eeshshanta yewannis heka ahlisampayt
(mar. 1,1-8; Luqaa. 3,1-18; yewa. 1,19-28)
3
1 helpaanette yewannis ahalisampayt lak yihuta se patpatt kiyyop eeshantan dey.
2 illo,
"daamum Mooha hedehaade juppot qara mitaataa!"
kidin.
3 hin isaayaas himampayt ,
"nass nam lak patpatt kiyyu qalle ullupiyu,
'paana pold soorumaa,
uushuqaayyenno pahiyaa!'
kidiyyu,"
kid lel,
oot yewannis kida.
4 uuwaat yewannis rifant kaal ila soorumant;
surrayy qalleeshanno sheep hidannin;
damaayyanno torrayyaanne a taammat kida.
5 essete siipat yerusaalemeeshshanne huss yihuta dahenn qallenno paat se haq yortaanos kapeesh kiyyooshshanno dahenn yewannis kapop deyen illo
6 juppotaddu putsiyattan iyyat haq yortaanos ili iyyaa ahalinnin kida.
7 lamm yewannis helpaan farasetbnne satuqet ila orr lek iyy kapop deyiyyane akk illo ass iyyaa kid,
"inn medda puushat!
jiiayta Mooha se deyiyyu kela ikkim passannintani aynu inni lel?
8 sedeeshsh erkamaan juppot qara mitaataayn akkinniyy erkayya male,
9 'innu medda aprihaam' kidan afa passannintanep inni kinnaatta diitu.
Moohot aprihaamess dakalla hin ila,
medda sohashisa fottina hen inni kidin.
10 ammann lamm qorayya qida allkashaass erkaddot kamant keli haayam.
semmaalla qoyr qundaan dikk dala diinniyyu dahenn quuramina apitt ili all kashamina.
11 toare,
antu ikkim juppot qara mitaatintaness haqannin inn ahlinnin;
hekoddu male iyy an kanneesh deyiyyu laaffot miilotanne apittann inn ahlinnina;
iyyat ikkaaness an qara tawa;
amm antu hopooyy naf haisa henkiyamu.
12 layt iyyat palaalle uunt ila puunnan reehiyu harkayy qalle qapa.
et orkela reehu kanna miiltot unkulaallep kalinnina;
puunna lamm apitt liqqa diinniyyu ilass all doohinnina."
ahalisama Yesus
13 helpaanette Yesus ikkim yewannis iyy ahlinninoss kelilaashsh haq yortaanos kapop dey.
14 yewannis lamm,
"hin amm koddinanemu;
an hed harki ahlisamaay male,
ashshannass att an kapop deyin?"
hekidin iyy dawurin.
15 Yesus lamm,
"erkama tsilluma dahenn paana sedin kaysisa innu fadusinnine ammann sedep hekoddu" he kid iyyi mitaattiy.
yewannis illo ishaamaayy olle senaan Yesus ahliy.
16 helpaan Yesus ahlisame esseteeh haq ila sohad illo moont qahisant,
laaffot moohaatenno elela pahanaattan lekkatt iyy qari haysannishshonno akk.
17 essete nass,
"toare,
meetaawu antu hoxsaanniyyu,
iyyin masmasiyyu,
hin iyy."
kidiyyu moontalleett dey.