Pannabarang so Minangikkurug Ira
5
Ammem passalasapitan ino tolay a tammanakam ammat sikwam, udde kaabirannu baggina a manilla amam. Taratunnuweno tan-abbing a lallakiyera a manilla wawwayim. 2 Taratunnu a manilla inam ino manannakam a bafabbayera. Anna so tan-abbing a bafabbayera, taratunnuwera a ana malinis a agginakamman manilla wawwayim.3 Ilawam ino baluwera a gakkurug a makaawag si duffun. 4 Udde nu yo tata balu e ana anakngera anna afunera, yo palungu a maawagga a makalakammu e iyaw: mepaiteno pangikakwara sike Dios a manabbud si familyara ingkepay anna mepaiteno pammabalatda so gagginafandera se kaangga-anggam iyaw si aggita i Dios. 5 Na balu a gakkurug ingke a makaawag si duffun e tattatana lamang a manolay, innanamanna lamang i Dios anna ibali-balinna a maddasal si gafi anna aw a marang si duffun sikwana. 6 Udde nu yo balu e manolay si panggammanna ingkepay e manilla natay a tolay sikwana a aggatolay kepay. 7 Dundunannuweno minangikkurug ira sinay a tabburandeno familyara takesi awan massapit a mangwa-angwera si maral. 8 Anna seanya yo ammena manabbud si kawayyannera, metalwaring si familyana, ipaitana a ammenengke mangurug sike Kristo. Mas maral ingkepay baggina ammat si tata tolay a ammena mangurug sike Kristo.
9 Na balu a melista a masuportan e maawag a bafay a maddawun si annam a fulu anna mamitta lamang a nakiatawa. 10 Maammu-ammu nad baggina so mapiya a inangwana kakunna yo pappadokal si anakngera si mapiya, mappadulot si bisitera so balena, anna masserbi so maawaga ino tolayera i Dios, manuffun so tolayera a madidiyat, anna mangikakwa baggina ingkepay a mangwa si amminan a garannud a mapiya a taddera. 11 Udde ammem isapat ino abbing a baluwera so allistan, se nu yo panggamman ino baggira a makidagga imman si lalaki e mattuyag ingke, mapurayandeno tambara a masserbi sike Kristo, dumatangngeno tiyempu a kanggammanda a makiatawa imman. 12 Se nu makwa iyan, manunut irana gumafu se tinalekkurandeno palungu a tambara sike Kristo. 13 Kunnapay, nu nakalistera, makalakammurana a makkayang anna sayangandeno tiyempura a mamalabalay anna makiyayam ira si ammena mapiya meafu si korwan a tolayera. Makimetera si akkatolayeno korwan a tolayera anna massapit ira si ammera nad a sapitan. 14 Nabu kanggammangku a makiatawa imman yo tan-abbing a baluwera, manak ira, anna manabbud si katabbalera. Nu makwara iyaw, awan a masapit ino kapakwatam metulyat sikwara. 15 Se anen ino korwan ira a amme nakimoray sike Kristo tapenu dumandan sike Satanas. 16 Nu yo bafay a minangikkurug e ana kawayyannera a baluwera a gakkurug a makaawag si duffun, tabburannera nad takesi ammera a makapadammat so nammu-ammung a minangikkurug ira anna makaduffun irana so baluwera a awan manuffun sikwara. 17 Na afu-afuwera na minangikkurug ira a mangigiya si fustu e melawa nad anna mapagan ira nad si fustu metalwaring so inoyera a manundu anna manunturu si sapit i Dios. 18 Se kunna so neturak a sapit i Dios, “Ammem apputan ino bifig na baka sikwana a maggi-aggik si trigu,”b anna “Maawag a mapagan ino gumattarabafu.”c 19 Ammeka maningngag si tolay a màakusa si afu-afu na minangikkurug ira nu awan adwa onnu tallu a testiguwera. 20 Nu yo afu-afu na minangikkurug ira e makaliwa-liwat, passapitannu baggina so allangan na kaodduwan a minangikkurug ira takesi yo korwan a afu-afuwera na minangikkurug ira e mattalaw irana a malliwat. 21 Si Dios anni Kristo Jesus a testiguk ira anneno napili a anghel ira, palanán taka a makimoray sitaw a dundun ira a awan pappeduma anna parefu a taratunnuwera amminan. 22 Ammeka mappalan a maddutuk si tolay a màafu-afu na minangikkurug ira, onnu maddamit so liwa-liwat na korwan ira. Itannu a ammeka malliwat.
23 Bakkan si passi danum lamang yo inumannu, minumka pay si bisang a binarayan a uru si maumid a pallow na surukngu.