4
Si Dios anni Kristo Jesus a testiguk ira a mannunutna so aggatolayera anna so natayera, mulina imman anna mattangngalna baggina si amminan antu dundunan taka a 2 ibalaggom ino sapit i Dios so tolayera. Ibali-balinnu a mattam maski nu mapiya onnu maral ino tiyempu. Angga-anggammannu, passapitannu anna patuyaggannuweno nakam ino tolayera. Akwannu iyaw si mapasensiyengke a panunturu. 3 Se dumatangngeno tiyempu a yo tolayera e ammerana maningngag si gakkurug a annunturu, imbes, akwandaneno maral a panggammanda ingkepay gumafu se mausisera a maddingngag si neduma a kiya-kiyan. Mintarak irana si odduwengke a mestruwera a massapitna sikwara si maski sanna a kanggamda a madingngag. 4 Ammerana maningngag si kagakkuruwan anna tuntulandeno awan serbina a yayam ira na aggidiyafuwantam ira. 5 Udde ikka, maumidnu a gaggaddan yo baggim ingkepay si amminan a akwannu, attammannuweno passufri, akwannuweno tarabafu na tata a mangibalaggaw si Mapiya a Baga meafu sike Jesu Kristo. Akwannu amminan ino tarabafu a netalaknga i Dios sikwam.6 Udde ikkanak, dumatangngeno tiyempu a mewalliyaknga manilla binarayan a mebubbu so altar anna dengke yo tiyempu na akkapatek e aranniyen. 7 Kumanangku si amminan a tuyagku a akwan ino neyaddana i Dios sikwak a akwangku anna nelabangkuweno mapiya a laban. Nebalingkuweno paggunta kakunna yo sundalu a nakilaban si fustu anneno tata a gumakkarela a binalinneno paggunta. Siggakurugak si angngurugku. 8 Antu sitoye, yo pammakapiyana a mangipaitana a matunungak sike Dios e neparan sikwak. I Afu a matunung a gumannunut e iyaddanana sikwak sitan a aw bakkan lamang para sikwak udde si amminan pay a maanap si pannulina.
Na Panguddi a Sapit ira i Pablo
9 Kumanannu a makaumang sikwak si malan a tiyempu. 10 Se inanawannak i Demas gumafu se iddukannengkeno akkatolay sito talubaggan anna inang baggina so Tesalonica. Inang i Cresente so Galacia anna i Tito e inang so Dalmacia. 11 I Lukas lamang yo bulungku sitaw. Ibulunnu i Markus sitaw se makaduffun baggina sikwak so akakwangku para sike Afu Dios. 12 Dinundungku i Tikikus so Efeso. 13 Nu umangka, ikangkalinnuweno tafálku a nabattangku sike Carpus so Troas. Appannu pay yo libruk ira annanot yo nakaturak so gaddang na aggayam. 14 Oddu yo maral a inangwana i Alejandro a gumappanday sikwak. Kastiguwannana i Afu Dios baggina so taddanera. 15 Mimudka sikwana gumafu se tulyatannengkeno mensahe a ibalaggotam.
16 Si pitta a pattallangku so usgadu e awan a nebulun a nanuffun sikwak udde inanawandak amminan. Idasalku a pakomannerana i Dios. 17 Udde dinuffunannak i Kristo anna pinatuyagngak takesi megafu sikwak mebalaggaweno Mapiya a Baga anna amminan a bakkan a Hudyuwera e madingngaggana. Nesalakngak pay si akkapatay. 18 I Kristo yo manabbutna sikwak si amminan a maral anna tabbutannak so pattangngalanna si langit. Madayaw sike Dios amu-amu. Amen.
Na Panguddi a Akkidyot
19 Ikumustanak sikwara Priscila anni Akila anneno katabbalay i Onesiforo. 20 Nabattang i Erasto so Corinto e inanawangku i Trofimo so Mileto se matakit baggina. 21 Akwannu yo damaramam a umang sitaw liye yo tiyempu na labbat.
Manantawka kunda Eubulo, Pudente, Lino, anni Claudia anna amminan ino korwan a wawwayiyera si angngurug a ana sitaw.
22 Idasalku sike Afu Jesu Kristo a duffunannakana anna masimpatna sikwayu amminan.