Na Meka-adwa a Turak i Pablo sike
Timoteo
1
Naggabwat iyaw sikwak, i Pablo a apostol i Kristo Jesus si uray i Dios tapenu ipakaammuweno angat a netamba i Dios sikwatam a nakisittata sike Kristo Jesus. 2 Antuweyaw yo turakku sikwam Timoteo a ibilangku a iddu-iddukangku a anakku si angngurug.Idasalku sike Dios a Amatam anni Afutam a Kristo Jesus a ibali-balinda a massimpat sikwayu, allakkan dakayu anna indan dakayu si piya.
Appabala-balat anna Pangangga-anggam
3 Mabbalatak sike Dios a dinayok si malinis a konsensiya kakunna yo inangweno aggidiyafuwangkuwera sin nabayag a tiyempu sikwak a maumid a maddandam sikwam si dasalkuwera aw anna gafi. 4 Madandamku a tinangitannak. Maanappak a mangita sikwam takesi maanggammannak ingke. 5 Madandamkuweno makurug a angngurugngu. I afum bakat a i Loida anni inam a i Eunice e baggira yo palungu a nangurug sike Jesus. Siguraduwak a ana sikwam pay iyaw a angngurug. 6 Antu gafuna e mannutunan taka a ibali-balin ino ipaangwana i Dios sikwam sin nepotungkuweno kamatku sikwam. 7 Se yo Espiritu a neyaddana i Dios sikwatam e ammena etam dama a mapattalaw. Imbes, yo Espirituna e inindanna etam si pakapangwa, idduk anna pangigaggad si baggi.
8 Ammem maatal a manaddag meafu sike Afutam onnu sikwak a tata a fukuk maipegafu sikwana, udde massufrika sikwak a mangibalaggaw si Mapiya a Baga meafu sike Jesu Kristo. Maddependeka si pakapangwa i Dios 9 a nattabbut sikwatam anna pinilina etam a mangikakwa sikwana. Inangwana iyaw bakkan a meantu so inangwatam udde meantu so gakkadna ingkepay anna simpatna. Masimpat baggina sikwatam megafu sike Kristo Jesus liyena kepay pinaratuweno talubaggan. 10 Udde sitoye nepaitaneno simpatna sikwatam megafu so paggumwang i Kristo Jesus a Mannabbuttam. Dinaralneno pakapangwa na akkapatay anna nepakaammuneno angat a awan pakiyaranna megafu si Mapiya a Baga meafu sike Jesu Kristo. 11 Se iyaw a Mapiya a Baga, nadutukanak a tata a gumannundu, apostol anna mestru, 12 anna iyan yo gafuna antu massufriyak si kunna sitaw. Udde ammek maatal se ammuk baggina a nattalakkangku anna siguraduwak a maimuranneno netalakku sikwanaa makiyad si Aw na Pannunut. 13 Tuntulannu a pangngarigan ino fustu a tunturuwera a nadingngag diyaw sikwak, si angngurug anna idduk a ana sike Kristo Jesus. 14 Imurannuweno gakkurug a tunturu a netalak sikwam megafu si duffun ino Espiritu i Dios a migigyan sikwatam. 15 Ammum a amminan a taga-Asia e tinalekkurandak mesapat da Figelo anni Hermogenes. 16 Idasalku a allakkannana i Afu yo familya i Onesiforo se maumid a bannayannak anna ammena a ikaatal ino akkefukukku. 17 Sin dinumatang baggina so Roma, maanap baggina a nintufuk sikwak e naintarakannak. 18 Idasalku a allakkannana i Afu i Onesiforo sitan a Aw na Pannunut. Ammum ingke nu kasanna yo passerbina so Efeso.