Na Mapiya a Sundalu i Kristo Jesus
2
Antu ikka, Timoteo a anakku si angngurug, ibali-balinna i Dios a patuyaggan naka megafu si duffun i Kristo Jesus. 2 Anneno mensahe a nadingngagngu sikwak so allangan na oddu a testiguwera e italak so makurug a tolayera a makaitunturuna pay so korwan ira. 3 Makiballeka so passufri kakunna yo mapiya a sundalu i Kristo Jesus. 4 Na sundalu e ammena maddamit a mangwa si kiya-kiyan a bakkan a parte na kinaaw a akakwanna. Na gakkadna e mapaanggamman ino kumanderda. 5 Anna kakunna pay yo gumakkayam e ammena maarasaweno premyu nu ammena tuntulan ino tun ira na pakayam. 6 Kunnapay yo gumappayaw a mangwa si tarabafu e antu yo palungu a makaarasaw si ganiyera. 7 Nonotannu yo sapitangku, se i Afu e indannana kayu si pintindi si amminan a kiya-kiyan.8 Dandammannu i Jesu Kristo a nantotolay a gaka i David. Antuweyaw yo Mapiya a Baga meafu sike Jesu Kristo a nebalaggok. 9 Antuweyaw yo pakegafuwan na paddiriyatku anna nakawaranak a manilla kriminal so paffukukan. Udde yo sapit i Dios e ammena nakawaran. 10 Kunnantu, attammangku amminan maipegafu so pinilina i Dios a tolayera takesi maarasorana pay yo akketabbutda megafu sike Kristo Jesus anna so kadayawan a awan pakiyaranna. 11 Gakkurug iyaw a kasapitan:
Nu natay etam a bulunna, matolay etam pena a bulunna.
12 Nu mattam etam, makipanangngal etam pena sikwana.
Udde nu kuntam a ammetam ammu baggina, kunna pena a ammena etam ammu.
13 Nu ammetam a makurug, siggakurug baggina,
se ammena meyambafag nu yanya baggina.
Na Gumasserbi a Neyannut i Dios
14 Siggamannutunannuwera meafu sitaw, anna palanánnuwera a i Dios antu yo testigum a ammerana makipakwa meafu si sapit a ammena kaawan udde manaral lamang so inoyera a maddingnga-dingngag. 15 Akwannu yo damaramam a neyannut i Dios a tata a gumasserbi a ammena maatal anna fustuweno pangibarifitna si sapit a kagakkuruwan. 16 Aroyuwannuweno tolayera a mabi-abid si awan serbina a pakegafuwan ino tolayera a manalekkud sike Dios, 17 anneno tunturura e mekunna si takit a kanser a mawwarak anna manaral si interu a baggi. Nebilang sitaw a tolayera e da Himenio anni Fileto. 18 Nallillik ira si kagakkuruwan anna sapi-sapitanda a yo panantotolay e nedemmuwen. Dara-darallanda yo angngurug na korwan ira. 19 Na gakkurug a minangikkurug ira sike Dios e matuyag si angngurugga kakunna yo matuyag a fundasyon na dokal a balay. Kunna sitaweno neturak: “Ammuna i Afu Dios inoyera a meyannung sikwana,”a anna “Kada tolay a marang si duffun sike Afu Dios e maawag a mimemmak a mangwa si maral a taddera.”b
20 So dokal a balay ana naddadaruma a rumentera a naangwa si bulawan anna pirak. Ana pay naangwa si kayu anna si lubag. Na korwan ira sitaw e meyusa para si kaawan a okasyon ira anneno korwan ira e para si ordinaryu a okasyon ira. 21 Kunnantu, amminan a mallinis si baggira ingkepay si kiya-kiyan a binangngatku e mekunnana si pang-kusina a kiya-kiyan a meyusa si kaawan a okasyon ira, mesina anna makapammakapiya so makambalay. Nakaparan ira a akwan amminan a mapiya a tarabafu. 22 Antu, umaroyuka so maral a panggamman na abbing ira anna akwannu yo damaramam a manolay si fustu anna ana angngurug, idduk anna piya. Makibulungka so tolayera a malinis yo nonotda a marang sike Afu Dios si duffun. 23 Lillikannuweno awan a serbina a pakitinnulyat gumafu se ammum a paggabwatan lamang yo pappaparakwa. 24 Anneno tata a masserbi sike Afu Dios e maawag a ammena gumakkipakwa udde masimpat si amminan a tolayera, maporay a mestru anna mapasensiya. 25 Masinakka nad a manunturu so inoyera a amme umannung sikwam anna tantaro nu indannerana i Dios si tiyempu a mabboboli anna maammuwan ino kagakkuruwan. 26 E si kunna sitan, manonotda si fustu a makatamang irana so silu i Satanas a naggaggad sikwara anna akwandeno panggammanna.