Na Mauddi a Awera
3
Maawag a maintindiyannu iyaw a si uddi na awera, dumatangngeno tiyempuwera na paddiriyat. 2 Se yo tolayera e iddukanda lamang yo baggira ingkepay, maagum si pirak, balagasayera, mangut ira, mattalatanggera, ammera makimoray so gagginafandera, ammera ammu nu kasanna a mappabalat anna ammera mangikakwa sike Dios. 3 Ammera ammu a midduk si kasittolera, ammera a mamakoma, manandaral ira si kasittolera, ammera magaggaddan yo baggira ingkepay, maral irengke anna ikalussoreno mapiya. 4 Traydor ira, ammera nonotan abbu yo akwanda, balagasayerengke, iddukanda yo panggamman na talubaggan ammat sike Dios. 5 Massalasasan ira a maddayaw sike Dios udde inammayandeno pakapangwa i Dios a mangangkakweno akkatolera. Aroyuwannuwera. 6 Se ana yo korwan sikwara a mangilloku si katabbalayera anna gaggaddandeno illaw a bafabbayera sinay a nadammattan si liwa-liwat anna megiyera si amminan a garannud ira a maral a panggamman. 7 Iyawera a bafabbayera e maumid a matunduwan anna ammerengke maintindiyan ino aggammu na kagakkuruwan. 8 Kakunna yo pattulyat da Janes anni Jambres sike Moises, kunnapay yo pattulyat iyawera a tolayera si kagakkuruwan. Maral yo agginonotanda anna ammena gakkurug yo angngurugga. 9 Udde yo maral a akakwanda e ammenana mebali-balin se maitana amminan a tolayera yo kinaillora kakunna yo nedemmu sike Janes anni Jambres sin nabayagin a tiyempu.Na Korwan a Tabarang i Pablo sike Timoteo
10 Udde naammuwannuweno tunturuk, ino aggalangwak, ino gakkadku si akkatolay, ino angngurugku, ino pasensiyak, ino iddukku, ino pàattamku, 11 ino akkelupetkuwera anna passufrik a nedemmu sikwak so Antiokia, Iconio anna Listra. Inattammangku iyawera a passufriyera udde sitawera amminan, tinabbutnak i Afu Jesus. 12 Si kagakkuruwanna, amminan a manggam a manolay si kaangga-anggam sike Dios a gumaladandan ira i Kristo Jesus e melupetna. 13 Udde yo maral a tolayera anneno mangillokuwera e mammaral irengkena anna ibali-balinda a mangilloku si korwan ira anna mappaillokuwera. 14 Udde ikka, ibali-balinnuweno tunturuwera a nakalakammum anna nangurugkangke se ammum inoyera a nanunturu sikwam. 15 Dandammannu a sin akkabbingngu, naammuwannun ino neturak a sapit i Dios a nangadda sikwam si angngammu a maammuwan yo pannabbut na tolayera megafu si angngurug sike Kristo Jesus. 16 Amminan a neturak a sapit i Dios e neturak megafu si pakapangwa i Diosa anna makapammakapiya si panunturu si kagakkuruwan, makaitunturu si nalliwatan, makapatunung si tolayera, anna makapanunturu sikwatam a mangwa si fustu, 17 takesi amminan a meyannung sike Dios e nakaparan a mangwa si amminan a garannud a mapiya a taddera.