb.
22 iyyaanno esseteeh appaddonne konka sett alldiiyyen illo iyy kanni sohaden.
Yesus orr lek kolliy, diniy
(Luqaa. 6,17-19)
23 lamm Yesus man dinkamaaddua talla kollittete,
lel masmasunt heka daamum Mooha eeshitete,
baaqanne kattikala dahenn ila siip dinittete huss kelila dahenn qall mimmitaatin kida.
24 torroshayyenno huss sooriya dahenn qalless dakaysamaatt;
orr baaqanne kattikalaan hawhawi kikkiyin rakkanniyyanne iyyaan laaffot oshshittetanne,
maot qara kishshonne iyyaan muluhuluhenn iyy kapop deyen;
iyyat diniy.
25 orr lek iyyaan huss kelilaatenne saparaddaan sapara hundb kidamiyy qallenne yerusaalemenne yihuta qalle haq yortaanos patin kiyy qalle sohadenno Yesus kanni aanen.